BRICS summit in Delhi:পশ্চিমীয়া শক্তিৰ বিৰুদ্ধে সৰৱ জিনপিং

দৈনিক অগ্ৰদূত ডিজিটেল ডেস্ক:’বিশ্বজুৰি দ্বন্দ্ব, সংঘাত, উত্তেজনা বৃদ্ধি পাইছে আৰু সাধাৰণ মানুহৰ জীৱনৰ ওপৰত ইয়াৰ অশুভ প্ৰভাৱ পৰিছে। এয়া মুঠেই কাম্য নহয়।’ শনিবাৰৰ পৰা নতুন দিল্লীত দুদিনীয়াকৈ আয়োজিত অষ্টাদশ ব্রিক্‌ছ সম্মিলনৰ দেওবাৰে দ্বিতীয়দিনা সম্মিলন উদ্বোধন কৰি দিয়া ভাষণত এই মন্তব্য কৰে প্রধানমন্ত্রী নৰেন্দ্ৰ মোদীয়ে। ভাষণত মোদীয়ে বিশ্বজুৰি ক্রমবর্ধমান ভূৰাজনৈতিক উত্তেজনাক লৈ উদ্বেগ প্রকাশ কৰে আৰু ইয়াৰ মোকাবিলাৰ বাবে ঐক্যবদ্ধ হ’বলৈ ব্রিক্ ছ ৰাষ্ট্ৰসমূহৰ প্ৰতি আহ্বান জনায়। তেওঁ কয়, ‘(কৰ’না) মহামাৰী সময়ৰ পৰা জলবায়ু সংক্রান্তীয় বিপর্যয় আৰম্ভ হয়। এই সদস্য বিপর্যয় একোটা নির্দিষ্ট অঞ্চল বা দেশত সীমাবদ্ধ থকা নাই।

আমি ব্রিক্ ছ ৰাষ্ট্ৰ সমূহৰ সহনশীলতা, পাৰস্পৰিক সহযোগিতা বৃদ্ধিত গুৰুত্ব আৰোপ কৰিছো। কি কি প্রত্যাহানৰ আমি সম্মুখীন হ’বলগীয়া হ’ব পাৰে সেয়া সময়মতে চিহ্নিত কৰা আৰু তাৰ মোকাবিলাৰ বাবে প্রস্তুত থকা অত্যন্ত জৰুৰী।’ এনেদৰে তেওঁ উন্নয়নশীল দেশসমূহক সংকট মোকাবিলাৰ বাবে ঐক্যবদ্ধ হ’বলৈ আহ্বান জনায়। মোদীয়ে লগতে কয় যে ব্ৰিছৰ ওপৰত সমগ্র বিশ্বই দৃষ্টি নিবদ্ধ কৰি ৰাখিছে আৰু সংস্থাটোৰ ওপৰত বিশ্বৰ আস্থাও অনেক বৃদ্ধি পাইছে। আগন্তুক সময়ত ব্রিক্ ছ দেশসমূহে উন্নয়নৰ লক্ষ্যত ঐক্যবদ্ধভাৱে আগবঢ়াৰ উদ্দেশ্যে কাম-কাজ কৰাত তেওঁ গুৰুত্ব আৰোপ কৰে।

আনহাতে, সম্মিলনত ভাষণ দি চীনৰ ৰাষ্ট্ৰপতি জি জিনপিঙে পশ্চিমীয়া শক্তিলৈ কঠোৰ বাৰ্তা প্ৰেৰণ কৰে। তেওঁ কয়, ‘আন্তর্জাতিক পৰিক্ৰমা সমূহত দক্ষিণ গোলার্ধৰ দেশসমূহে যৌথভাৱে আইনক সুৰক্ষা দিব। সার্বভৌম সমতা, আন দেশৰা আভ্যন্তৰীণ বিষয়ত অহস্তক্ষেপ, বিবাদৰ শান্তিপূর্ণ বন্দৱস্তি আদিকে ধৰি আন্তর্জাতিক সম্পৰ্কৰ প্ৰাথমিক নিয়মাৱলীক সুৰক্ষা দিয়া হ’ব।’

নাম উল্লেখ নকৰাকৈ তেওঁ পশ্চিমীয়া শক্তিক ইংগিত কৰি দুমুখীয়া স্থিতি ত্যাগ কৰিবলৈ দাবী জনায়। চীনৰ ৰাষ্ট্ৰপতিজনে লগতে কয়, ‘আকাৰ, শক্তি বা সম্পদ নির্বিশেষে সকলো দেশ হৈছে আন্তর্জাতিক সম্প্ৰদায়ৰ সমান সদস্য। দক্ষিণ গোলাৰ্ধৰ দেশসমূহে বহু সংস্কৃতিবাদৰ ধ্বজা উৰুৱাই ৰাখি ৰাষ্ট্ৰসংঘৰ কর্তৃত্ব আৰু ভূমিকা মানি চলিব লাগিব। আন্তর্জাতিক পৰিক্ৰমাত সকলো দেশৰে সম অংশগ্রহণ নিশ্চিত কৰিব লাগিব।’

উল্লেখ্য যে চলিত বর্ষত ভাৰতে দৃঢ়তা, উদ্ভাৱন, সহযোগিতা আৰু বহনক্ষমতা এই মূল ধ্বনিবে ব্রিক্‌ৰ অধ্যক্ষতা কৰি আছে। পশ্চিমীয়া সংস্কৃতি আধিপত্য বজাই ৰখা আন্তঃৰাষ্ট্ৰীয় সংস্থাসমূহৰ প্ৰভাৱ বৃদ্ধিৰ উদ্দেশ্যে ২০০৯ত প্রতিষ্ঠা হোৱা সংস্থাটোৰ অধ্যক্ষৰ আসনত অহা বছৰ চীন উপবিষ্ট হ’ব। ভাষণত চীনা ৰাষ্ট্ৰপতিজনে লগতে উল্লেখ কৰে যে কৃত্রিম বুদ্ধিমত্তাৰ ‘লাৰ্জ লেংগুৱেজ মডেল’ৰ বিকাশ সাধন আৰু প্রয়োগত সহযোগিতাৰ বাবে চীনে ব্রিক্ ছ-এআই অপেন ছ’র্চ সম্প্রদায় গঠনত অগ্রৱৰ্তী ভূমিকা পালন কৰিব।

জিনপিঙে লগতে স্পষ্ট কৰি দিয়ে যে যুগ যুগ ধৰি চলি অহা ‘শক্তিয়ে সঠিক’ বাণীৰ ম্যাদ কেতিয়াবাই উকলিছে। ভাষণত তেওঁ বাণিজ্য, উৎপাদন, বিনিয়োগ আৰু প্ৰযুক্তি সম্বন্ধীয় পাঁচদফীয়া এক পদক্ষেপৰ প্ৰস্তাৱো উত্থাপন কৰে। তেওঁ কয়, ‘ব্ৰিকছৰ সদস্য ৰাষ্ট্ৰসমূহে বিকাশশীল বজাৰসমূহ ব্যৱহাৰৰ বাবে পৰস্পৰৰ ওচৰ চাপি অহা উচিত।’

ইয়াৰ পূৰ্বে কালি সম্মিলনৰ প্ৰথমদিনা সর্বসম্মতিমর্মে নতুন দিল্লীৰ ঘোষণাৱলী গৃহীত হয়। লক্ষ্যণীয়ভাৱে এই ঘোষণাৱলীত মার্কিন ৰাষ্ট্ৰপতি ড’নাল্ড ট্রাম্পৰ নাম উল্লেখ নকৰাকৈ তেওঁক গৰিহণা দিয়া হয়। ইয়াৰ কাৰণ হৈছে ট্রাম্পে দ্বিতীয়বাৰ ক্ষমতালৈ অহাৰ পাছতে চীন, ভাৰতকে ধৰি বহু দেশৰ ওপৰত একপক্ষীয়ভাবে শুল্ক আৰোপ কৰা আৰু ইৰানৰ বিৰুদ্ধে একপক্ষীয় যুদ্ধ ঘোষণা কৰা। কালি সম্মিলনত ইৰানৰ ৰাষ্ট্ৰপতি মাছুদ পেজেস্কিয়ানে ইজৰাইলক উদ্দেশি সকীয়নি দিয়ে।

আনহাতে, দেওবাৰে সম্মিলনীৰ অন্তিমদিনা প্রধানমন্ত্রী মোদীসহ ব্রিক্‌ছ ৰাষ্ট্রনেতা সকলে ফটো তোলে। এই ফটোত প্রধানমন্ত্রী মোদীক মাজত দেখা গৈছে। তেওঁৰ দুকাষে ৰুছ ৰাষ্ট্ৰপতি পুটিন আৰু চীনৰ ৰাষ্ট্ৰপতি জিনপিং তথা ব্রিক্‌ ছ ৰাষ্ট্ৰসমূহৰ আন সদস্য ৰাষ্ট্ৰসমূহৰ নেতাসকলক দেখা গৈছে।

উল্লেখ্য যে গঠনৰ সময়ত পাঁচখন ৰাষ্ট্ৰ থকা ব্ৰিছৰ সদস্য ৰাষ্ট্ৰৰ সংখ্যা সম্প্রতি ১১ খনলৈ বৃদ্ধি পোৱাৰ লগতে ১০ খন সহযোগী ৰাষ্ট্রও আছে। এই সহযোগী ৰাষ্ট্ৰৰ নেতাসকলেও সংস্থাটোৰ এই সম্মিলনত অংশগ্ৰহণ কৰে।