Tamulpur:ঘটনাৰ এসপ্তাহৰ পাছতো জালত নপৰিল এজনো নৃশংস অভিযুক্ত

আৰক্ষীৰ অৱহেলাত অভিষেক দাসৰ হত্যাকাৰীসকল সাৰি যাব নেকি? সম্প্রতি ন্যায়ৰ অপেক্ষাত থকা যুৱকজনৰ পৰিয়ালৰ লগতে বহুতৰ মনত এই প্রশ্ন উদয় হৈছে। কাৰণ হত্যাকাণ্ডৰ সাত দিন পাছতো এজনো অভিযুক্ত জালত পৰা নাই।

উল্লেখ্য যে যোৱা ২০ আগষ্টত দিনৰ পোহৰতে তামুলপুৰ জিলাৰ ভৰালী চ’কত ৰাজপথৰ পৰা অভিষেকক চোঁচৰাই নি স্থানীয় এটা পৰিয়ালৰ ঘৰৰ তামোলবাৰীলৈ নি একাংশ লোকে মৰিয়াই গুৰুতৰভাৱে আহত কৰি আঁতৰি যায়। পাছত চিকিৎসালয়লৈ নিয়াৰ পথত যুৱকজনে শেষ নিশ্বাস ত্যাগ কৰে।

যুৱকজনৰ দোষ আছিল তেওঁ চলাই যোৱা গাড়ীখনে ভৰালীচ’কত এখন ই-ৰিক্সাক বচাবলৈ গৈ নিয়ন্ত্রণ হেৰুৱাই এখন দোকানৰ এটা খুঁটাত খুন্দা মৰাত খুঁটাটোৰ সামান্য ক্ষতি হয়। এই সাধাৰণ দুর্ঘটনাক লৈয়ে যুৱকজনক একাংশ লোকে দলবদ্ধভাবে আক্ৰমণ কৰি মৃত্যুমুখত পেলায়। আশ্চর্যজনক যে এই ঘটনা সম্পৰ্কত গণ প্ৰহাৰৰ বলি যুৱকজনৰ পৰিয়ালৰ লোকে আৰক্ষীক এজাহাৰ দাখিল কৰাৰ পাছতো আৰক্ষীয়ে বাতৰি লিখা পৰলৈ এজনো অভিযুক্তক গ্রেপ্তাৰ কৰিবলৈ সক্ষম হোৱা নাই।

অভিযুক্তসকলৰ প্ৰতি আৰক্ষীয়ে প্ৰদৰ্শন কৰা এনে দৰদক লৈ ক্ষোভ প্রকাশ কৰি ‘দৈনিক অগ্রদূত’ৰ আগত অভিষেকৰ শোকস্তব্ধ পৰিয়াল তথা আত্মীয়ই কয়, ‘আমি তামুলপুৰ আৰক্ষী-প্ৰশাসনক বাৰম্বাৰ জনাইছো যে অভিষেকক পৰিকল্পিতভাৱে মৰিয়াই হত্যা কৰিলে। এজাহাৰ দাখিল কৰাৰ পাছতো আৰক্ষীয়ে এজন অপৰাধীকো আটক কৰিবলৈ সক্ষম নহ’ল।’

প্রশাসনে যি তৎপৰতাৰে নৃশংস কাণ্ডটোৰ তদন্ত কৰিব লাগিছিল সেয়া হৈ নুঠাত পৰিয়াল ক্ষুব্ধ হৈছে। হত্যাকাণ্ডটোৰ তদন্তত মুখ্যমন্ত্রী ড° হিমন্ত বিশ্ব শৰ্মাৰ হস্তক্ষেপ দাবী কৰিছে পৰিয়ালে। একেদৰে আৰক্ষীৰ লেহেমীয়া তদন্তক লৈ তামুলপুৰৰ বিভিন্ন দল-সংগঠন তথা ব্যক্তি বিশেষেও এই জঘন্য অপৰাধৰ দোষীক ফাঁচি দিয়াৰো দাবী উত্থাপন কৰিছে বিভিন্ন দল-সংগঠনে।

ইপিনে, এই ভয়ংকৰ গণ প্ৰহাৰ কাণ্ডৰ এটা ভিডিঅ’ শেহতীয়াভাবে সামাজিক মাধ্যমত ভাইৰেল হৈছে। এই ভিডিঅ’ত দেখা গৈছে যে গণ প্ৰহাৰৰ বলি হৈ এখন তামোলবাৰীত অর্ধ বিবস্ত্ৰ অৱস্থাত পৰি আছে অভিষেক। মুমূর্ষু অৱস্থাত যুৱকজনে ‘মা মা, দেউতা দেউতা মোক পানী দিয়া’ বুলি আর্তনাদ কৰা শুনিবলৈ পোৱা গৈছে। এই ভিডিঅ ই অসংখ্যজনৰ অন্তৰাত্মা কঁপাই তুলিছে।

এই লোমহর্ষক ঘটনাৰ আন এটা ভিডিঅ’ও সামাজিক মাধ্যমত ভাইৰেল হৈছে। এই ভিডিঅ’ত দেখিবলৈ পোৱা গৈছে যে ঘটনাস্থলীৰ পৰা আহত কেইজনমান যুৱকক কেইজনমান আৰক্ষীয়ে যথা সময়ত এম্বুলেন্স আহি নোপোৱাত এখন ই-ৰিক্সাত তুলি চিকিৎসালয়লৈ নিব বিচৰাত একাংশ উত্তেজিত লোকে বাধা দিয়াৰ লগতে আৰক্ষীৰ সন্মুখতে ই ৰিক্সাচালক জনক প্ৰহাৰ কৰে। তৎসত্ত্বেও সমগ্ৰ ঘটনাৰ তদন্তত আৰক্ষীয়ে ৰহস্যজনক স্থিতি লৈ হেমাহি কৰাৰ অভিযোগ উত্থাপন হৈছে।

উল্লেখ্য যে যোৱা ২০ আগষ্টত তামুলপুৰৰ কচুবাৰীৰ অভিষেক দাসে কেইজনমান বন্ধুৰ স’তে নিজা গাড়ীৰে ফুৰিবলৈ গৈ উভতি অহাৰ পথত ভৰালীচ’কত দলবদ্ধ আক্ৰমণৰ বলি হয়। সাধাৰণ দুর্ঘটনাৰ আঁত ধৰিয়ে একাংশ লোকে যুৱকজনক ভয়ংকৰ আক্ৰমণ কৰে। তদুপৰি তেওঁৰ বন্ধুকেইজনকো উন্মত্ত লোকে প্ৰহাৰ কৰি আহত কৰে।