Maoist:✒️মাওবাদীৰ ওপৰত প্ৰচণ্ড আঘাত হানিবলৈ সক্ষম হৈছে নিৰাপত্তা বাহিনী। বিগত ১০ বছৰত নিৰাপত্তা বাহিনীৰ হাতত চিপিআই (মাওবাদী) ব সহস্রাধিক নেতা-সদস্য নিহত হয়। তদুপৰি এই ১০ বছৰত ১৬,৩৩৬ জন মাওবাদী জালত পৰে আৰু ৯,৫৮৮ জনে আত্মসমর্পণ কৰে। সংসদৰ এইবাৰৰ শীতকালীন অধিবেশনত কেন্দ্রীয় গৃহ ৰাজ্যমন্ত্রী নিত্যানন্দ ৰায়ে এই তথ্য সদৰী কৰে।
মন্ত্ৰীজনে সদৰী কৰা অনুসৰি ২০১৫ৰ পৰা চলিত বর্ষলৈ নিৰাপত্তা বাহিনীৰ যৌথ অভিযানত ১,৮৬১ জন মাওবাদী নেতা-কর্মীয়ে প্রাণ হেৰুৱায়। নৰেন্দ্ৰ মোদী চৰকাৰে অহা বছৰৰ ৩১ মাৰ্চৰ ভিতৰত দেশত সম্পূর্ণরূপে মাওবাদ নিঃশেষৰ লক্ষ্য লৈছে। গতিকে বিগত দুবছৰত মাওবাদী বিৰোধী অভিযান অধিক তীব্ৰতৰ হৈছে। এই ১০ বছৰৰ ভিতৰত চলিত বৰ্ষত মাওবাদী বিৰোধী অভিযানত অধিক সফলতা অর্জন কৰে নিৰাপত্তা বাহিনীয়ে। কেন্দ্ৰৰ তথ্য অনুসৰি চলিত বৰ্ষত নিৰাপত্তা বাহিনীৰ হাতত ৩৩৫ জন মাওবাদী নেতা-সদস্য নিহত হয়।
তদুপৰি নিষিদ্ধ সংগঠনটোৰ ২,১৬৭ জনে প্রশাসনৰ ওচৰত আত্মসমর্পণ কৰে। মাওবাদী বিৰোধী অভিযানত লাভ। কৰা সফলতাৰ ক্ষেত্ৰত এয়া সর্বকালৰ অভিলেখ। উল্লেখ্য যে চলিত বর্ষতে মাওবাদীয়ে বহুকেইজন জ্যেষ্ঠ নেতাক হেৰুৱায়। এইসকলৰ অন্যতম হ’ল নিষিদ্ধ সংগঠনটোৰ সাধাৰণ সম্পাদক নাম্বালা কেশৱ ৰাও ওৰফে বাসৱৰাজু ওৰফে গগন্না, পলিটব্যুৰ’ৰ সদস্য ৰামচন্দ্ৰ ৰেড্ডি ওৰফে চলপতি, তেওঁৰ পত্নী ৰবি ভেংকাটা ওৰফে লক্ষ্মী চৈতন্য ওৰফে অৰুণা, কেন্দ্রীয় সমিতিৰ সদস্য নৰসিংহ ছলম ওৰফে সুধাকৰ, টেক শংকৰ, পিএলজিএৰ মুৰব্বী মাধবী হিদমা আদি। উল্লেখ্য যে কেন্দ্রীয় গৃহমন্ত্রী অমিত শ্বাহৰ নিৰ্দেশ অনুসৰি চিপিআই (মাওবাদী) অহা ৩১ মাৰ্চৰ ভিতৰত সম্পূৰ্ণৰূপে নির্মূল কৰাৰ উদ্দেশ্যে চত্তিছগড়, অন্ধ্র প্রদেশ, ওড়িছা আদিত নিৰাপত্তা বাহিনীৰ যৌথ অভিযান অব্যাহত আছে।
এই অভিযানৰ সময়ত সংগঠনটোৰ সশস্ত্র শাখা পিপ’লছ লিবাৰেছন গেৰিলা আর্মী (পিএলজিএ) ৰ বহুসংখ্যক নেতা-কর্মীও নিহত হৈছে। সংসদত গৃহ ৰাজ্যমন্ত্ৰী ৰায়ে লগতে প্ৰকাশ কৰা অনুসৰি বৰ্তমানে মাওবাদীৰ অতি উপদ্রুত তিনিখন জিলা হৈছে চত্তিছগড়ৰ বাষ্টাৰ সংমণ্ডলৰ তিনিখন জিলা ছুকমা, বিজাপুৰ আৰু নাৰায়ণপুৰ। আনহাতে মুঠ মাওবাদী প্রভাবিত জিলাৰ সংখ্যা হৈছে ১১ খন।
এই সম্পর্কত তেওঁ আৰু কয়, ‘সশস্ত্র মাওবাদী উপদ্রুত জিলাৰ সংখ্যা দেশত ২০১৮ৰ এপ্ৰিলত ১২৬ খন আছিল। ইয়াৰ সংখ্যা ২০২১ৰ জুলাইত ৯০ খনলৈ হ্রাস পায়। এই হ্রাস অব্যাহত থাকি ২০২৪ৰ এপ্ৰিলত ৭০ খন হয় আৰু চলিত বৰ্ষৰ এপ্ৰিলত ৩৮ খনলৈ হ্রাস পায়। অৱশেষত চলিত বৰ্ষৰ অক্টোবৰত ১১ খনলৈ হ্রাস পায়।’
তৎসত্ত্বেও মুঠ ২৭ খন জিলাত নিৰাপত্তা বাহিনীয়ে দৃষ্টি ৰাখিছে বুলি মন্ত্রীজনে সদৰী কৰে। তেওঁ লগতে দোহাৰে যে অহা বছৰৰ ৩১ মাৰ্চৰ ভিতৰত দেশত মাওবাদ নিঃশেষ কৰা হ’ব। তদুপৰি তেওঁ লগতে কয় যে ২০২৪ৰ পৰা দেশত মাওবাদীৰ আক্ৰমণৰ ঘটনা ৮১ শতাংশ হ্রাস হৈছে।
আনহাতে, ২০০৪ৰ পৰা ২০১৪ৰ মে’ পর্যন্ত মাওবাদীৰ আক্রমণত ৬,৫০৮ জনে প্রাণ হেৰুৱায়। ইয়াৰে ৪,৬৮৪ জন হৈছে সাধাৰণ লোক। ১,৮২৪ জন নিৰাপত্তা বাহিনীৰ লোক। ইয়াৰ পাছৰ দশকত অর্থাৎ ২০১৫ৰ পৰা চলিত বর্ষলৈ মাওবাদীৰ আক্ৰমণত মৃতৰ সংখ্যা ৮১ শতাংশ হ্রাস পায়। এই ১০ টা বছৰত নিষিদ্ধ সংগঠনটোৰ আক্ৰমণত ১,৮৬৮ জন লোকৰ মৃত্যু হয়। ইয়াৰে ১,৪০৪ জন সাধাৰণ লোক আৰু ৪৬৪ জন নিৰাপত্তা বাহিনীৰ লোক।
আনহাতে, চলিত বৰ্ষৰ মে’ৰ পৰা নৱেম্বৰৰ সময়ছোৱাত মাওবাদীৰ আক্ৰমণত ৪৪ জনৰ মৃত্যু হয়। আনহাতে, কেন্দ্রীয় গৃহ মন্ত্রণালয়ৰ তথ্য অনুসৰি ২০১৪ৰ মাৰ্চৰ পৰা চলিত বৰ্ষৰ এক ডিচেম্বৰলৈ নিৰাপত্তা বাহিনীয়ে মাওবাদীৰ বিৰুদ্ধে ২৭,৭৬৫ টা অভিযান চলায়।