মণিপুৰত সংঘটিত ভয়ংকৰ বোমা বিস্ফোৰণৰ পাছতে ৰাজ্যজুৰি উত্তেজনা তীব্ৰ হৈ উঠিছে। ঘটনাটোৰ পৰিপ্ৰেক্ষিতত আইন-শৃংখলা পৰিস্থিতি নিয়ন্ত্ৰণত ৰাখিবলৈ ৰাজ্য চৰকাৰে গুৰুত্বপূৰ্ণ পদক্ষেপ গ্ৰহণ কৰিছে।
প্ৰাপ্ত তথ্য অনুসৰি, বিষ্ণুপুৰ জিলাত সংঘটিত এই বিস্ফোৰণত দুজন শিশুৰ মৃত্যু হোৱা ঘটনাই তীব্ৰ ক্ষোভৰ সৃষ্টি কৰে। এই ঘটনাৰ পিছতেই ৰাজ্যৰ বিভিন্ন এলেকাত প্ৰতিবাদ আৰম্ভ হয় আৰু পৰিস্থিতি ক্রমে উত্তপ্ত হৈ উঠে।
এই পৰিস্থিতিত মণিপুৰ চৰকাৰে ইম্ফল পশ্চিম, ইম্ফল পূব, থৌবাল, কাকচিং আৰু বিষ্ণুপুৰ জিলাত অস্থায়ীভাৱে ইণ্টাৰনেট আৰু মোবাইল ডাটা সেৱা বন্ধ ঘোষণা কৰিছে।
চৰকাৰৰ মতে, ভুৱা খবৰ আৰু উত্তেজনা সৃষ্টিকাৰী তথ্যৰ প্ৰচাৰ ৰোধ কৰাৰ লক্ষ্যৰে এই সিদ্ধান্ত গ্ৰহণ কৰা হৈছে।
ইয়াৰ লগতে ঘটনাটোৰ গুৰুত্ব বিবেচনা কৰি তদন্তটো National Investigation Agency (NIA)-লৈ হস্তান্তৰ কৰাৰ সিদ্ধান্ত লোৱা হৈছে। এই পদক্ষেপে ঘটনাটোৰ গভীৰ তদন্ত আৰু দোষীসকলক শীঘ্ৰে চিনাক্ত কৰাত সহায় কৰিব বুলি আশা কৰা হৈছে।
সূত্ৰে জনোৱা মতে, বিস্ফোৰণটো নিশা সংঘটিত হৈছিল, য’ত এখন ঘৰত বোমা নিক্ষেপ কৰাৰ ফলত শিশুসকলৰ মৃত্যু হয় আৰু পৰিয়ালৰ আন সদস্য আহত হয়। এই ঘটনাৰ পিছতেই স্থানীয় লোকসকলে ৰাস্তাত ওলাই প্ৰতিবাদ সাব্যস্ত কৰে আৰু কেই
বাটাও স্থানত অগ্নিসংযোগ আৰু ভাঙচুৰৰ ঘটনাও সংঘটিত হয়।
এই পৰিস্থিতি নিয়ন্ত্ৰণ কৰিবলৈ আৰক্ষী আৰু নিৰাপত্তা বাহিনী মোতায়েন কৰা হৈছে। একে সময়তে ৰাজ্যৰ মুখ্যমন্ত্ৰীয়ে ঘটনাটোক “অমানৱীয়” বুলি অভিহিত কৰি দোষীসকলক কঠোৰ শাস্তি দিয়াৰ আশ্বাস প্ৰদান কৰিছে।
বৰ্তমান পৰিস্থিতি স্পৰ্শকাতৰ হৈ থকাৰ বাবে প্ৰশাসনে জনসাধাৰণক শান্তি বজাই ৰাখিবলৈ আহ্বান জনাইছে।