Onion prices rise:ৰাষ্ট্ৰীয় গড় পৰিমাণতকৈ অসমত ২০ টকাৰো অধিক হৈছে পিঁয়াজৰ খুচুৰা মূল্য
অসাধু চক্ৰৰ দৌৰাত্ম্যুত ৰাজ্যত মূল্যবৃদ্ধিৰ তাণ্ডৱ
দৈনিক অগ্ৰদূত ডিজিটেল ডেস্ক:বজাৰত চেনিৰ পাছত এইবাৰ পিঁয়াজৰ মূল্য অভাৱনীয় হাৰত বৃদ্ধি – পাইছে। সাধাৰণ গ্ৰাহকৰ মূৰত মাধমাৰ শোধাইমাত্র ১০ দিনৰ ভিতৰত পিঁয়াজৰ খুচুৰা মূল্য বজাৰত ৫০ শতাংশলৈ বৃদ্ধি হৈছে। সাধাৰণ জনতাৰ মূৰত মাধমাৰ শোধোৱা এই মূল্যবৃদ্ধিৰ ধাৰাবাহিকতা দীঘলীয়া সময়লৈ অব্যাহত থাকিব বুলি নিশ্চিত কৰিছে পিঁয়াজৰ বৃহৎ ব্যৱসায়ী গোষ্ঠীয়ে। ৰাজ্য চৰকাৰৰ বজাৰ নিয়ন্ত্ৰণ ব্যৱস্থাৰ নিশকতীয়া ৰূপ, যোগান বিভাগ আৰু অসাধু ব্যৱসায়ীৰ গোপন মিতিৰালিক’লা বেপাৰীৰ দৌৰাত্ম্য আদিৰ পৰিণামস্বৰূপে অসমত মূল্যবৃদ্ধি সদায়ে দেশৰ অন্যান্য ৰাজ্যৰ তুলনাত কে’বাগুণ অধিক হৈ আহিছে।
পিঁয়াজৰ সাম্প্ৰতিক বজাৰ মূল্যও এনে কাৰণতে অসমত অধিক হৈছে। গুৰুতৰ বিষয়টো হ’ল যে অসমৰ খুচুৰা বজাৰত প্ৰতি কিলোগ্রাম পিঁয়াজৰ মূল্য ৰাষ্ট্ৰীয় গড় মূল্যৰ তুলনাত ২০ টকাৰো অধিক। আজিৰ দিনটোত প্রতি কিলোগ্রাম পিঁয়াজৰ ৰাষ্ট্ৰীয় গড় খুচুৰা মূল্য হ’ল ৪৩.৫৩ টকা। আনহাতে, পাইকাৰী এই পৰিমাণ ৩৫.৫৮ টকা। ইয়াৰ বিপৰীতে আজিৰ দিনটোত অসমত পিঁয়াজৰ খুচুৰা মূল্য প্রতি কিলোগ্রামত বজাৰভেদে ৬৫ টকা পর্যন্ত বৃদ্ধি হৈছে। মহাৰাষ্ট্ৰৰ নাছিকৰ পিঁয়াজৰ চাহিদা বজাৰত সৰ্বাধিক। নাছিকৰ টিকটিকীয়া ৰঙা পিঁয়াজৰ চাহিদা অধিক। নাছিকৰ পিঁয়াজৰে এতিয়া বজাৰত সৰ্বাধিক মূল্য। তদুপৰি দেশৰ কে’বাখনো ৰাজ্যত পিঁয়াজ উৎপাদন হয়; কিন্তু নাছিকৰ পিঁয়াজৰ চাহিদাই সর্বাধিক।
অসমত পিঁয়াজৰ বৃহৎ পাইকাৰী ব্যৱসায়ী আনন্দ জৈনে কয় যে নাছিকৰ বাদেও আন যিবোৰ স্থানৰ পৰা পিঁয়াজৰ আমদানি অসমলৈ কৰা হয়, সেইবোৰৰো মূল্য বৃদ্ধি হৈছে। ক’বলৈ গ’লে এতিয়া খুচুৰা হিচাপত কোনো এবিধ পিঁয়াজৰ মূল্যই প্রতি কিলোগ্রামত ৬০ টকাৰ তলত নাই। এই মূল্যবৃদ্ধিৰ গতি অক্টোবৰৰ তৃতীয় সপ্তাহলৈ অব্যাহত থকাটো প্রায় নিশ্চিত বুলি ব্যৱসায়ীজনে সদৰী কৰে। ইপিনে, অসম চৰকাৰৰ খাদ্য আৰু অসামৰিক যোগান বিভাগৰ সূত্রই ‘দৈনিক অগ্রদূত’ক কয় যে পিঁয়াজৰ বজাৰ সম্প্ৰতি নিয়ন্ত্ৰণত থকা নাই।
কাৰণ চাহিদাৰ বিপৰীতে যোগান হ্রাস হৈছে। এই হ্ৰাসৰ কাৰণ উৎপাদনত ব্যাঘাত জন্মা বুলি বিষয়াজনে উল্লেখ কৰে। তাৰ ওপৰঞ্চি যোগান হ্ৰাসৰ সুযোগ একাংশ ব্যৱসায়ীয়ে গ্ৰহণ কৰাটো নুই কৰিব নোৱাৰি বুলি মন্তব্য কৰি সূত্ৰটোৱে দায়সৰাৰ চেষ্টা চলায়। কেন্দ্ৰীয় চৰকাৰে ফলপ্রসূ কোনো ব্যবস্থা নল’লে পিঁয়াজৰ মূল্যই এইবাৰ গুৰুতৰ ৰূপ ধাৰণ কৰাটো নিশ্চিত বুলি লগতে সূত্ৰটোৱে উল্লেখ কৰে।
গুৰুতৰ বিষয়টো হ’ল যে পিঁয়াজৰ মূল্য অসমত ৰাষ্ট্ৰীয় গড় মূল্যৰ তুলনাত অত্যধিক হৈছে কিদৰে? যোগান বিভাগৰ সূত্ৰটোৱে উল্লেখ কৰে যে অসমৰ ক্ষেত্ৰত পৰিবহণ ব্যয় বৃদ্ধি হোৱাটো এটা কাৰণ। সেই বুলি ন্যূনতম ২০ টকালৈকে পৰিবহণ ব্যয় হঠাৎ বৃদ্ধি হোৱাৰ আঁৰৰ ৰহস্য কি? এই প্রশ্নৰ সঠিক উত্তৰ দিয়াৰ পৰা বিৰত থাকে সূত্ৰটোৱে।
এনেবোৰ ঘটনাই যোগান বিভাগ আৰু ক’লা ব্যৱসায়ী চক্ৰৰ অসাধু বুজাবুজি অধিক স্পষ্ট কৰি তোলে। ফলস্বৰূপে অসমত সদায়ে নিয়ন্ত্রণহীন বজাৰ ব্যৱস্থা চলি আহিছে। দৰাচলতে বজাৰৰ নিয়ন্ত্রণ ক’লা বেপাৰীৰ হাততহে। ইয়াৰ পৰিণামস্বৰূপে সাধাৰণ জনতাৰ বিপর্যয় কে’বাগুণে বৃদ্ধি পাইছে।