Durga Puja 2025:✒️এইবাৰৰ পশ্চিমবংগৰ শাৰদীয় দুর্গোৎসৱৰ অর্থনীতিয়ে ৬৫ হেজাৰ কোটি টকাক স্পর্শ কৰিলে। অর্থাৎ দুর্গতিনাশিনীৰ পূজাৰ কেইদিনত ৰাজ্যখনত এই বুজন অংকৰ ধনৰ ব্যৱসায় সম্পন্ন হয়। সমগ্র ৰাজ্যখনৰ ভিতৰত কলকাতাত সর্বাধিক অংকৰ ব্যৱসায়-বাণিজ্য আছিল। দুর্গা পূজাৰ কেইদিনত হোৱা ব্যবসায়-বাণিজ্যৰ ৬৫ৰ পৰা ৭০ শতাংশই কলকাতাৰ আছিল। এই সম্পর্কত অর্থনীতিবিদ অজিতাভ ৰায়চৌধুৰীয়ে কয় যে যোৱা বছৰৰ তুলনাত এইবাৰ পশ্চিমবংগত শাৰদীয় উৎসৱৰ সময়ত ব্যবসায়িক লেনদেন কমেও আঠৰ পৰা ১০ শতাংশ বৃদ্ধি পায়।অর্থাৎ শাৰদীয় দুর্গোৎসৱে সামগ্রিকভাৱে ৰাজ্যখনৰ অর্থনীতিলৈ বৰঙণি আগবঢ়ায়।
উল্লেখ্য যে ২০১৯৩ ব্রিটিছ কাউন্সিলে সম্পন্ন কৰা এক অধ্যয়নত দেখা যায় যে কলকাতাৰ দুর্গা পূজাৰ অর্থনীতি ৩৩ হেজাৰ কোটি টকাৰ। যোৱা বছৰ পশ্চিমবংগত পূজাৰ সময়ৰ ব্যৱসায় ৫৫ হেজাৰ কোটিৰ পৰা ৫৭ হেজাৰ কোটি টকা আছিল। ব্যবসায় জগতৰ অভ্যন্তৰৰ হিচাপ মতে ৰাজ্যখনত এইবাৰ দুর্গোৎসৱৰ সময়ত ব্যৱসায়-বাণিজ্য ৭০ হেজাৰ কোটি টকাৰ ঘৰক অতিক্ৰম কৰে।
এই ক্ষেত্ৰত জিএছটি হ্রাসেও ইতিবাচক প্রভাৱ পেলায় বুলি ধাৰণা কৰা হৈছে। লক্ষ্যণীয়ভাবে জিএছটি পৰিষদে দুর্গোৎসৱৰ আগে আগে জিএছটি হ্রাস পাব বুলি ঘোষণা কৰাত ব্যৱসায়-বাণিজ্য কিছু মন্দা হয়। কাৰণ বহু গ্রাহকে প্রয়োজনীয় সামগ্রী ক্রয়ৰ বাবে দুর্গোৎসৱৰ সময়লৈ অপেক্ষা কবে। সেই অনুসৰি জিএছটি হাসৰ পাছত বহুতে প্রয়োজনীয় সামগ্রী কিনিবলৈ বজাৰত উথপথপ্ লগায়। উল্লেখ্য যে এইবাৰ কলকাতাত ২৫শ দুর্গা পূজা সমিতিয়ে পূজা আয়োজন কৰে। এই পূজা সমিতিসমূহে প্রতিমা, মণ্ডপ সজাই পৰাই তোলা, পোহৰ আৰু ধর্মীয় অনুষ্ঠানৰ বাবদ প্রায় দুশ কোটি টকা ব্যয় কৰে।
এই কথা সদৰী কৰে ফ’ৰাম ফৰ দুর্গোৎসৱৰ প্ৰতিষ্ঠাপক সদস্য পার্থ ঘোষে। গতিকে সমগ্র ৰাজ্যখনত প্রতিমা, মণ্ডপ সজাই পৰাই তোলা আদিত কমেও ৪৫০ কোটি টকা ব্যয় হয়। এনেদৰে বিপুল অংকৰ ধন ব্যয় হোৱাত প্ৰতিমাৰ খনিকৰ, কাৰু শিল্পী, শ্রমিক আৰু ক্ষুদ্র ব্যৱসায়ীসকল আর্থিকভাবে প্ৰচুৰ লাভান্বিত হয়। একেদৰে হোটেল, ৰোস্তোৰাঁসমূহেও বৃহৎ অংকৰ ধন আয় কৰে। পূজাৰ কেইদিনত বিভিন্ন ৰেস্তোৰাঁত গ্রাহক ২০ৰ পৰা ২৫ শতাংশ পর্যন্ত বৃদ্ধি পায়। এই সম্পর্কত এটা ব্যৱসায় সংস্থাৰ স’তে জড়িত বিষয়ববীয়াই জনায় যে পূজাৰ কেইদিনত কলকাতা মহানগৰৰ ৰেস্তোৰাঁসমূহৰে আয় ১২শ কোটি টকাৰ পৰা ১৫শ কোটি টকা হয়।
কাৰণ বিভিন্ন ৰেস্তোৰাঁত অভিলেখ সংখ্যক গ্রাহকে ভিৰ কৰে। একেদৰে কলকাতাৰ আঠটা বৃহৎ শ্বপিংমলে পূজাৰ কেইদিনত সামগ্রিকভাবে নশ কোটি টকাৰ ব্যৱসায় কৰে। এই সম্পর্কত কলকাতাৰ দুটা মল পৰিচালনা কৰা অম্বুজা নিঅ’চিয়াৰ ৰমেশ পাণ্ডেই কয় যে যোবা ছেপ্টেম্বৰৰ অন্তিমৰ পৰা বয়-বস্তুব চাহিদা বৃদ্ধি পায়। ফলত পূজাৰকেইদিনত ব্যৱসায়-বাণিজ্যই বিশেষ স্থান দখল কৰে। বিগত কেইদিনত এক্র’পলিচ মলত পদার্পণ কৰা লোকৰ সংখ্যা যোৱা বছৰৰ পূজাৰ কেইদিনতকৈ ১০ৰ পৰা ১৫ শতাংশ বৃদ্ধি পায়। ইয়াৰ অনুপাতত বিক্রীও বৃদ্ধি পায়।
অৱশ্যে পূজাৰ কেইদিনত পৰম্পৰাৰ বজাৰসমূহৰ আয় ২০ শতাংশ হ্রাস পায়। ইয়াৰ কাৰণ হৈছে পূজাৰ আগৰ পৰা হোৱা নেবেনেপেৰা বৰষুণ। আনহাতে, কনফেডাৰেছন অৱ ৰেষ্ট বেংগল ট্রেড এছ’চিয়েছনছৰ মতে গৰিয়াহাট, হাটিবাগান আৰু নিউ মার্কেটত পূজাৰ কেইদিনত সামগ্রিকভাবে আঠশ কোটি টকাৰ সা-সামগ্রী বিক্রী হয়।
