Houthi Attack:
দৈনিক অগ্ৰদূত ডিজিটেল ডেস্ক:অচিৰে সমগ্র বিশ্বত ইন্ধনৰ নাটনি তীব্ৰতৰ হোৱাৰ আশংকা প্রকট কৰি মধ্যপ্রাচ্য আজিও উত্তাল হৈ আছে। বিশ্বৰ ইন্ধন তথা শক্তিৰ বজাৰত অন্যতম গুৰুত্বপূৰ্ণ ভূমিকা পালন কৰি অহা বাব অল-মাণ্ডেব প্ৰণালীৰ গুৰুত্বপূৰ্ণ পেৰিম দ্বীপ বিদ্রোহীয়ে দখল কৰিছে।
উল্লেখ্য যে উক্ত প্রণালীয়ে ভাৰত মহাসাগৰকো সংযোগ কৰিছে। গতিকে ভাৰতলৈ ইন্ধন সৰবৰাহৰ ক্ষেত্ৰত এই প্রণালীও গুৰুত্বপূর্ণ।
আনহাতে, শেহতীয়াভারে পোহৰলৈ অহা অনুসৰি বৃহস্পতিবাৰে য়েমেনৰ ম’চা চহৰ দখল কৰিবলৈ হুথিয়ে অভিনৱ কৌশল অৱলম্বন কৰে। সংযুক্ত আৰব আমিৰশ্বাহী সমর্থনপুষ্ট য়েমেনৰ ৰাষ্ট্ৰীয় প্ৰতিৰোধ বাহিনীৰ মুৰব্বী লেফটেনেন্ট জেনেৰেল তাৰেক আব্দুল্লা ছালেহৰ কণ্ঠ ‘ক্ল’ন’ কৰে বিদ্ৰোহীয়ে। কৃত্রিম বুদ্ধিমত্তা প্রয়োগ কৰি সেনা মুৰব্বীজনৰ ক্ল’ন কৰা কণ্ঠৰে সামৰিক বাহিনীক বিদ্রোহীয়ে ম’চা চহৰৰ পৰা আঁতৰি যাবলৈ আহ্বান জনায়।
নিম্ন পদবীৰ সেনা বিষয়াসকলে এই কণ্ঠস্বৰৰ জালিয়াতিৰ বিষয়ে উমান নাপাই পৃষ্ঠভংগ দিয়ে। কাৰণ কৃত্রিম বুদ্ধিমত্তাৰ জৰিয়তে কোনো ব্যক্তিৰ কণ্ঠ ক্ল’ন কৰিলে তাৰ স’তে ব্যক্তিজনৰ কণ্ঠৰ পাৰ্থক্য ধৰা পেলোৱাটো অত্যন্ত কঠিন হয়। এনেদৰে চাইবাৰ অপৰাধীয়ে প্ৰৱঞ্চনাৰ জাল পেলোৱাৰ চেষ্টা কৰে। এই অপৰাধী কাৰ্য হুথি বিদ্রোহীয়েও অৱলম্বন কৰি সহজে ম’চা চহৰ আৰু বাব অল-মাণ্ডেব প্রণালী দখল কৰে। স্বাভাৱিকতে ইয়ে সমগ্র বিশ্বত খলকনি তুলিছে।
অৱশ্যে শুকুৰবাৰে ছৌদি আৰবৰ সামৰিক বাহিনীয়ে আকাশমাৰ্গৰ পৰা অভিযান চলায়। এই অভিযানৰ সময়ত চহৰখনত হুথি বিদ্রোহীৰ অৱস্থান চিনাক্তকৰণৰ চেষ্টা কৰা হয় বুলি সূত্রই জনায়।
আনহাতে, ইৰানে হুথিৰ ম’চা চহৰ আৰু বাব অল-মাণ্ডেবৰ পেৰিম দ্বীপ দখললৈ সমর্থন ঘোষণা কৰিছে। এনে পৰিস্থিতিত মধ্যপ্রাচ্য অধিক দিনলৈ অশান্ত হৈ থকাৰ আশংকা প্রকট হৈছে।
ইপিনে, সূত্ৰই প্ৰকাশ কৰা অনুসৰি মার্কিন ৰাষ্ট্ৰপতি ড’নাল্ড ট্রাম্পে হুথিৰ বিৰুদ্ধে অভিযান চলাবলৈ অস্বীকাৰ কৰিছে। মধ্যপ্রাচ্য পুনৰ অশান্ত কৰি তোলা এই বিদ্রোহীসকলৰ বিৰুদ্ধে অভিযান চলাবলৈ ছৌদি আৰবৰ যুৱৰাজ মহম্মদ বিন ছলমানে মার্কিন ৰাষ্ট্ৰপতিক অনুৰোধ জনাইছিল। কিন্তু বন্ধু ৰাষ্ট্ৰ হোৱা সত্ত্বেও ছৌদি যুৱৰাজৰ এই অনুৰোধ ট্রাম্পে প্রত্যাখ্যান কৰা বুলি সূত্ৰই সদৰী কৰিছে।
উল্লেখ্য যে যোৱা সপ্তাহৰ পৰা য়েমেনত হুথিৰ আগ্রাসন বৃদ্ধি পায়। ফলত বাতৰি লিখা পর্যন্ত ম’চা, পেৰিম আদিৰ অর্ধলক্ষ লোক স্থানচ্যুত হ’ব লগা হৈছে। এই সম্পৰ্কত ৰাষ্ট্ৰসংঘৰ প্ৰব্ৰজন সংস্থাই প্রকাশ কৰা অনুসৰি হুথিৰ বৰ্ধিত কাৰ্যকলাপৰ ফলত আজিলৈকে য়েমেনত পাঁচ শতাধিক লোকৰ প্ৰাণহানি হোৱাৰ লগতে ৪৪ হেজাৰৰো অধিক স্থানচ্যুত হ’ব লগা হৈছে।
আনহাতে, মধ্যপ্রাচ্যৰ চলিত অশান্ত অৱস্থাত হস্তক্ষেপ নকৰে বুলি মার্কিন ৰাষ্ট্ৰপতি ট্রাম্পে স্পষ্ট কৰি দিয়াত অঞ্চলটোত পশ্চিমীয়া শক্তিৰ আধিপত্য হ্রাস পাবলৈ ধৰাক ইংগিত দিয়া বুলি চর্চা হৈছে। এনে পৰিস্থিতিত মার্কিন প্রশাসনৰ পুৰণি বন্ধু ছৌদি আৰব শংকিত হৈছে। অৱশ্যে পৰিস্থিতিক লৈ ইৰানৰ স’তে ছৌদি আৰব শীঘ্ৰে আলোচনাত মিলিত হ’ব বুলিও চর্চা হৈছে।
উল্লেখ্য যে শেহতীয়া ইৰান যুদ্ধৰ সূত্রপাত হোৱাৰ পাছৰে পৰা ইন্ধন ৰপ্তানিৰ বাবে ইৰানে ঘাইকৈ লোহিত সাগৰ আৰু বাব অল-মাণ্ডেবৰ ওপৰত নিৰ্ভৰ কৰি আহিছে। সম্প্ৰতি হুথিৰ উত্থান ঘটাত দেশখন একপ্ৰকাৰ সংকটৰ সন্মুখীন হৈছে। স্বাভাৱিকতে মধ্যপ্রাচ্যৰ এই অৱস্থাই ভাৰতকো উদ্বিগ্ন কৰি আহিছে। ইয়াৰ মূল কাৰণ হৈছে আন্তর্জাতিক বজাৰত পুনৰ খাৰুৱা তেলৰ মূল্যবৃদ্ধি ঘটিবলৈ ধৰিছে।
