BRICS Summit 2026:
দৈনিক অগ্ৰদূত ডিজিটেল ডেস্ক:সমগ্র বিশ্ব বিশেষকৈ মার্কিন ৰাষ্ট্ৰপতি ড’নাল্ড ট্রাম্পক বার্তা দি অন্ত পেলোৱা ১১ দেশীয় ব্রিক্ সম্মিলনৰ আনুষংগিক দিশহে সম্প্রতি অধিক চর্চাত আছে। সম্মিলনৰ অংশ গ্ৰহণকাৰী ৰাষ্ট্ৰনেতাসকলৰ সন্মানার্থে শনিবাৰে নিশা প্রধানমন্ত্রী নৰেন্দ্ৰ মোদীয়ে সম্মিলনস্থলী ভাৰত মণ্ডপমত আয়োজন কৰা ৰাজকীয় নৈশ ভোজত অজ্ঞাত কাৰণত অংশ নল’লে চীনৰ ৰাষ্ট্ৰপতি জি জিনপিঙে। তদুপৰি আবু ধাবিৰ যুৱৰাজ শ্বেখ খালেদ বিন মহম্মদেও নৈশভোজৰ নিমন্ত্ৰণ ৰক্ষা নকৰিলে।
ব্রিক্ছ সম্মিলনৰ পাছতে ব্যস্ততাৰ বাবে তেওঁ স্বদেশলৈ উৰা মাৰে। স্বাভাৱিকতে এই দুজনৰ অন্যতম জিনপিঙে নৈশভোজত অংশ নোলোৱাটোরে ব্যাপক চর্চা অর্জন কৰিছে। অৱশ্যে কি কাৰণত তেওঁ মোদীৰ নৈশ ভোজত অংশ গ্ৰহণৰ পৰা বিৰত থাকিলে সেয়া স্পষ্ট হোৱা নাই। অৱশ্যে উচ্চস্তৰীয় সূত্ৰৰ মতে শনিবাৰে মোদীৰ স’তে কৰা দ্বিপাক্ষিক বৈঠকৰ পাছতে জিনপিঙে জিৰণি ল’বলৈ তেওঁৰ বাবে ঠিক কৰি ৰখা হোটেললৈ যায়।
আনহাতে, ৰাষ্ট্ৰপতিজনে কিয় নৈশভোজত অংশগ্ৰহণৰ পৰা বিৰত থাকে সেই সম্পৰ্কত চীন চৰকাৰে কোনো তথ্য প্রকাশ কৰা নাই। এনে অৱস্থাতে চর্চালৈ আহিছে যে জিনপিং কিছু অসুস্থ হৈ আছে। অসুস্থতাৰ মাজতে তেওঁ ব্রিক্ছ সম্মিলনত অংশগ্ৰহণৰ উদ্দেশ্যে ভাৰত ভ্ৰমণ কৰে বুলিও চর্চা হৈছে।
শনিবাৰে ব্রিক্ছ সম্মিলনত প্রধানমন্ত্রী মোদীয়ে ভাষণ দি থকা অৱস্থাত জিনপিং অস্বস্তিত থকা যেন বোধ হৈছিল। এই কথা প্রধানমন্ত্রী মোদীৰো চকুত পৰে। লগে লগে তেওঁ চীনা ৰাষ্ট্ৰপতি অনুবাদকক সোধে, ‘তেওঁ (জিনপিং) ঠিকে আছেনে?’ মোদীৰ এই প্ৰশ্নৰ পাছতে কিছু মূৰ জোঁকাৰে ভ্ৰমণৰত ৰাষ্ট্ৰপতিজনে। তাৰ পাছতে মোদীয়ে পুনৰ ভাষণ আৰম্ভ কৰে। কিন্তু জিনপিং কিয় অস্বস্তিত আছিল সেয়া স্পষ্ট হোৱা নাই। এই সম্পৰ্কত তেওঁৰ স’তে ভাৰতলৈ অহা চীনা প্রতিনিধি দলটোরেও কোনো কথা স্পষ্ট নকৰাকৈয়ে উভতি যায়।
উল্লেখ্য যে শনিবাৰে দুপৰীয়া নতুন দিল্লীত উপস্থিত হৈছিল জিনপিং। ব্ৰিকছৰ নেতা সকলৰ বাবে মোদীয়ে যোৱা নিশা আয়োজন কৰা নৈশভোজত জিনপিং আৰু আবু ধাবিৰ যুৱকে অংশগ্ৰহণ নকৰিলেও আনসকল ৰাষ্টনেতাই অংশগ্ৰহণ কৰে। তেওঁ লোকৰ অন্যতম হৈছে কছ ৰাষ্ট্ৰপতি ভ্লাডিমীৰ পুটিন, ইৰানৰ ৰাষ্ট্ৰপতি মাছুদ পেজেস্কিয়ান আদি।
তদুপৰি এই নৈশভোজত লোকসভাৰ অধ্যক্ষ ওম বিৰলাসহ কেন্দ্ৰীয় মন্ত্রীসকল ক্রমে গৃহমন্ত্রী অমিত শ্বাহ, বিত্তমন্ত্রী নির্মলা সীতাৰমণ, ৰে’ল মন্ত্রী অশ্বিনী বৈষ্ণৱ,জাহাজ দপ্তৰৰ মন্ত্ৰী সৰ্বানন্দ সোনোৱাল আদিৰ লগতে কে’বাখনো ৰাজ্যৰ বিজেপিৰ মুখ্যমন্ত্রীসকলেও অংশগ্রহণ কৰে।
এই নৈশভোজত অংশগ্রহণ কৰা মুখ্যমন্ত্রীসকলৰ অন্যতম হ’ল অসমৰ মুখ্যমন্ত্রী ড:হিমস্ত বিশ্ব শৰ্মা, উত্তৰ প্ৰদেশৰ মুখ্যমন্ত্রী যোগী আদিত্যনাথ, মহাৰাষ্ট্ৰৰ মুখ্যমন্ত্রী দেবেন্দ্র ফড়নবিচ, পশ্চিমবংগৰ মুখ্যমন্ত্রী শুভেন্দু অধিকাৰী আদি।
ADVERTISEMENT