18 Ft- Long giant Python Rescued in Tezpur:
দেশৰ ভিতৰতে এইপৰ্যন্ত উদ্ধাৰ হোৱা দ্বিতীয় সৰ্বোচ্চ বৃহৎ আকাৰৰ অজগৰ সাপডাল উদ্ধাৰ হৈছে তেজপুৰত৷যোৱা মংগলবাৰে নিশা এই বৃহৎ আকাৰৰ জগৰডাল উদ্ধাৰ কৰা হয়৷উল্লেখযোগ্য যে,তেজপুৰৰ তল গেৰেকীৰ পৰা উদ্ধাৰ হোৱা এই অজগৰডালৰ দৈৰ্ঘ ১৮ফুট বুলি নিশ্চিত কৰিছে বনবিভাগে৷অৱশ্যে অজগৰডালৰ ওজন কিমান সেয়া জানিব পৰা হোৱা নাই ৷
ইয়াৰ পূৰ্বে ২০২৫ত উত্তৰাখণ্ডতহে ইমান বিশাল আকৃতিৰ দুডাল অজগৰ উদ্ধাৰ কৰা হৈছিল৷ইয়াৰে ভিতৰত এডাল অজগৰ উত্তৰাখণ্ডৰ কাশীপুৰত প্ৰায় ২০ফুট দৈৰ্ঘৰ আৰু ৰামনগৰত ১৮ফুট দৈৰ্ঘৰ অজগৰ উদ্ধাৰ কৰা হৈছিল৷আনহাতে অসমত এইপৰ্যন্ত তেজপুৰত উদ্ধাৰ হোৱা অজগৰডালেই সৰ্বাধিক দীঘল অজগৰ ৷
প্ৰণিধানযোগ্য যে,তেজপুৰৰ তল গেৰেকী অঞ্চলত মংগলবাৰে নিশা এই ১৮ফুট দৈৰ্ঘৰ বিশাল অজগৰডাল উদ্ধাৰ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে৷উল্লেখযোগ্য যে,এসময়ত জলাশয়,সেউজীয়া মুকলি অঞ্চলৰে আগুৰা তথ কেবাটাও টিলাৰে সমৃদ্ধ তল গেৰেকী অঞ্চল অজগৰৰ অন্যতম প্ৰাকৃতিক আৱাস ক্ষেত্ৰ হিচাপেই পৰিচিত৷সেই অঞ্চলতে নিশা প্ৰায় সাত বজাত এডাল বৃহৎ অজগৰ সাপ স্হানীয় লোকে দেখিবলৈ পায় আৰু সেইবিষয়ে বনবিভাগক জনোৱা হয়৷কিন্তু বনবিভাগে এইক্ষেত্ৰত কোনো ব্যৱস্থা গ্ৰহণ নকৰাত অজগৰটোৰ উপস্থিতিৰ বিষয়ে সৰ্পবান্ধৱ সৌৰভ বৰকটকীক জনোৱা হয় আৰু বৰকটকীয়ে সৰ্পবন্ধু ৰাজবল্লভ শৰ্মা,কনিষ্ঠ সৰ্পউদ্ধৰকাৰী তথা বৰকটকীৰ পুত্ৰ ৰাজ সৌৰভ বৰকটকী সহ সেই স্হানত উপস্থিত হৈ বিশালকায় অজগৰটো নিৰাপদে উদ্ধাৰ কৰে ৷
অজগৰটো চাবলৈ অঞ্চলটোত ভালেসংখ্যক লোক উপস্থিত হয়৷ইয়াৰ পাছত বৰকটকীয়ে বিশালকায় অজগৰটো বনবিভাগৰ সহযোগত ভোমোৰাগুৰি সংৰক্ষিত বনাঞ্চলত মুকলি কৰি দিয়ে৷উল্লেখযোগ্য যে,ভোমোৰাগুৰি সংৰক্ষিত বনাঞ্চলতো ভালেমান অজগৰ আছে আৰু ইয়াতো বৃহৎ আকৃতিৰ অজগৰ পোৱা যায়৷বৰকটকীয়ে কয় যে,অজগৰৰ দৰে প্ৰাণীক তাৰ প্ৰাকৃতিক আৱাসতে থাকিবলৈ দিব লাগে য’দিও তলগেৰেকী এক জনবসতিপূৰ্ণ অঞ্চল হোৱাত এনে বিশাল আকৃতিৰ অজগৰ থাকিলে অঞ্চলটোৰ মানুহ,পোহনীয়া জীৱৰ লগতে অজগৰটোৰ প্ৰতিও ভাবুকী আহিব পাৰে ৷
সেয়ে সমীপৰে ভোমোৰাগুড়ি বনাঞ্চল এই বিশাল অজগৰটোৰ বাবে উপযুক্ত আবাসক্ষেত্ৰ বুলিও তেওঁ কয়৷ইপিনে অজগৰটো দৈৰ্ঘ মাপ কৰাৰ পিছত অজগৰটো ১৮ফুট দীঘল বুলি বন বিভাগে প্ৰকাশ কৰাৰ লগতে ২০২৬ বৰ্ষত এনে বিশালকায় অজগৰ উদ্ধাৰৰ ঘটনা অসমত এইটোৱেই প্ৰথম বুলি বনবিভাগৰ সূত্ৰই প্ৰকাশ কৰিছে৷আনহাতে বনবিভাগৰ হাতত ইয়াৰ পূৰ্বে ৰাজ্যত ইমান ডাঙৰ অজগৰ উদ্ধাৰ হোৱাৰো কোনো তথ্য নাই৷
উল্লেখযোগ্য যে সুদীৰ্ঘকলত বহু অজগৰ উদ্ধাৰ কৰা বৰকটকীয়ে ইয়াৰ পূৰ্বে এটা ১৫ফুট দৈৰ্ঘৰ অজগৰ তেজপুৰত উদ্ধাৰ কৰিছিল৷তদুপৰি ভোমোৰাগুৰিটো ১৫ফুট দৈৰ্ঘৰ আন এটা অজগৰৰ গাড়ীৰ চেপাত মৃত্যু ঘটিছিল৷উল্লেখযোগ্য যে,মংগলবাৰেই বৰকটকীয়ে তেজপুৰৰ আদালত চাৰিআলিৰ এজোপা গছৰ পৰাও আন এডাল অজগৰ নিৰাপদে উদ্ধাৰ কৰে ৷
