এদিনতে সৰ্বাধিক আক্ৰান্ত দেশত:কৰ’না ভাইৰাছৰ সংক্ৰমণ বৃদ্ধি

নতুন দিল্লী,২০ মাৰ্চঃ ভাৰতত বৃদ্ধি পাইছে কৰ’না ভাইৰাছৰ সংক্ৰমণ ৷ এই বিধ্বংসী ভাইৰাছত আক্ৰান্ত হোৱাৰ পাছত দেশত এই সংখ্যা হয়গৈ প্ৰায় 283জন ৷ইয়াৰ ভিতৰত ৩২ জন বিদেশী নাগৰিক ৷ এই পৰ্যন্ত দেশত কৰ’নাৰ বাবে মৃত্যু হৈছে কমেও পাঁচজনৰ ৷ইতিমধ্যে জয়পুৰত মৃত্যু ঘটে ইটালীৰ এজন পৰ্যটকৰ ৷ইফালে প্ৰধানমন্ত্ৰী নৰেন্দ্ৰ মোডীয়ে ২২ মাৰ্চত দেশবাসীক জনতা সান্ধ্য আইন পালনৰ আহ্বান জনাই কয় যে এটা দিনৰ সহযোগও ভাইৰাছৰ সংক্ৰমণৰ শৃংখলা ভংগ কৰাত সহায় কৰিব ৷কেন্দ্ৰীয় চৰকাৰে ইতিমধ্যে আন্তৰ্জাতিক বিমান সেৱা বন্ধ কৰিছে ৷ ঠায়ে ঠায়ে বিভিন্ন ৰাজ্যত ৰাজহুৱা সমাগম ঘটা অঞ্চলসমূহ বন্ধ কৰা হৈছে। ব্যক্তিগত কোম্পানীসমূহৰ অধিকাংশতে কৰ্মচাৰীক ঘৰৰ পৰা কাম কৰিবলৈ কোৱা হৈছে ৷কেন্দ্ৰীয় চৰকাৰেও কৰ্মচাৰীসকলৰ পৰিমাণ হ্ৰাস কৰিবলৈ সাময়িকভাৱে দিনপঞ্জী প্ৰস্তুত কৰি ব্যৱস্থা লৈছে ৷ কেন্দ্ৰীয় স্বাস্থ্য মন্ত্ৰ্যালয়ৰ বিষয়াই কয় যে বজাৰত প্ৰয়োজনীয় সামগ্ৰী নাটনি নহয় আৰু সেয়ে কোনো আতংকিত হোৱাৰ কাৰণ নাই ৷তদুপৰি ধৰ্মীয় সমাৱেশৰ পৰা আঁতৰি থাকিবলৈ তেওঁলোকে আহ্বান জনোৱাৰ লগতে উৎসৱ আদি থাকিলে পিছুৱাই দিবলৈ পৰামৰ্শ দিয়ে ৷ভাৰতীয় চিকিৎসা গৱেষণা পৰিষদৰ মতে মহামাৰীৰ দ্বিতীয় পৰ্যাঃ আছে ভাৰত ৷ ইয়াৰ অৰ্থ হৈছে স্থানীয়ভাৱে বিয়পি পৰা ৷ গতিকে জনতা কাৰ্ফিউৰ সময়ত কোনো লোকে নিজৰ ঘৰ ত্যাগ কৰিব নালাগে অথবা চুবুৰীয়াৰ সৈতে গৈ আলোচনাত মিলিত হ’ব নালাগে ৷দূৰত্ব বজাই ৰাখিব ৷প্ৰধানমন্ত্ৰীৰ ভাষ্যক দোহাৰে স্বাস্থ্য বিষয়াই ৷ সম্প্ৰতি পৰিস্থিতিত বিভিন্ন শিক্ষানুষ্ঠান,অন্যান্য ৰাজহুৱা স্থানসমূহ বন্ধ কৰি দিয়া হৈছে ৷ দিল্লীৰ মুখ্যমন্ত্ৰী অৰবিন্দ কেজৰিৱালে ঘোষণা কৰে যে দিল্লীত সকলো শ্বপিংমল বন্ধ কৰি দিয়া হ’ব ৷পঞ্জাৱত সকলো ধৰণৰ ৰাজহুৱা পৰিবহণ ব্যৱস্থা বন্ধ কৰি দিয়া হৈছে ৷ দেশৰ ভিতৰত সৰ্বাধিক ৫২ জন আক্ৰান্ত হোৱা আক্ৰান্ত হোৱা মহাৰাষ্ট্ৰ,ওড়িছা,পশ্চিমবংগ আৰু আন বহুতো ৰাজ্যত একে ব্যৱস্থা লোৱা হৈছে ৷ উত্তৰ প্ৰদেশ,অন্ধ্ৰপ্ৰদেশ,মহাৰাষ্ট্ৰ,তামিলনাডুত নতুনকৈ কেইবাজনো লোক সংক্ৰমিত হৈছে ৷ চণ্ডীগড়তো এজন আক্ৰান্ত হৈছে ৷উত্তৰ প্ৰদেশ,ৰাজস্থানসহ বিভিন্ন ৰাজ্যৰ সমাবেশত বাধা দিবলৈ ১৪৪ ধাৰা জাৰি কৰোৱা হৈছে ৷ আনহাতে মুম্বাই,পুনে আৰু নাগপুৰত সম্পূৰ্ণৰূপে বন্ধ ঘোষণা কৰা হৈছে ৷মুম্বাইৰ চৰকাৰী কাৰ্যালয়ত ২৫ শতাংশ কৰ্মচাৰীৰ উপস্থিতিৰ ব্যৱস্থা কৰা হৈছে ৷অৱশ্যে জৰুৰীকালীন সেৱা অব্যাহত থাকিব ৷নিত্য ব্যৱহাৰ্য্য সামগ্ৰী উপলব্ধ হ’ব ৷আনহাতে প্ৰধানমন্ত্ৰী নৰেন্দ্ৰ মোডীয়ে ভিডিঅ’ কনফাৰেন্সৰ যোগেদি কেইবাখনো ৰাজ্যৰ মুখ্যমন্ত্ৰীৰ লগত বাৰ্তালাপ কৰে ।পঞ্জাৱ,মহাৰাষ্ট্ৰ,উত্তৰ প্ৰদেশ আদি ৰাজ্যসমূহৰ মুখ্যমন্ত্ৰীসকলে তাত অংশ লয় ৷উপস্থিত থাকে কেন্দ্ৰীয় স্বাস্থ্যমন্ত্ৰী ডাঃ হৰ্ষবৰ্ধন ৷