Bhatiapar ONGC Gas Leak:
ৰাইজৰ ক্ষোভৰ উদ্গীৰণৰ আশংকাত ভুগিছে তেল আৰু প্রাকৃতিক গেছ নিগম (অ’এনজিচি)। ৰুদ্রসাগৰ তৈলক্ষেত্ৰৰ অন্তর্গত ভটিয়াপাৰৰ আৰডিএছ ১৪৭ (এ) তৈলখাদত সংঘটিত বিস্ফোৰণৰ পাছৰ ভয়াৱহ পৰিস্থিতিৰ আজি ১৬ দিনেও নিয়ন্ত্রণ কৰিব পৰা নাই অ’এনজিচিয়ে। তিনিজনীয়া মার্কিন বিশেষজ্ঞৰ দলে পৰিস্থিতি নিয়ন্ত্রণাধীন কৰিব বুলি অ’এনজিচিয়ে কৰা দাবী সাৰশূন্য প্রমাণিত হোৱাৰ দিশলৈ গতি কৰিছে বুলি নিজে শংকিত হৈছে।
কে’বা কোটি টকা ব্যয় কৰি পৰিস্থিতি নিয়ন্ত্ৰণৰ বাবে অনা বিশেষজ্ঞ দলটোৰ জৰিয়তে সফলতাৰ মুখ দেখিব বুলি পাকে-প্ৰকাৰে ভটিয়াপাৰৰ ক্ষতিগ্ৰস্ত ৰাইজৰ উপৰি বিভিন্ন দল-সংগঠনক আশ্বস্ত কৰিবলৈ চেষ্টা কৰা অ’এনজিচিয়ে এতিয়া নিজৰ নাক কাটি হাতত লোৱাৰ দৰে অবস্থা হৈছে। এই ব্যর্থতাৰ বাবে তলে তলে প্রতিষ্ঠানটো শংকিত হোৱা বুলি চর্চা চলিছে। ৰাইজৰ ক্ষোভৰ উদ্দীৰ্ণ হোৱা আশংকাত কালিবে পৰা ভটীয়াপাৰৰ বিস্ফোৰণস্থলীত কটকটীয়া নিৰাপত্তা ব্যৱস্থা কৰে অ’এনজিচিয়ে। আজি চিআৰপিএফৰ দলো ঘটনাস্থলীত নিয়োগ কৰা হৈছে।
স্থানীয় ৰাইজক ভয়াৱহ বিপদৰ মুখলৈ ঠেলি দি আত্মগোপন কৰি থকা এছ কে পেট্ৰ’ৰ স্বতাধিকাৰ শ্রীকৃষ্ণ আগৰৱালাই ভটীয়া পাৰবাসীৰ প্রবল প্রত্যাহ্বানৰ সম্মুখীন হ’ব লাগিব বুলি ক্ষতিগ্রস্ত ৰাইজে সকীয়াই দিয়ে। ঘটনা সংঘটিত হোৱাৰ ১৫ দিনৰ পাছতো এবাৰলৈও বহু বিতর্কিত ঠিকাদাৰ আগৰৱালাই ৰাইজৰ সমস্যাৰ বুজ নল’লে। কেইদিনমান পূর্বে আন্দোলন কৰি থকা এটা জাতীয় সংগঠনৰ স’তে তেওঁৰ প্ৰতিনিধিয়ে আলোচনা কৰে যদিও ঘটনাস্থলীত কিয় অহা নাই তাকে লৈ গভীৰ ৰহস্যৰ সৃষ্টি হৈছে। ভটীয়াপাৰ অঞ্চলৰ বিশিষ্ট ৰাজহুৱা কর্মী ভোলা কাকতিয়ে প্রবঞ্চক আগৰৱালাৰ বিৰুদ্ধে অনশন কার্যসূচী গ্ৰহণ কৰিব বুলি সদবী কবে। ইয়াৰ পাছতো যদি আগৰৱালাৰ গা নৰলে তেন্তে আমৰণ অনশন কৰিব বুলিও কয়।
# আন্দোলন অব্যাহত
ভটীয়াপাৰ বাৰীচুকৰ ঘটনাক লৈ দল-সংগঠনসমূহ আজি পুনৰ প্রতিবাদমুখৰ হয়। ভটীয়াপাৰৰ ক্ষতিগ্রস্ত পৰিয়ালসমূহক ১০ৰ পৰা ২০ লাখ টকাকৈ পুঁজিপতি ঠিকাদাৰী প্রতিষ্ঠান এছ কে পেট্ৰ’ৰ মালিক কৃষ্ণ আগৰৱালাই ক্ষতিপূৰ্ণ আদায় নিদিয়া পর্যন্ত ক্ষান্ত নহও বুলি আস্ফালন ঘটাই ঘটনাৰ পাছদিনাৰ পৰা উত্তাল প্রতিবাদ সাব্যস্ত কৰা দল-সংগঠনসমূহ হঠাৎ মৌন হৈ পৰা বিষয়টোক লৈ ৰাইজৰ মাজত চর্চা চলিছিল। কিন্তু তাৰ মাজতে আজি আটাছু, কোচ ৰাজবংশী ছাত্ৰ সন্থা, অসমীয়া যুৱ মঞ্চ, জাতীয় সংগ্রামী সেনা অসম আদিৰ শিৱসাগৰ জিলা সমিতিৰ লগতে ই-ৰিক্সা সস্থাই এছ কে পেট্ৰ’ৰ নগৰৰ ফুকন নগৰ কাৰ্যালয়ৰ সন্মুখত প্রতিবাদ সাব্যস্ত কৰে।
আনহাতে, দল-সংগঠনসমূহে পৃথকে পৃথকে ভটীয়াপাৰবাসীক একাষৰীয়াকৈ থৈ বিভিন্ন পক্ষৰ লগত আলোচনাত মিলিত হোৱাৰ অভিযোগ উত্থাপন কৰিছে বাইজে। শিৱসাগৰ জিলা আৰক্ষী প্ৰশাসনৰ বিৰুদ্ধেও ভটীয়াপাল্বাসী ৰাইজে তীব্র বিষোদগাৰ প্ৰকাশ কৰিছে। বিভিন্ন দল-সংগঠনে এছ কে পেট্ৰ’ৰ স্বতাধিকাৰী কৃষ্ণ আগৰৱালাক গ্ৰেপ্তাৰৰ দাবী জনাই এজাহাৰ দাখিল কৰাৰ পাছতো আজি পর্যন্ত কোনো ব্যবস্থা গ্ৰহণ কৰাৰ সাহস নকৰা বিষয়টোক সহজভাবে ৰাইজে গ্রহণ কৰিব পৰা নাই। উল্লেখ্য যে আৰম্ভণিতে সৰৱ হৈ পৰা একাংশ দল-সংগঠনে বিগত দিনকেইটাত মৌন হোৱাক লৈ ৰাইজে প্রতিক্রিয়া প্রকাশ কবে।
# ৰাইজৰ দুৰ্দশা
৩৭৪ টাৰ অধিক ক্ষতিগ্রস্ত পৰিয়ালে বিগত তিনিদিনৰ পৰা এটুপি বিশুদ্ধ পানীৰ বাবে হাহাকাৰ কৰাই নহয়,বহু লোকে মূৰৰ বিষ, চকু আৰু ছালৰ ৰোগত আক্রান্ত হোৱাৰ অভিযোগ উত্থাপন হৈছে। ভয়ংকৰ গেছ নির্গমনৰ বাবে আমগুৰি শিক্ষাখণ্ডৰ ৰুদ্ৰসাগৰ মণ্ডলৰ ৪৩৪ নম্বৰৰ উপৰি ৰূপহীকিনাৰ প্ৰাথমিক বিদ্যালয় আৰু দুই নম্বৰ ভটীয়াপাৰ প্ৰাথমিক বিদ্যালয় দুখনত অ’এনজিচিৰ পৰামৰ্শ মতে নিয়মীয়া পাঠদান বন্ধ ৰখা হৈছে। এই মুঠ ৫৮ জন শিক্ষার্থীৰ পাঠদানৰ বাবে এতিয়াহে ব্যৱস্থা গ্রহণ কৰা হৈছে।
