Bank strike in Assam:
দৈনিক অগ্ৰদূত ডিজিটেল ডেস্ক:সমগ্ৰ দেশৰ লগতে অসমতো শুকুৰবাৰে বেংক কৰ্মচাৰীৰ উত্তাল প্রতিবাদ আৰু ধৰ্মঘটৰ ফলত স্তব্ধ হৈ পৰে বেংকিং ব্যৱস্থা। বেংক কর্মচাৰী-বিষয়াসকলৰ উমৈহতীয়া মঞ্চ ইউনাইটেড বেংক ইউনিয়নৰ আহ্বান মর্মে দিছপুৰৰ এছবিআইৰ মুখ্য কাৰ্যালয়ৰ সন্মুখত প্ৰতিবাদ সাব্যস্ত কৰে বিষয়া-কর্মচাৰীসকলে। হাতে হাতে প্লেকার্ড লৈ বিভিন্ন শ্ল’গান দিয়ে কৰ্মচাৰীসকলে। সপ্তাহত পাঁচদিন কৰ্মদিনৰ ব্যৱস্থা, কেন্দ্ৰীয় চৰকাৰে বলবৎ কৰিব খোজা পাৰদৰ্শিতা ভিত্তিত উদগনি (পিএলআই) আঁচনি প্রত্যাহাৰ বা পুনৰ বিবেচনা, পেন্সন উন্নীতকৰণ আৰু নতুন পেন্সন নীতি সংক্রান্তীয় কে’বাটাও সমস্যা সমাধানৰ দাবীত এনেদৰে শ্ল’গান দিয়ে কৰ্মচাৰীসকলে।
এই প্ৰতিবাদৰ ফলত শুকুৰবাৰৰ পৰা তিনিদিন ধৰি বেংক সেৱা ব্যাহত হৈ পৰে; কিয়নো আজি ধর্মঘটৰ পাছত কাইলৈ আৰু পৰহিলৈ চৰকাৰী বন্ধ। দিছপুৰত প্ৰতিবাদী কর্মচাৰীসকলে কয়, ‘বাকী দিনকেইটাত আমি পৰিয়ালৰ স’তে বেছি সময় দিব নোৱাৰো, সন্ধিয়া ছয়-সাত বজালৈকে কর্মস্থলীতে থাকিব লাগে। আমি পৰিয়ালকো সময় দিব লাগে। ৰিজার্ভ বেংকতো পাঁচদিনেই বেংকিং হয়। এনেকুৱা হ’লে কাম ভাল হ’ব। সকলোৱে কিমান চাপত থাকো! সতেজ মন লৈ কর্মস্থলীলৈ আহিলে সোমবাৰৰ পৰা শুকুৰবাৰলৈ ভালদৰে কাম কৰিব পাৰিম।
পাঁচদিনীয়া কৰ্মদিনৰ দাবী আমাৰ বহুদিনৰ পৰাই আছে। চৰকাৰে আশ্বাস দিও কোনো ব্যৱস্থা লোৱা নাই। সোনকালে পাঁচদিনীয়া বেংকিং ডে কৰিবলৈ চৰকাৰক আহ্বান জনাইছো।’
ইপিনে, তেজপুৰতো বেংক কর্মচাৰীসকলে উত্তাল প্রতিবাদ সাব্যস্ত কৰে। ইউনাইটেড ফ’ৰাম অব বেংক ইউনিয়নৰ অধীনস্থ দেশৰ সাতটাকৈ বাষ্ট্রীয়কৃত বেংক বিষয়া আৰু কৰ্মচাৰীৰ উত্তাল প্রতিবাদে আজি সমগ্র দেশ তথা বাজ্যৰ লগতে তেজপুৰতো বেংকৰ কাম-কাজ স্তব্ধ কৰি তুলিলে। তেজপুৰৰ ঐতিহ্যমণ্ডিত পৰুমপুখুৰী পাৰৰ ষ্টেট বেংকৰ তেজপুৰ মূল শাখাৰ তলত আজি শতাধিক বেংক কর্মচাৰীয়ে ধর্মঘট কাৰ্যসূচীৰে প্ৰতিবাদ সাব্যস্ত কৰে। ‘সপ্তাহত দুদিন বন্ধৰ ব্যৱস্থা কৰক, আমাৰ দাবী মানিবলৈ লাগিব, বেংক কর্মচাৰী ঐক্য জিন্দাবাদ’ আদি ধ্বনিৰে বেংক কৰ্মচাৰীসকলে পৰিৱেশ উত্তাল কৰি তোলে।
উল্লেখ্য যে ৰাজহুৱা খণ্ডৰ বেংক, ব্যক্তিগত খণ্ডৰ বেংক, বিদেশী বেংক, আঞ্চলিক গ্রাম্য বেংক আৰু সমবায় বেংকৰ পৰা বেংকিং উদ্যোগৰ ১০ শতাংশলৈকে অধিক কর্মশক্তিৰে গঠিত ইউনাইটেড ফ’ৰাম অৱ বেংক ইউনিয়নৰ আওতাত থকা সংগঠনৰ কৰ্মচাৰী-বিষয়াসকলৰ প্রতিবাদে শুকুৰবাৰে তেজপুৰটো বিশেষ প্ৰভাৱ পেলায়।
তেজপুৰত প্রতিবাদকাৰী বেংক বিষয়াসকলৰ প্ৰতিনিধি সুদীপ্ত কলিতাই কয় যে এই আন্দোলনৰ বাবে তেওঁলোকৰ এটা দিনৰ দৰমহা কৰিব যদিও তেওঁলোকে দাবীত অলৰ-অচৰ। এই দাবী মানি নল’লে অহা ২৯ আৰু ৩০ ছেপ্টেম্বৰত পুনৰ দেশজুৰি প্রতিবাদী কার্যসূচী গ্রহণ কৰাৰ পাছতো যদি মানি নলয় তেতিয়া ২৬ অক্টোবৰৰ পৰা অনির্দিষ্টকাললৈ বেংক সেৱাৰ কাম-কাজৰ পৰা বিৰত থাকি ব্যাপক প্রতিবাদী কার্যসূচী গ্ৰহণ কৰিব।
ইপিনে, আজি নগাঁও চহৰস্থ ‘স্টেট বেংক অব ইণ্ডিয়া’, ‘পঞ্জাব নেচনেল বেংক’ৰ কাৰ্যালয়ৰ সন্মুখত ধর্মঘট কাৰ্যসূচী ৰূপায়ণ কৰি ইউনিয়নসমূহৰ লগতে বেংক বিষয়া-কর্মচাৰীসকলে তেওঁলোকৰ দাবীসমূহ কাৰ্যকৰী কৰিবলৈ সংশ্লিষ্ট কর্তৃপক্ষক দাবী জনায়। তেওঁলোকে বিভিন্ন ধ্বনি দিয়া পৰিলক্ষিত হয়। এই ধৰ্মঘটৰ ফলত নগাঁৱৰ বেংকসমূহৰ স্বাভাবিক কাম-কাজ অচল হৈ পৰে। ইউনাইটেড ফ’ৰাম অৱ বেংক ইউনিয়নৰ আহ্বানত আজি ৰাষ্ট্ৰজোৰা বেংক ধর্মঘট বৰূপায়ণ কৰা হয়।
উল্লেখ্য যে বহু বছৰ ধৰি বেংকসমূহে সোমবাৰৰ পৰা শুকুৰবাৰলৈকে সম্পূর্ণ দিন আৰু সকলো শনিবাৰে আধা দিন কাম কৰি আছিল। ২০১৫ ৰ মে’ত স্বাক্ষৰিত চুক্তিখনত ইণ্ডিয়ান বেংক এছ’চিয়েন, বেংক পৰিচালনা সমিতিয়ে এই কথাত সহমতত উপনীত হৈছিল যে আৰম্ভণিতে প্রতি মাহৰ ছয় আৰু চতুর্থ শনিবাৰক বেংকৰ বন্ধন্ৰূপে ঘোষণা কৰা হ’ব আৰু তাৰ পৰিৱৰ্তে বাকী থকা শনিবাৰবোৰক সম্পূর্ণ কর্মদিনৰূপে ঘোষণা কৰা হ’ব আৰু নিশ্চিত কৰা হ’ল যে যথা সময়ত সকলো শনিবাৰ ঘোষণা কৰাৰ বাবে প্ৰচেষ্ট চলোৱা হ’ব বন্ধৰ দিনৰূপে।
২০২০ৰ নৱেম্বৰত স্বাক্ষৰিত চুক্তিখনত এই বিষয়টোৰ ওপৰত অধিক আলোচনা কৰা হৈছিল আৰু আই বি এ পৰিচালনাসকলে আশ্বাস দিছিল যে এই দাবীৰ ওপৰত অধিক আলোচনা কৰি সৌহার্দ্যপূর্ণ সমাধান বিচাৰি উলিওৱা হ’ব। পৰৱৰ্তী মজুৰি পুনৰীক্ষণৰ বাবে আলোচনাত এই দাবীৰ বিষয়ে অধিক আলোচনা কৰা হৈছিল আৰু ২০২৪ ৰ মাৰ্চত স্বাক্ষৰিত চুক্তিখনত আই বি এ বেংক পৰিচালনা সমিতিয়ে এই কথাত সম্মত হৈছিল যে বাকী শনিবাৰক বন্ধৰ দিনৰূপে ঘোষণা কৰা হ’ব আৰু ইউনিয়নসমূহে এই কথাত সম্মত হৈছিল যে সোমবাৰৰ পৰা শুকুৰবাৰলৈকে প্রতিদিনে কৰ্মৰ সময় ৪০ মিনিট বৃদ্ধি কৰা হ’ব।
এই চুক্তিত পৰামর্শ দিয়া হৈছে ভাৰত চৰকাৰৰ বিত্ত মন্ত্রণালয় অনুমোদনৰ বাবে। এতিয়া ডেৰ-দুবছৰতকৈও অধিক হ’ল যদিও বিষয়টো এতিয়াও বিত্ত মন্ত্রণালয়ৰ ওচৰত বিচাৰাধীন হৈয়ে আছে। ইতিমধ্যে কেন্দ্ৰীয় চৰকাৰ, ৰাজ্য চৰকাৰ, আৰবিআই, এলআইচি, জিআইচি, নাবার্ড, ব্যক্তিগত কোম্পানী, স্টক মার্কেট, মুনী মার্কেট, বৈদেশিক মুদ্রাৰ বজাৰ আদিত প্রতি সপ্তাহত পাঁচ দিন কাম কৰি আছে। বাকী শনিবাৰবোৰহে অত্যধিক বন্ধৰূপে ঘোষণা কৰা হয়।
সোমবাৰৰ পৰা শুকুৰবাৰলৈ প্ৰতিদিনে ৪০ মিনিটৰ বাবে অতিৰিক্ত ব্যৱসায়িক সময়ৰ বাবে ইউনিয়নসমূহে সম্মতি প্ৰকাশ কৰাৰ বাবে গ্ৰাহকৰ ব্যৱসায়িক সময় হ্রাস নহ’ব। বিভিন্ন অসুবিধা আৰু সীমাবদ্ধতাৰ মাজতো বেংকৰ কৰ্মচাৰী আৰু বিষয়াসকলে বেংকিং জনসাধাৰণৰ বাবে সম্ভৱপৰ উত্তম সেরা আগবঢ়াই আহিছে। আনকি কৰ’না মহামাৰীৰ সময়তো বেংকৰ কৰ্মচাৰীয়ে আমাৰ দেশৰ জনসাধাৰণৰ সেৱা কৰিছিল৷
বেংকিং কামৰ আজিকালি একাধিক কাৰণত অতি মানসিক চাপৰ সৃষ্টি হৈছে আৰু সঠিক কর্ম জীৱনৰ ভাৰসাম্য ৰক্ষা কৰিবলৈ ইউএফবিইউৰ বৈধ দাবী যে বাকী শনিবাৰবোৰকো সপ্তাহত পাঁচ দিন কাম কৰা সময়খিনি গ্রহণ কৰি বন্ধৰ দিনৰূপে ঘোষণা কৰা হওক মূলতঃ এই দাবীৰ লগতে বেংকত ক্লার্ক আৰু উপ-কর্মচাৰীৰ পর্যাপ্ত নিযুক্তি, এনপিএছক অপিএছলৈ ৰূপান্তৰ, বেংকে এনপিএছলৈ চাৰি শতাংশ অতিৰিক্ত অৱদানৰ ওপৰত আয়কৰ ৰেহাই, গ্রেচুইটি আইনৰ অধীনত গ্ৰেচুইটিৰ ওপৰত চিলিং বৃদ্ধি, পেন্সন উন্নীতকৰণ, পেন্সনত একেধৰণৰ ডিএ, এক্স গ্রেচিয়াত নৱেম্বৰৰ আগলৈকে পুনৰীক্ষণ, ২০২২ পেলনাৰ, সকলো ব্যক্তিগত বেংকত এক্স-গ্রেচিয়া, বেংকত ডাইৰেক্টৰৰ পদ ইচ্ছাকৃতভাৱে পূৰণ নকৰা, লিভ বেংক প্ৰৱৰ্তন, অৱসৰপ্ৰাপ্তসকলৰ বাবে বেংকে বহন কৰিবলগীয়া মেডিকেল ইঞ্চৰেন্স পলিচীৰ প্রিমিয়াম আদি এতিয়াও সমাধান নোহোৱাকৈয়ে আছে।
