Raijor Dal rally in Sibsagar :
ৰাজ্যৰ পাঁচ সমষ্টিৰ উপ- নিৰ্বানন হাইভল্টেজ প্ৰচাৰাভিযানৰ আজি অন্তিম দিন ৷ এই দিনটোতে নিজ সমষ্টি শিৱসাগৰত বিশাল জনসভাত ৰাইজৰ দলৰ সভাপতি অখিল গগৈৰ গৰ্জন ৷ ২০২৬ ত বিজেপিক ব্ৰক্ষ্মপুত্ৰলৈ নিক্ষেপৰ আহবান ৰাইজক । ৰাইজৰ দলৰ শিৱসাগৰ জিলা সমিতিয়ে আয়োজন কৰা এই সভাৰে আগন্তুক ২০২৬ ৰ ৰণশিঙা বজালে গগৈয়ে ।
উল্লেখ্য যে ,উপ- নিৰ্বাচনৰ দিন ঘোষণা হোৱাৰ পাছতে কংগ্ৰেছ নেতৃত্বাধীন বিৰোধী ঐক্য মঞ্চ(অসম সন্মিলিত মৰ্চা)ৰ স’তে মধুচন্দ্ৰিকাৰ অন্ত পৰিছিল ৰাইজৰ দল,অজাপ,বাঁওমৰ্চা সহ আন কে’বাটাও দলৰ ৷ বিহালীত কংগ্ৰেছে নিজাববীয়াকৈ প্ৰাৰ্থী ঘোষণা কৰাৰ সমান্তৰালভাৱে অসম সন্মিলিত মৰ্চা প্ৰক্ষেপিত কৰে চিপিআইএমএলৰ প্ৰাৰ্থী ৷ ইয়াৰ পিছতে প্ৰচাৰাভিযানত নামি পৰে শাসক – বিৰোধী দল ৷
ইয়াৰ মাজতে অখিল গগৈয়ে বিহালীত অসম সন্মিলিত মৰ্চাৰ প্ৰক্ষেপিত প্ৰাৰ্থীৰ হৈ দুই এখন সভাত অংশগ্ৰহণ কৰি নিজৰ প্ৰচাৰাভিযান সীমাবদ্ধ ৰখাৰ বিপৰীতে ২০২৬ৰ বিধানসভা নিৰ্বাচনৰ বাবে ডেৰবছৰ থকা অৱস্থাত আগতীয়াকৈ ৰাইজৰ দলৰ হৈ নামনি অসমৰ সংখ্যালঘু অধ্যুষিত কে’বাটাও সমষ্টিত ব্যাপক সভা- সমিতিত অংশগ্ৰহণ কৰে ৷
সোমবাৰেও নিজ গৃহ সমষ্টি শিৱসাগৰত দলৰ দ্বাৰা আয়োজিত বিশাল সভাত অংশগ্ৰহণ কৰি অখিল গগৈয়ে কয়, শিৱসাগৰত হাজাৰ হাজাৰ ৰাইজৰ সংকল্প ৷ ২০২৬ ত বিজেপিক ব্ৰক্ষ্মপুত্ৰত দলিয়াই দিম, ৰাইজৰ দলৰ সহযোগ নোহোৱাকৈ ২৬’ত কোনেও অসমত চৰকাৰ গঠন কৰিব নোৱাৰিব ৷ ৰাইজৰ দল হ’ব কিংমেকাৰ ৷