Rss General Secretary Dattatreya Hosabale:
দেশৰ সংবিধানৰ প্ৰস্তাৱনাৰ পৰা ‘সমাজবাদী’ আৰু ‘ধৰ্মনিৰপেক্ষ’ অভিধা বাদ দিয়াৰ মুকলি দাবী উত্থাপন কৰিলে ৰাষ্ট্ৰীয় স্বয়ংসেৱক সংঘ (আৰএছএছ)ই। ইন্দিৰা গান্ধীৰ প্ৰধানমন্ত্ৰিত্বৰ দিনত সংবিধানৰ ৪২ সংখ্যক সংশোধনীৰ জৰিয়তে প্ৰস্তাৱনাত সংযোজিত এই অভিধা দুটা বাদ দিয়াৰ পোষকতা কৰি এক আলোচনা সভাত বক্তব্য আগবঢ়ায় আৰএছএছৰ সাধাৰণ সম্পাদক (সৰকাৰ্যবাহ) দত্তাত্রেয় হোসবলেই।
‘জৰুৰী অৱস্থাৰ ৫০ বছৰ’ শীর্ষক বিষয়ত দিল্লীত অনুষ্ঠিত এই আলোচনা সভাত আৰএছএছৰ দ্বিতীয় শীর্ষক নেতাজনে কয়, ‘জৰুৰী অৱস্থাৰ সময়ত কংগ্ৰেছে গণতন্ত্রক হত্যা কৰিছিল। তেতিয়া প্ৰস্তাৱনাত যুক্ত হোৱা এই দুটা অভিধা কিয় বাহাল ৰখা উচিত ? ১৯৭৫ৰ ২৫ জুনত তদানীন্তন প্রধানমন্ত্রী ইন্দিৰা গান্ধী নেতৃত্বাধীন কংগ্ৰেছ চৰকাৰে ঘোষণা কৰা এই জৰুৰী অৱস্থা ১৯৭৭ৰ ২১ মার্চ পর্যন্ত বাহাল থাকে।’ এই সময়ছোৱাক ভাৰতীয় গণতন্ত্ৰৰ অন্ধকাৰময় অধ্যায় আখ্যা দিয়ে হোসবলেই।
উল্লেখ্য যে দেশৰ সংবিধানৰ প্ৰস্তাৱনাৰ পৰা উক্ত অভিধা দুটা দূৰ কৰাৰ প্ৰাৰ্থনাৰে কিছু বছৰ পূৰ্বে জ্যেষ্ঠ বিজেপি নেতা ড:সুব্রমণিয়াম স্বামীসহ একাংশ উচ্চতম ন্যায়ালয়ৰ দ্বাৰস্থও হৈছিল। অৱশ্যে যোৱা বছৰ তেওঁলোকৰ আবেদন ন্যায়ালয়ে নাকচ কৰে।
