Sutia Student Union:অসমীয়া জাতি গঠনলৈ চুতীয়া জাতিৰ অৱদান অপৰিসীম : মন্ত্ৰী বৰা

দৈনিক অগ্ৰদূত ডিজিটেল ডেস্ক:বিভিন্ন জাতি-জনগোষ্ঠীক লৈ গঠিত অসমীয়া জাতি গঠনৰ প্রতি চুতীয়া জাতিৰ অবদান অপৰিসীম। চুতীয়া জাতি অবিহনে অসমীয়া জাতিৰ পৰিচয় অসম্পূর্ণ।’ এই মন্তব্য মন্ত্রী অতুল ব্ৰাৰ। শুকুৰবাৰে সামৰণি পৰ সদৌ অসম চুতীয়া ছাত্ৰ সন্থাৰ একবিংশতিতম প্রতিষ্ঠা দিৱসৰ মুকলি সভাত মুখ্য অতিথিৰ ভাষণ দি মন্ত্ৰী বৰাই লগতে কয় যে চুতীয়া জনগোষ্ঠীৰ কৃষ্টি-সংস্কৃতিৰ বিকাশ আৰু প্ৰসাৰৰ লগতে জাতিটোৰ সামগ্রিক উন্নয়নৰ বাবে সকলো চুতীয়া সংগঠন একত্রিত হৈ কাম কৰিব লাগিব। সভাত তেওঁ চুতীয়া ছাত্ৰ সন্থাৰ মুখপত্র ‘শদিয়া’ উন্মোচন কৰে।

আনহাতে, কালিৰে পৰা সৰুপথাৰত দুদিনীয়াকৈ অনুষ্ঠিত এই প্রতিষ্ঠা দিৱসৰ আজি দ্বিতীয় দিনা বর্ণিল সাংস্কৃতিক শোভাযাত্রা উলিওৱা হয়। এই শোভাযাত্রাই সকলোকে আপ্লুত কৰে। সদৌ গোলাঘাট জিলা চুতীয়া ছাত্র সন্থাৰ উদ্যোগত তথা ধনশিৰি মহকুমা চুতীয়া ছাত্র সন্থাৰ আতিথ্যত আৰু সৰুপথাৰ আঞ্চলিক ছাত্ৰ সন্থা আৰু সৰুপথাৰবাসীৰ সহযোগত আয়োজিত এই প্রতিষ্ঠা দিৱসৰ দ্বিতীয় দিনাৰ কাৰ্যসূচী সাংস্কৃতিক শোভাযাত্ৰাৰে আৰম্ভ হয়। বিভিন্ন জাতি-জনগোষ্ঠীৰ মিলনভূমি স্বৰূপ সৰুপথাৰ সমজিলাত বাস কৰা বিভিন্ন জাতি-জনগোষ্ঠী আৰু ধর্মাবলম্বী লোকৰ পৰম্পৰাগত কৃষ্টি-সংস্কৃতিৰ প্ৰদৰ্শনৰে উলিওৱা বাৰেৰহণীয়া সাংস্কৃতিক শোভাযাত্রাই পিএমশ্রী সৰুপথাৰ উচ্চতৰ মাধ্যমিক বিদ্যালয়ৰ খেলপথাৰৰ পৰা ৰামধেনু মুকলি মঞ্চলৈকে প্রায় তিনি-চাৰি কিলোমিটাৰ পথ অতিক্রম কৰে।

সমগ্র পথছোৱা গীত-নৃত্য, ঢোল-তাল আৰু বিভিন্ন লোকবাদ্যৰ ধ্বনিবে মুখৰিত হৈ পৰে। প্ৰখৰ ৰ’দকো নেওচি উলিওৱা এই সাংস্কৃতিক শোভাযাত্ৰাৰ অন্যতম আকর্ষণ আছিল দুটাকৈ গজৰাজ। গজৰাজ দুটাৰ গজগমনে হেজাৰ হেজাৰ দৰ্শকক মন্ত্রমুগ্ধ কৰে।

ইয়াৰ পাছতে গায়ন-বায়ন, খোল-তাল, বিহু, ঝুমুৰ, বাগুৰুম্বা আদি বিভিন্ন লোকসংস্কৃতিৰ গীত-নৃত্য আৰু বাদ্যযন্ত্ৰৰ মাতেৰে সৰুপথাৰৰ আকাশ-বতাহৰ মুখৰিত হৈ পৰে। চুতীয়া জনগোষ্ঠীৰ পৰম্পৰাগত সাজপাৰ পৰিধান কৰি জাক জাক আয়তীৰ উকলি, ডেকা-গাভৰুৰ বিহুনাম আৰু নৃত্য-গীতে যেন সৰুপথাৰ নগৰকেই নচুৱাই তোলে। বড়ো, কার্বি, আদিবাসী, ৰাভা, সোগোৱাল, কছাৰী, চুতীয়া, তাই আহোম, মিচিং, মণিপুৰী, মাবোৱাৰী, বাঙালী, নেপালী আদি কবি ৫০ টাবো অধিক সাংস্কৃতিক দলে এই শোভাযাত্ৰাত অংশগ্ৰহণ কৰে।

সাংস্কৃতিক দলসমূহে নিজ নিজ জনগোষ্ঠীৰ কৃষ্টি-সংস্কৃতি প্ৰদৰ্শন কৰাৰ লগতে অসমীয়া পৰম্পৰাগত সাজপাৰ, লোকাচাৰ, জাকৈ-পল, জাল বাই মাছ ধৰা, অসমীয়া লোককৃষ্টি লোকাচাৰ, জা-জলপান প্রস্তুত কৰা আদি দৃশ্যও দৃষ্টিনন্দনভারে উপস্থাপন কৰে। চুবুৰীয়া নগালেণ্ডৰ ভাই-ভনীসকলেও পৰম্পৰাগত সাজপাৰ পৰিধান কৰি নগা সাংস্কৃতিক নৃত্য-গীত পৰিবেশন কৰি শোভাযাত্ৰাৰ সৌষ্ঠর বৃদ্ধি কৰে।

এই শোভাযাত্রাত জনপ্রিয় অভিনেতা অৰুণ হাজৰিকায়ো অংশগ্রহণ কৰে।

আমন্ত্রিত সাংস্কৃতিক দলসমূহৰ উপৰি সৰুপথাৰ সমজিলাৰ কমেও ২০খন বিদ্যালয়ৰ ছাত্র-ছাত্রীসকলেও প্রতিযোগিতামূলকভাবে সাংস্কৃতিক শোভাযাত্রাত অংশগ্রহণ কৰে। প্রতিযোগিতাত ধুন্দাচাম হাইস্কুলে প্রথম স্থান লাভ কৰাৰ বিপৰীতে পিনাকল ইংলিছ স্কুল আৰু কেশৱ চন্দ্ৰ হাজৰিকা মেম ‘ৰিয়েল স্কুলে যুটীয়াভাবে দ্বিতীয় স্থান আৰু সৰুপথাৰ উচ্চতৰ মাধ্যমিক বিদ্যালয় আৰু বেংমাই সীমান্ত উচ্চ মাধ্যমিক বিদ্যালয়ে যুটীয়াভারে তৃতীয় স্থান অধিকাৰ কৰে। শোভাযাত্ৰাৰ পাছতে মুকলি সভা অনুষ্ঠিত হয়।

সন্ধিয়া সদৌ অসম চুতীয়া জাতীয় মহিলা সম্মিলনীৰ প্রাক্তন সভানেত্রী অলি চুতীয়াই বস্তি প্রজ্বলন কৰাৰ পাছত জনপ্রিয় কণ্ঠশিল্পী ৰিচা ভৰদ্বাজৰ সাংস্কৃতিক অনুষ্ঠানবে প্রতিষ্ঠা দিৱসৰ কাৰ্যসূচী সামৰণি পৰে।