Uttar Pradesh:
নিশা হ’লেই উত্তৰ প্ৰদেশৰ বহু অঞ্চলৰ বিভিন্ন গাঁৱত ৰহস্যময় ড্র’নে বিচৰণ কৰি আতংক সৃষ্টি কৰাৰ তথ্য পোহৰলৈ আহিছে। এনে ড্র’নৰ বিচৰণৰ বাবে ৰামপুৰ, আমৰোহা, সম্ভল, মোৰাদাবাদ আৰু গাজিয়াবাদৰ গ্রামাঞ্চলসমূহৰ যুৱকসকলে নিশা পাল পাতি পহৰা দিবলৈ লৈছে।
এক সূত্ৰৰ মতে, কেইসপ্তাহমানৰ পূর্বে গাজিয়াবাদৰ কুমেৰাগাঁৱত সন্দেহজনক এক ড্র’ন উৰি থকা স্থানীয় লোকে প্রত্যক্ষ কৰাৰ পাছতে চৌদিশে ড্ৰ’নৰ আতংক বিয়পি পৰে। লগে লগে প্রশাসন আৰু আৰক্ষীক ঘটনাৰ বিষয়ে স্থানীয় লোকে অৱগত কৰে।
অৱশ্যে আৰক্ষীয়ে এই ড্ৰ’নৰ অস্তিত্ব উদ্ধাৰ কৰিব পৰা নাই। ইয়াৰ সমান্তৰালভাৱে চৌদিশে ঘটনাটোক লৈ গুজৱ আৰম্ভ হয়। ফলত এই ৰহস্যময় ড্র’নক লৈ বিভিন্ন গাঁৱত আতংক বৃদ্ধি পায়।
এই সম্পৰ্কত মোৰাদাবাদৰ আৰক্ষী অধীক্ষকে সংবাদ মাধ্যমক জনায় যে বিভিন্ন গাঁৱত নিশা ৰহস্যময় ড্ৰ’নৰ বিচৰণৰ খবৰ আৰক্ষীয়ে পাইছে। স্থানীয় বহু লোকে দাবী কৰিছে যে নিশা ৰঙা আৰু সেউজীয়া ৰঙৰ পোহৰ আকাশত দেখা যায়। ইয়াক লৈ গ্রামাঞ্চলৰ লোকসকলৰ মনত আতংক বৃদ্ধি পোৱাত বহু স্থানত যুৱকসকলে নিশা পাল পাতি পহৰা দিয়াৰ ব্যৱস্থা কৰিছে।
অৱশ্যে পাল পাতি পহৰা দিয়া এই যুৱকসকলৰ দৃষ্টিত সন্দেহজনক বস্তু ধৰা পৰা নাই। তৎসত্ত্বেও বিগত কিছু বছৰৰ পৰাই প্রতিনিশাই এই অঞ্চলৰ যুৱকসকলে পহৰাৰ ব্যৱস্থা কৰিছে। আনহাতে, আৰক্ষী সূত্ৰৰ মতে ড্ৰ’নৰ আতংক সৃষ্টিৰ স’তে এটা চক্র জড়িত এই চক্রই নিশা ৰঙা আৰু সেউজীয়া ৰঙৰ এলইডি পোহৰ আকাশত পেলাই ড্ৰ’নৰ আতংকৰ সৃষ্টি কৰিছে।
এই দুষ্কাৰ্যৰ স’তে জড়িত থকাৰ অভিযোগত আৰক্ষীয়ে দুজন লোকক গ্রেপ্তাৰো কৰিছে। আৰক্ষীৰ প্ৰাৰম্ভিক তদন্তত পোহৰলৈ অহা অনুসৰি ধৃত যুৱকদ্বয়ে নিশাৰ আন্ধাৰ নামি অহাৰ পাছতে আকাশত ৰঙা আৰু সেউজীয়া ৰঙৰ পোহৰ পেলায়। এই ৰঙা আৰু সেউজীয়া পোহৰকে ড্র’ন বুলি সন্দেহ কৰি গ্ৰামাঞ্চলৰ লোকসকল আতংকত ত্রস্তমান হয়। সূত্রই জনোৱা মতে, চক্ৰটোৰ আনসকলৰ সন্ধানত অভিযান অব্যাহত ৰখা হৈছে।
