Zubeen garg Murder Case:আদালতে প্ৰেৰণ কৰা নথি সলনি কৰিলে বাকসা কাৰাগাৰৰ অধীক্ষকে

দৈনিক অগ্ৰদূত ডিজিটেল ডেস্ক:জুবিন গাৰ্গৰ হত্যাৰ গোচৰৰ বিচাৰ প্ৰক্ৰিয়া চলি থকাৰ মাজতে দ্রুত আদালতৰ এখন গুৰুত্বপূৰ্ণ নথি অভিযুক্ত বন্দী হৈ থকা কাৰাগাৰৰ বিষয়াই খেলিমেলি কৰাৰ গুৰুতৰ এক ঘটনা সংঘটিত হৈছে। ফলত ইয়াৰ বিৰুদ্ধে শুকুৰবাৰে আদালতে কাৰাগাৰ মহাপৰিদৰ্শকক অভিযুক্ত অধীক্ষকৰ অধীক্ষকৰ বিৰুদ্ধে ব্যৱস্থা গ্রহণ কৰিবলৈ নিৰ্দেশ জাৰি কৰে। ইয়াৰ মাজতে শুকুৰবাৰে ছিংগাপুৰৰ তৃতীয়জন প্রবাসী অসমীয়া প্ৰতিম লহকৰে সাক্ষ্যদান কৰে। অৱশ্যে সাক্ষ্য গ্রহণ আধৰুৱা হৈ ৰয়।

ইপিনে, সাংবাদিকতাৰ নামত আইন আদালতকো ভেঙুচালি কৰি দুটাকৈ সংবাদ মাধ্যমো শুকুৰবাৰে আদালতৰ নথি খেলিমেলি কৰা অভাৱনীয় ঘটনাটো সংঘটিত কৰে বাত্সা কাৰাগাৰৰ অধীক্ষকে। দ্রুত আদালতে বিচাৰৰ আইনী প্ৰক্ৰিয়াৰ অংশ হিচাপে শ্যামকানু মহন্তৰ চহী সংগ্ৰহ কৰিবলৈ কাৰাগাৰখনৰ অধীক্ষকলৈ এখন বিশেষ পত্ৰ প্ৰেৰণ কৰিছিল। কাৰণ এইখন কাৰাগাৰতে বন্দী হৈ আছে জুবিন গাৰ্গক হত্যাৰ গোচৰৰ অন্যতম মুখ্য অভিযুক্ত শ্যামকানু মহন্ত।

শেহতীয়াকৈ কাৰাগাৰখনৰ অধীক্ষকে আদালতক উক্ত নথিখন চহী সংগ্রহ কৰি জমা দিয়ে। কিন্তু নথিখন পৰীক্ষা কৰাত দেখা যায় যে আদালতে প্ৰেৰণ কৰা নথিখনৰ লগত অধীক্ষকে জমা দিয়া নথিখনৰ মিল নাই। এই ভয়ংকৰ জালিয়াতি কিয় সংঘটিত কৰা হ’ল তাৰ তাৎক্ষণিক ব্যৱস্থা দ্রুত আদালতে গ্রহণ কৰে। সেই অনুসৰি ন্যায়াধীশ শর্মিলা ভূঞাৰ দ্রুত আদালতে বাকসা কাৰাগাৰৰ অধীক্ষকজনৰ বিৰুদ্ধে আইন অনুসৰি ব্যৱস্থা গ্রহণ কৰিবলৈ কাৰাগাৰ মহাপৰিদৰ্শকক নির্দেশ দিয়ে। অধীক্ষকজনৰ বিৰুদ্ধে কি ব্যৱস্থা গ্রহণ কৰা হয় সেই বিষয়েও মহাপৰিদৰ্শকে আদালতক অৱগত কৰিব লাগিব।

ইপিনে, জুবিনৰ মৃত্যুৰ গোচৰ সংক্ৰান্তত দ্রুত আদালতত প্রবাসী অসমীয়াৰ সাক্ষ্য প্রদান প্রক্রিয়া অব্যাহত আছে। শুকুৰবাৰে তৃতীয়জন প্রবাসী অসমীয়া প্রতিম লহকৰে সাক্ষ্য প্রদান কৰে। এই সাক্ষ্য প্রদানকালত অভিযুক্ত সিদ্ধার্থ শৰ্মাৰ অধিবক্তাই প্রতিম লহকৰক জেৰা কৰে। কিন্তু সময়ৰ অভাৱত বাকী অভিযুক্ত পক্ষৰ অধিবক্তাসকলে লহকৰক জেৰা কৰিব নোৱাৰিলে। অহা ১৪ ছেপ্টেম্বৰত প্রতিম লহকৰৰ সাক্ষ্য প্ৰদানৰ বাবে দিন পুনৰ ধাৰ্য কৰা হয়। উল্লেখ্য যে জুবিন গাৰ্গৰ মৃত্যুৰ গোচৰ সংক্ৰান্তত ইতিমধ্যে দ্রুত আদালতত প্রবাসী অসমীয়া পৰীক্ষিত শৰ্মা আৰু সুস্মিতা গোস্বামীয়ে সাক্ষ্য প্রদান কৰিছে।

আনহাতে, ন্যায়াধীশ শর্মিলা ভূঞাৰ আদালতে দুটাকৈ সংবাদ মাধ্যমে প্রতিম লহকৰে জুবিন গাৰ্গৰ মৃত্যুৰ গোচৰ সংক্ৰান্তত ২০২৫ৰ অক্টোবৰত দণ্ডাধীশৰ আগত দিয়া ভাষ্যৰ লিপিবদ্ধ প্রতিলিপি প্রকাশ কৰা ঘটনাৰ আজি তদন্তৰ নিৰ্দেশ দিয়ে। আদালতে সংশ্লিষ্ট সংবাদ মাধ্যম দুটাই ন্যায়িক প্রক্রিয়াত হস্তক্ষেপ কৰা বুলি মন্তব্য কৰে। ইয়াৰ পাছতে প্রতিম লহকৰে ভাৰতীয় নাগৰিক সুৰক্ষা সংহিতাৰ ১৮৩ ধাৰাৰ অধীনত দণ্ডাধীশৰ আগত দিয়া ভাষ্যৰ লিপিবদ্ধ প্রতিলিপি কেনেকৈ লাভ কৰিলে আৰু কিদৰে প্ৰকাশ কৰিলে সেই সন্দৰ্ভত অপৰাধ অনুসন্ধান বিভাগক তদন্ত কৰি এক বিস্তৃত প্রতিবেদন দাখিল কৰাৰ লগতে আইন অনুসৰি ব্যৱস্থা ল’বলৈ নিৰ্দেশ দিয়ে।

উল্লেখ্য যে সংশ্লিষ্ট সংবাদ মাধ্যম দুটাই দণ্ডাধীশৰ ছীল, মোহৰসহ প্ৰতিম লহকৰে দণ্ডাধীশৰ আগত পূর্বে দিয়া ভাষ্যৰ লিপিবদ্ধ প্রতিলিপি সামাজিক মাধ্যমত প্রকাশ কৰিছিল।