Onions:✒️ইংৰাজী নৱবৰ্ষ আৰু মাঘ বিহুৰ প্ৰাকক্ষণত পিঁয়াজৰ মূল্যই গ্রাহকক কন্দুৱাবলৈ সাজু হোৱাৰ ইংগিত স্পষ্ট হৈছে। দেশৰ ৰপ্তানি নীতিৰ সুযোগ গ্রহণ কৰি ব্যৱসায়ীয়ে বজাৰত পিঁয়াজৰ মূল্য ক্রমে বৃদ্ধি কৰিছে। ফলস্বৰূপে মাত্ৰ এসপ্তাহৰ ভিতৰতে প্রতি কুইণ্টল পিঁয়াজৰ পাইকাৰী মূল্য ছয়শ টকা পর্যন্ত বৃদ্ধি হৈছে। ইয়াৰ লগে লগে খুচুৰা বজাৰতো উর্ধ্বমুখী হৈছে মূল্য।
অসমত খুচুৰা বজাৰত প্ৰতি কিলোগ্রাম পিঁয়াজৰ মূল্য ৩০ টকাৰ পৰা বজাৰভেদে ৪৬ টকা পর্যন্ত হৈছে। এই মূল্য আগন্তুক দিনত অধিক বৃদ্ধি হোৱাৰ সম্ভাৱনা সদৰী কৰে কে’বাজনো বৃহৎ ব্যৱসায়ীয়ে। বজাৰৰ এই সময়ছোৱাত পিঁয়াজৰ যোগান সাধাৰণতে কম হয়। পুৰণিবোৰ শেষ হৈ নতুনকৈ উৎপাদিত পিঁয়াজ বজাৰলৈ আহিবলৈ ধৰে।
গতিকে চাহিদা আৰু যোগানৰ মাজত সৃষ্টি হোৱা কিছু তাৰতম্যৰ বাবে মূল্য সামান্য পৰিমাণে বৃদ্ধি হয়। তাৰ ওপৰঞ্চি অতিৰিক্ত কাৰকে সময়ে সময়ে এই মূল্য বৃদ্ধিত প্রভাৱ পেলাই আহিছে। ইয়াৰ ভিতৰৰ মূল কাৰণটো হ’ল দুষ্টচক্রই বজাৰত সৃষ্টি কৰা কৃত্রিম নাটনি। তাৰেই প্ৰভাৱ এইবাৰো ইতিমধ্যে বজাৰত পৰিছে।
উল্লেখ্য যে ভাৰতৰ বজাৰত নাছিকত উৎপাদিত পিঁয়াজৰ চাহিদাই সর্বাধিক। শেহতীয়াকৈ বাংলাদেশে ভাৰতৰ পৰা যথেষ্ট পৰিমাণৰ পিঁয়াজ আমদানিৰ সিদ্ধান্ত গ্রহণ কৰে। তথ্য অনুসৰি, বাংলাদেশ চৰকাৰে পূৰ্বে ভাৰতৰ পৰা পিঁয়াজ আমদানি কৰিবলৈ দৈনিক ৫০ খন অনুজ্ঞাপত্রহে দিছিল।
শেহতীয়াকৈ অনুজ্ঞাপত্ৰৰ সংখ্যা দৈনিক দুশখনলৈ বৃদ্ধি কৰিছে। বজাৰত সুস্থিৰতা আনিবলৈ বাংলাদেশ চৰকাৰে অনুজ্ঞাপত্ৰৰ সংখ্যা পূৰ্বৰ তুলনাত তিনি গুণলৈ বৃদ্ধি কৰাত ভাৰতৰ পৰা যথেষ্ট পৰিমাণৰ পিঁয়াজ প্ৰেৰণ কৰা হৈছে। উন্নত মানৰ নাছিকৰ পিঁয়াজৰ ৰপ্তানিৰ পৰিমাণ ইয়াৰ লগে লগে বৃদ্ধি হৈছে।
বাংলাদেশে আমদানি বৃদ্ধি কৰাৰ ফলত ভাৰতৰ বজাৰত ইয়াৰ প্ৰভাৱ কি ধৰণৰ হ’ব পাৰে, তাৰ প্ৰতি ভাৰত চৰকাৰে গুৰুত্ব প্রদান নকৰাৰ অভিযোগ উঠিছে। অধিক বৰপ্তানিৰ ফলত দেশৰ বজাৰত পৰিবলগীয়া বিরূপ প্রভাৱক উপেক্ষা কৰাৰ পৰিণতিতে ভাৰতত হঠাৎ মূল্য বৃদ্ধি হৈছে বুলি কোৱা হৈছে।
এনে পৰিস্থিতিৰ সুযোগ ল’বলৈ সদায় তৎপৰ হৈ আহিছে ক’লা ব্যৱসায়ী চক্র। সেই চক্ৰৰ প্ৰভাৱতে অসমৰ বজাৰত হোৰা-হোৰে বাঢ়িছে পিঁয়াজৰ মূল্য।
অসমৰ বজাৰত আজি প্রতি কিলোগ্রাম পিয়াজৰ মূল্য ৪৬ টকালৈ বৃদ্ধি হয়। নাছিকৰ উন্নত মানৰ পিঁয়াজৰ এনে মূল্য বৃদ্ধিৰ পৰিপ্ৰেক্ষিতত একাংশ ব্যৱসায়ীয়ে দেশৰ কে’বাখনো ৰাজ্যত উৎপাদিত তুলনামূলকভারে নিম্নমানৰ পিঁয়াজ আমদানি কৰিবলৈ বাধ্য হয়। মান নিম্ন হোৱাৰ বাবে সেইবোৰৰ মূল্যও নাছিকৰ তুলনাত কম। ইয়াৰ ফলত আজিৰ দিনটোত বজাৰভেদে পিঁয়াজৰ পাইকাৰী মূল্য ভিন ভিন হয়। আজিৰ দিনটোত ৰাজ্যৰ কেইখনমান বজাৰত প্ৰতি কিলোগ্রাম পিঁয়াজৰ পাইকাৰী মূল্য হ’ল ক্রমে- গুৱাহাটীৰ পামহীত ৪৬ টকা, হাইলাকান্দিত ২৪ টকা, হাউলীত ৪৫ টকা, শিৱসাগৰত ২৪ টকা, গৌৰীপুৰত ২৯ টকা। লক্ষ্যণীয়ভাৱে শ্ৰীৰামপুৰত আজি প্রতি কিলোগ্রাম পিঁয়াজৰ পাইকাৰী মূল্য ১৬.৫০ টকা।
শ্ৰীৰামপুৰৰ পাইকাৰী বজাৰৰ এনে মূল্যৰ বিপৰীতে অন্যান্য বজাৰত দাম বৃদ্ধিৰ কাৰণ সহজে অনুমেয় বুলি নাম প্রকাশত অনিচ্ছুক পিয়াজৰ কে’বাজনো বৃহৎ ব্যৱসায়ীয়ে সদৰী কৰে। সেই অনুসৰি, সদায় পৰিস্থিতিৰ সুযোগ লোৱাৰ বাবে খাপ পিটি ৰোৱা চক্ৰই দেশৰ বজাৰত পিঁয়াজৰ যোগান হ্ৰাসৰ লগে লগে মূল্য নিজে নিজে বৃদ্ধি কৰি লৈছে। ইয়াৰ ওপৰঞ্চি আগন্তুক দিনত অধিক মুনাফা আদায়ৰ লক্ষ্যৰে একাংশ বৃহৎ ব্যৱসায়ীয়ে পিয়াজ মজুতকৰণৰ বাবেও তৎপৰ হৈছে।
এইবোৰৰ মাজতে ট্রাকযোগে আমদানি কৰা পিঁয়াজৰ বাহনৰ পৰাও ছিণ্ডিকেট চক্রই মুনাফা লুটি আহিছে। আনকি বেলবে য়ার্ডতো এনে চক্ৰৰ তৎপৰতা দীর্ঘদিনৰ পৰা চলি আহিছে। এই সকলোৰে পৰিণতিত অসমত ঊর্ধ্বমুখী হৈছে পিঁয়াজৰ মূল্য।
