Ganeshguri-Beltola Bazar Building:
দৈনিক অগ্ৰদূত ডিজিটেল ডেস্ক:বহু কোটি টকা ব্যয় সাপেক্ষে নিৰ্মাণ কৰাৰ ১০ মাহৰ পাছতো ৰহস্যজনক কাৰণত আজিও মুকলি নহ’ল মহানগৰীৰ গণেশগুৰি আৰু বেলতলাৰ দৈনিক বজাৰ গৃহ। উল্লেখ্য যে বজাৰ দুখনৰ গৃহ নিৰ্মাণৰ কাম আৰম্ভ হোৱাত ৰাইজে আশা কৰিছিল যে পথৰ যান-জট হ্রাস পাব আৰু ৰাইজৰেও বজাৰ-সমাৰ কৰাত সুবিধা পাব। এই আশা দি গুৱাহাটী পৌৰ নিগমে দুয়োখন বজাৰ গৃহ নিৰ্মাণৰ কাম হাতত লৈছিল। সময়ত নির্মাণ কার্য সম্পূর্ণ হ’ল, মন্ত্ৰীয়ে ৰঙাফিটা কাটি উদ্বোধনো কৰিলে; কিন্তু আজিলৈ ক্ষুদ্র ব্যৱসায়ীসকলৰ বাবে মুকলি কৰা নহ’ল বজাৰ দুখন।
উল্লেখ্য যে বেলতলা বজাৰ গৃহৰ আধাৰশিলা স্থাপন হৈছিল ২০১৩তে। প্রায় ১১.৫ কোটি টকা ব্যয়ৰে নিৰ্মাণ কৰা চাৰিমহলীয়া এই বজাৰৰ অট্টালিকাত আছে ৩৮০ খন দোকান, পৌৰ নিগমৰ বাবে কাৰ্যালয়ৰ বাবে স্থান আৰু এটা ‘কমিউনিটী হল’। দীঘলীয়া ১৩ বছৰৰ অপেক্ষাৰ অন্তত যোৱা ফেব্ৰুৱাৰীত গৃহ নিৰ্মাণ আৰু নগৰ পৰিক্ৰমা মন্ত্ৰী জয়ন্ত মল্লবৰুৱাই বজাৰ গৃহ উদ্বোধন কৰে। একে সময়তে গণেশগুৰিৰ নতুন বজাৰ গৃহও প্রায় সম্পূৰ্ণ হৈ উঠিছিল আৰু মুখ্যমন্ত্রী ড° হিমন্ত বিশ্ব শর্মাই উদ্বোধন কৰাৰ কথা আছিল; কিন্তু নির্মাণ সম্পূর্ণ হ’ল যদিও মূৰকত বাতিল হ’ল উদ্বোধনী অনুষ্ঠান। বেলতলাত উদ্বোধনৰ পাছতো ব্যৱসায়ীসকলে নিজৰ দোকান খুলিব পৰা নাই বুলি অভিযোগ উঠিছে। পার্কিং স্থানত পানী জমা হৈ লেতেৰা পানী বৈ যাবলৈ ধৰিছে। দেৱালত শেলুৱৈ বগাবলৈ লৈছে।
আনহাতে, কোনে দোকান পাব, কাক কিমানত দিয়া হ’ল, সেই আবণ্টন প্রক্রিয়াও এতিয়াও সকলোৰে বাবে স্পষ্ট নহয়। আনফালে, গণেশগুৰিত উদ্বোধনৰ পূৰ্বেই সৃষ্টি হৈছিল বিবাদৰ। নতুন বজাৰ গৃহৰ সন্মুখৰ হাঁহ-কুকুৰাৰ বজাৰখন খালী কৰিবলৈ পৌৰ নিগমে নির্দেশ দিয়াৰ পাছত ব্যৱসায়ীসকলে প্রতিবাদ কৰিছিল। তেওঁলোকৰ দাবী আছিল, ২০১৪তে পৌৰ নিগমৰ আশ্বাসত তেওঁলোকে স্থান খালী কৰি দিছিল। নতুন বজাৰ গৃহত তেওঁলোকক ঠাই দিয়া হ’ব বুলি কোৱা হৈছিল, কিন্তু আজিও পুনৰ সংস্থাপনৰ স্পষ্ট ছবি পোৱা নাই।
দৰাচলতে এই দুয়োখন বজাৰৰ কাহিনী ২০০৭ৰ পৰাই আৰম্ভ হৈছিল; যেতিয়া পৌৰ নিগমে উজানবজাৰ, গণেশগুৰি আৰু বেলতলাক ব্যক্তিগত বিনিয়োগৰ সহযোগত নিৰ্মাণ কৰিবলৈ বিচাৰিছিল। ব্যৱসায়ীসকলে ইয়াৰ বিৰোধিতা কৰাৰ পাছত বছৰ বছৰ ধৰি চলিল আইনী জটিলতা। অৱশেষত পৌৰ নিগমে নিজেই নিৰ্মাণৰ দায়িত্ব ল’বলগীয়া হয়।
এই সম্পৰ্কত গণেশগুৰি বজাৰ সমিতিৰ সাধাৰণ সম্পাদক ভৈৰৱ কলিতাই কয়, ‘আমি ক্ষুদ্ৰ ব্যৱসায়ীসকলে দীর্ঘদিনৰ পৰা অপেক্ষা কৰি আছিলো যে সুন্দৰ পৰিৱেশ এটাত আমি ভালদৰে ব্যৱসায় কৰিব পাৰিম; কিন্তু আজিলৈ সেয়া সম্ভৱ নহ’ল। আমি বিভাগীয় কর্তৃপক্ষক বহুবাৰ অনুৰোধ জনালো; কিন্তু সহাঁৰি পোৱা নাই। গণেশগুৰি বজাৰ সমিতিৰ অন্তৰ্গত প্রায় ২৫০ জন ক্ষুদ্ৰ ব্যৱসায়ী আছে। এইসকলৰ আধা সংখ্যকে ইমান দিনৰ পৰা গুৱাহাটী পৌৰ নিগমৰ গৃহত ব্যৱসায় কৰিম বুলি দীর্ঘদিন ধৰি অপেক্ষা কৰি আছে; কিন্তু কেতিয়ালৈ সেয়া সম্ভৱ হ’ব তাৰ কোনো নিশ্চয়তা নাই।’
ইপিনে, একাংশ ব্যৱসায়ীয়ে পৌৰ নিগমৰ গৃহ আবন্টন লাভ কৰিবলৈ দোকান নিদিলেও মাহিলি ঘৰভাড়া আদায় দি আছে। মাহিলি ৫৬০ টকাকৈ পৌৰ নিগমক এইসকল ব্যৱসায়ীয়ে ভাড়া দি আছে বুলি সূত্রই জনায়। আনহাতে, বেলতলা আৰু গণেশগুৰিত নিৰ্মাণ হোৱা এই বজাৰ গৃহসমূহত একাংশ অসাধু লোকৰ বাবে জুৱা, মদ আৰু ভাঙৰ আড্ডাস্থলী হৈ পৰিছে। নিশা হ’লেই একাংশ উদণ্ড যুৱকে ভিৰ কৰে।
এই সম্পর্কত নয়নজ্যোতি কলিতা নামৰ এজন নাগৰিকে যোৱা ২০ আগষ্টত তথ্য জনাৰ অধিকাৰ আইন, ২০০৫ ৰ অধীনত পৌৰ নিগমৰ ওচৰত তথ্য বিচাৰি আবেদন কৰিছিল; কিন্তু তিনি মাহৰ পাছতো সংশ্লিষ্ট বিভাগে কোনো তথ্য দাখিল নকৰাত যোৱা তিনি নৱেম্বৰত পৌৰ নিগমৰ ৰাজহুৱা তথ্য বিষয়াই কার্যবাহী অভিযন্তাসকললৈ আৰটিআইৰ জৰুৰী সোঁৱৰণ জাৰি কৰি দুদিনৰ ভিতৰত তথ্য দাখিল কৰিবলৈ নিৰ্দেশ দিয়ে। অন্যথা আৰটিআই আইন অনুসৰি শাস্তিমূলক ব্যৱস্থা লোৱা হ’ব পাৰে বুলি সকীয়াই দিয়ে।
ADVERTISEMENT
