ৰাজ্যিক বিজেপিৰ বর্ধিত কাৰ্যনিৰ্বাহক বৈঠক

১৯ ছেপ্টেম্বৰত জুবিনৰ মৃত্যু দিৱসত ৰক্তদান কাৰ্যসূচী শাসক দলৰ

দৈনিক অগ্ৰদূত ডিজিটেল ডেস্ক:অহা ২০ বছৰলৈ অসমত কংগ্রেছ শাসনলৈ আহিব নোৱাৰে। ইয়াত সাংবাদিকৰ আগত এই দাবী কৰে মুখ্যমন্ত্রী ড:হিমন্ত বিশ্ব শর্মাই। অসমত বর্তমান কংগ্রেছ নাই বুলিও মুখ্যমন্ত্রীয়ে কটাক্ষ কৰে।

নগাঁও লোকসভা সমষ্টিৰ আগন্তুক উপ-নৰ্বাচনৰ প্ৰসংগতে এই মন্তব্য কৰি মুখ্যমন্ত্রীয়ে লগতে কয় যে কংগ্রেছত ফৈদৰ ৰাজনীতি কৰিবলৈও এতিয়া মানুহ নাই। সেনাপতি আছে অথচ সৈন্য নাই। ইয়াৰ বিপৰীতে কংগ্রেছৰ মানুহবোৰ এতিয়া বিজেপিমুৱা হৈছে আৰু এই ধাৰা দলৰ সংখ্যালঘু ভোটাৰৰ মাজতো দেখা গৈছে। মুখ্যমন্ত্রীয়ে কম, ‘যেতিয়া এটা দলে ১০২ খন অসনত জয়লাভ কৰে তাৰ পছত হতাশ হৈ কংগ্রেছৰ মানুহে বিজেপিত যোগদান কৰাটো স্বাভাবিক। অন্ততঃ আজিৰ পৰিস্থিতিত কংগ্রেছে পুনৰ ঠন ধৰি উঠিব পাৰিব বুলি মোৰ মনে নধৰে।’ কংগ্ৰেছে সেয়েহে নগাঁও লোকসভাৰ উপ-নির্বাচনত প্রক্ষেপ কৰিবলগীয়া প্রার্থীক লৈও বিশেষ আশা প্রকাশ কৰিব নোৱাৰি বুলি মুখ্যমন্ত্রীয়ে ইংগিতপূর্ণ মন্তব্য কৰে।

উল্লেখ্য যে প্রধানমন্ত্রী নৰেন্দ্ৰ মোদীৰ আগন্তুক জন্মদিন উদ্যাপন, উপ-নির্বাচন আদি বিষয় আলোচনাৰ বাবে আজি অসম ৰাজ্যিক বিজেপিৰ এখন কার্যনির্বাহক সভা অনুষ্ঠিত হয়। এই সভাৰ আলোচনা আৰু সিদ্ধান্তৰ ভিত্তিত মুখ্যমন্ত্রীয়ে এই ঘোষণাও কৰে যে উপ-নির্বাচনটোত বিজেপিৰ প্রার্থী হ’ব দেবাশীষ শর্মা। উল্লেখ্য যে নগাঁও জিলা আয়ুক্তৰ পদৰ পৰা পদত্যাগ কৰি একমাত্র নির্বাচন খেলাৰ বাবেই শৰ্মাই বিজেপিত অলপতে যোগ দিয়ে। আগতীয়াকৈ প্রার্থিত্ব নিশ্চিত কৰি চাকৰি ত্যাগ কৰা শৰ্মাৰ নাম প্রার্থীৰূপে ঘোষণা কৰাত সেয়েহে নতুনত্ব বুলিবলৈ একো নাই। কেবল মাত্র অনুষ্ঠানিকতাহে আজি ৰূপায়ণ কৰা হয়।

দেবাশীষ শর্মাই নির্বাচন খেলাতো আগতীয়াকৈ নিশ্চিত হোৱাৰ পাছতে তেওঁৰ প্ৰৰ্থিত্বৰ বিৰোধিতাৰে কংগ্ৰেছ নির্বাচন আয়োগৰ দ্বাৰস্থ হৈছে। এই সন্দর্ভতো মুখ্যমন্ত্রীয়ে সাংবাদিকৰ আগত মন্তব্য কৰে। মুখ্যমন্ত্ৰীয়ে কয়, ‘দেৱাশীষ শর্মাই চাকৰি ত্যাগ কৰি ৰাজনৈতিক দলত যোগদান কৰিছে। তাৰ পাছত তেওঁ অৰ্হতাৰ ভিত্তিত প্রার্থিত্ব লাভ কৰিছে। কংগ্রেছেও প্রতিবাৰ চাকৰি কৰা ব্যক্তিক প্রার্থিত্ব দি আহিছে। এয়া পাবে। নির্বাচন খেলাৰ অধিকাৰ সকলো লোকৰে আছে। সংসদত কিমান সাংসদ আছে মই জনাত কংগ্ৰেছৰ শিবামণি বৰাও চৰকাৰী বিষয়া আছিল আৰু চাকৰি ত্যাগ কৰি নিৰ্বাচন খেলিছিল।’

নিৰ্বাচনৰ প্ৰসংগতে মুখ্যমন্ত্রীয়ে কয় যে যদিও নগাঁও বিজেপিৰ অনুকূলে থকা সমষ্টি নহয়, তথাপি দলৰ কর্মকর্তাসকলে এবাৰ যুঁজি চাব বিচাৰিছে। তদুপৰি মুখ্যমন্ত্ৰীয়ে কয়, ‘নগাঁও সমষ্টিটো সাধাৰণতে বিজেপিৰ নহয়। কিন্তু যোৱা কেইদিনমানত ৰাইজৰ যথেষ্ট উৎসাহ দেখিবলৈ পোৱা গৈছে। আমাৰ লক্ষ্য হ’ল সমষ্টিটোৰ যিকেইটা বিধানসভা সমষ্টিত বিজেপিয়ে জয়লাভ কৰিছিল সেই কেইটাত অধিক ভাল ফলাফল প্রদর্শন কৰা। তথাপি যোৱা বিধানসভা নির্বাচনত আমি সংখ্যালঘু ভোটাৰৰ পৰা যথেষ্ট সঁহাৰি পাইছিলো। মানকাচৰ, পৰ্বতঝোৰা আদি সমষ্টিত আমি বহু ভোট পাইছিলো। আমি চামগুৰিৰ দৰে সমষ্টিৰ উপ-নিৰ্বাচনত জিকিছিলো। গতিকে হৰা-জিকাক পাছত থৈ দলৰ সকলোবে নগাঁৱত এইবাৰ যুঁজ দিব বিচাৰিছে।

ইপিনে, কার্যনির্বাহক বৈঠকত প্রধানমন্ত্রী নৰেন্দ্ৰ মোদীৰ জন্মদিন উপলক্ষে অহা ১৭ ছেপ্টেম্বৰৰ পৰা ১৭ অক্টোবৰলৈ সেৱা আৰু সংকল্প অভিযান সফলভাবে ৰূপায়ণক লৈ আলোচনা কৰা হয়। এই সন্দর্ভতো মুখ্যমন্ত্রীয়ে কয়, ‘মুখ্যমন্ত্রী আৰু প্রধানমন্ত্রীৰূপে নৰেন্দ্ৰ মোদীয়ে অহা সাত অক্টোবৰত ২৫ বছৰ স্পৰ্শ কৰিব। গতিকে জন্মদিন আৰু শাসনৰ ২৫ বছৰ উদ্যাপনৰ বাবে দলে বিভিন্ন কাৰ্যসূচী ৰূপায়ণ কৰিব।’ তদুপৰি মুখ্যমন্ত্ৰীয়ে আজিৰ সভাৰ আন এক সিদ্ধান্ত সদৰী কৰি কয় যে অহা ১৯ ছেপ্টেম্বৰত জুবিন গাৰ্গৰ মৃত্যু তিথি উপলক্ষে বিজেপিয়ে ব্যাপক ৰক্তদান কাৰ্যসূচী ৰূপায়ণ কৰিব।

#LatestNews #BreakingNews #bjpstateexecutivemeeting #splspeech #HimantaBiswaSarma #guwahati