অগ্নিপথ বিক্ষোভৰ সন্মুখীন হোৱা ভাৰতীয় সেনাৰ লেফটেনেন্ট জেনেৰেল অনিল পুৰিয়ে জনাইছিল, যিয়ে নহওক, প্রকল্প প্রত্যাহাৰৰ কোনো প্রশ্ন নাই । হিংসাত্মক বিক্ষোভৰ পৰিস্থিতিতেই অগ্নিপথ প্রকল্পৰ অধীনত সেনাবাহিনী, নৌবাহিনী আৰু বায়ুসেনাত নিয়োগৰ সময়সূচি প্রকাশ কৰিলে প্রতিৰক্ষা দপ্তৰে ।
দেওবাৰে অগ্নিপথ প্রকল্পৰ অধীনত সেনা নিয়োগৰ বাবে এটা বিস্তৃত নিয়োগৰ সময়সূচি ঘোষণা কৰে লেফটেনেন্ট জেনেৰেল অনিল পুৰিয়ে । সাংবাদিক বৈঠকত তেওঁ জনায়, চৰকাৰ অগ্নিপথ প্রকল্প বাস্তৱায়নৰ দিশে আগবাঢ়িছে । যুৱ সমাজক আবেদন কৰা হৈছে তেওঁলোকে যেন এইবাৰ আন্দোলন স্তব্ধ কৰে । ইয়াৰ পাছতে অগ্নিপথ প্রকল্প অধীনস্থ অগ্নিবীৰসকলক অন্তর্ভুক্তিৰ বিষয়ত নৌবাহিনীৰ পৰিকল্পনাৰ বিৱৰণ দিয়ে ভাইছ এডমিৰেল দীনেশ ত্রিপাঠীয়ে । তেওঁ জনায়, অহা ২৫ জুনৰ ভিতৰত নৌবাহিনীৰ প্রধান কার্যালয়ৰ পৰা নিয়োগল বিস্তৃত নির্দেশনা প্রকাশ কৰা হ’ব । মহিলা আৰু পুৰুষ —উভয়ৰে অগ্নিবীৰ প্রকল্পৰ অধীনত নৌবাহিনীত যোগ দিয়াৰ সুযোগ আছে ।
আনহাতে, এয়াৰ মাৰ্চেল এছকে ঝাই জনায়, অগ্নিপথৰ অধীনত বায়ুসেনাত নিয়োগৰ নিবন্ধীকৰণ আৰম্ভ হ’ব ২৪ জুনৰ পৰা । প্রথম পৰ্যায়ত অনলাইন পৰীক্ষা আৰম্ভ হ’ব অহা ২৪ জুলাইত ।
ভাৰতীয় সেনাত নিয়োগৰ ঘোষণা কৰি লেফটেনেন্ট জেনেৰেল পোনাপ্পাই জনায়, ২০ জুনত এটা খচৰা বিজ্ঞপ্তি জাৰি হৈছে । ইয়াৰ পাছত এক জুলাইৰ পৰা ভাৰতীয় সেনাৰ বিভিন্ন ইউনিটৰ তৰফৰ পৰা বিজ্ঞপ্তি জাৰি কৰা হ’ব । আগন্তুক আগষ্ট, ছেপ্টেম্বৰ আৰু অক্টোবৰত দেশৰ বিভিন্ন প্রান্তত সেনা নিয়োগৰ ৰেলী হ’ব ।
প্রথম বছৰত ৪০,০০০ অগ্নিবীৰ নিয়োগৰ বাবে ৮৩টা ৰিক্রুটইমেন্ট ৰেলীৰ আয়োজন কৰা হ’ব । তাৰ পাছত প্রশিক্ষণ আৰম্ভ হ’ব । সেইটো ডিচেম্বৰৰ প্রথমৰ পৰা দ্বিতীয় সপ্তাহৰ মাজত । এই পৰ্যায়ত ২৫ হেজাৰ প্রার্থীৰ প্রশিক্ষণ আৰম্ভ হ’ব । ২০২৩ৰ ২৩ ফেব্রুৱাৰীত দ্বিতীয় পৰ্যায়ত প্রশিক্ষণ শিবিৰত যোগ দিব অগ্নিবীৰসকলে ।
