iPhoneAddiction :📌দৈনিক অগ্ৰদূত ডিজিটেল ডেস্ক: ধৰক আপোনাৰ বা আপোনাৰ পৰিয়ালৰ মাহিলি আয় ৪০-৫০ হেজাৰ টকা। এই আয়ৰে আপুনি পৰিয়াল পোহপাল দি আছে। কিন্তু আপুনি বা আপোনাৰ সন্তানে সময়ৰ স’তে সময় তথা বন্ধুবৰ্গৰ স’তে তাল মিলাই চলিবলৈ এটা আইফোন ক্রয় কৰিবলৈ মনস্থ কৰিছে। এনে অৱস্থাত হয়তো আপুনি ঋণ লৈ মন পছন্দৰ এটা আইফোন ক্রয় কৰিলে। তাৰ বিনিময়ত মাহিলি নির্দিষ্ট হাৰৰ কিস্তি পৰিশোধ কৰি থাকিব লাগিব।
কেৱল আপুনিয়েই নহয়, ভাৰতত আপোনাৰ দৰে কোটি কোটি লোকে ইএমআইত আইফোন ক্রয় কৰিবলৈ লৈছে। কাৰণ একোটা আইফোনৰ প্ৰাৰম্ভিক মূল্য আৰম্ভ হয় ৭৫ হেজাৰ টকাৰ পৰা। কিন্তু কল্পনা কৰকচোন আপোনাতকৈ বহু গুণে কম আয় কৰা বা কোনোমতে জীৱন নিৰ্বাহ কৰি থকা কোনো পৰিয়ালৰ এজনে যদি এটা বিলাসী আইফোন ক্ৰয় কৰিবলৈ বিচাৰে তেতিয়া কেনে পৰিস্থিতিৰ উদ্ভৱ হ’ব পাৰে?
এনে এজন লোকে ধাৰ-ঋণ কৰি এটা আইফোন ক্ৰয় কৰিলেও পৰিয়ালটোৰ মূৰত বৃহৎ ধাৰৰ বোজা পৰাটো নিশ্চিত। ইতিমধ্যে অত্যাৱশ্যকীয় সামগ্ৰীৰ আকাশলংঘী মূল্যবৃদ্ধিয়ে দৰিদ্ৰ আৰু মধ্যবিত্ত পৰিয়ালসমূহক জুৰুলা কৰিছে। এনে অৱস্থাতে বহুজাতিক কোম্পানীসমূহে ভাৰতৰ বজাৰতো মেলি দিয়া চৌখিন বা বিলাসী সামগ্ৰীৰ মোহত বন্দী হৈছে অনেক। এনে সামগ্রী ক্রয় কৰিবলৈ বহুতে ধাৰ-ঋণ কৰি দুশ্চিন্তাৰ বোজা মূৰত জাপি লৈছে।
শুকুৰবাৰে মাথোঁ এটা আইফোনৰ বাবেই মহাৰাষ্ট্ৰৰ এটা তিনিজনীয়া পৰিয়াল নিঃশেষ হোৱাত সম্প্ৰতি ভাৰতৰ দৰে নিম্নবিত্ত দেশতো একপ্ৰকাৰ অপ্রয়োজনীয় বিলাসী সামগ্ৰীয়ে কেনেদৰে কোটি কোটি লোকক মোহান্ধ কৰিছে সেই কথা ব্যাপকভাৱে চর্চিত হৈছে। উল্লেখ্য যে এক সমীক্ষা অনুসৰি ১৪০ কোটি জনসংখ্যাৰ দেশ ভাৰতত পাঁচ কোটিতকৈও কম পৰিয়ালৰহে মাহিলি আয় ৭৫ হেজাৰ টকা।
অথচ এটা আইফোনৰ প্ৰাৰম্ভিক মূল্যই হৈছে ৭৫ হেজাৰ টকা। তৎসত্ত্বেও ভাৰতত আইফোনৰ বজাৰ বিশাল। ধাৰ-ঋণ কৰিও বহুতে মনৰ চখ পূৰাবলৈ আইফোন ক্ৰয় কৰিছে। এই সম্পৰ্কত কাউণ্টাৰ পইন্ট ৰিছাৰ্চ নামৰ স্বতন্ত্ৰ বজাৰ গৱেষণাকাৰী সংস্থাৰ মতে ভাৰতৰ আইফোন ক্রেতাসকলৰ কমেও ৪২ শতাংশই ইএমআইত এনে বিলাসী ফোন ক্ৰয় কৰিছে।
অথচ আইফোনতকৈ বহু গুণে কম দামৰ স্মার্টফোনৰ জৰিয়তেও সুকলমে প্রয়োজনীয় কাম-কাজ সম্পাদন কৰিব পাৰি। উক্ত সংস্থাৰ মতে ধাৰ-ঋণ কৰি একোটা বিলাসী স্মার্টফোন ক্ৰয় কৰাটো ভাৰতত এক সাধাৰণ ঘটনাত পৰিণত হ’বলৈ ধৰিছে। কেৱল বৃহৎ মহানগৰসমূহতে নহয়, সৰু-সুৰা নগৰ-চহৰ তথা গ্রামাঞ্চলসমূহতো এনে আইফোন ক্রেতাৰ সংখ্যা দ্রুতগতিত বৃদ্ধি পাবলৈ ধৰিছে।
লক্ষ্যণীয়ভাবে আইফোনৰ এনে চাহিদা প্রত্যক্ষ কৰি স্মার্টফোন উদ্যোগসমূহেও ইএমআইত স্মার্টফোন বিক্ৰী আৰম্ভ কৰিছে। গুৱাহাটীৰ লেখীয়া মহানগৰসমূহতো ইএমআইত বৃহৎ হাৰত স্মার্টফোন বিক্ৰী হ’বলৈ ধৰিছে। আনকি এই ক্ষেত্রত এনে মহানগৰসমূহে বৃহৎ মহানগৰসমূহক চেৰ পেলাইছে।
উল্লেখ্য যে এটা আইফোনৰ বাবেই মহাৰাষ্ট্ৰৰ ছম্ভাজিনগৰ জিলাৰ যিটো তিনিজনীয়া পৰিয়াল কালি নিঃশেষ হ’ল সেই পৰিয়ালৰ মুৰব্বীজন সাধাৰণ গাড়ীচালক আছিল। তেওঁৰ ১৯ বছৰীয়া পুত্রই এটা বিলাসী আইফোন ক্ৰয় কৰি দিবলৈ পিতৃক তাগিদা দি আছিল। আর্থিকভাৱে দুৰ্বল পিতৃয়ে পুত্ৰৰ আবদাৰ পূৰণত অসমৰ্থ হোৱাৰ বাবেই পুত্ৰই পাহাৰৰ ওপৰৰ পৰা জঁপিয়াই আত্মহত্যা কৰে।
পুত্ৰক বচাবলৈ গৈ দৰিদ্ৰ গাড়ীচালকজনেও পাহাৰৰ ওপৰৰ পৰা পৰি মৃত্যুক সাবটি লয়। এই দৃশ্য প্রত্যক্ষ কৰি থকা তেওঁৰ পত্নীয়েও স্বামী-পুত্ৰৰ মৃত্যু নিশ্চিত অনুভৱ কৰি পাহাৰৰ তললৈ জাঁপ দি আত্মহত্যা কৰে। বহু লোকৰ সম্মুখতে এই শিহৰণকাৰী ঘটনা সংঘটিত হয়। ইয়াৰ লগে লগে চর্চা হৈছে কিদৰে ভাৰতৰ লেখীয়া নিম্নবিত্তৰ দেশত বহুজাতিক প্রতিষ্ঠানৰ বিলাসী সামগ্রী কেনেদৰে একাংশক মোহান্ধ কৰিছে।
অৱশ্যে ইয়াৰ বাবে দায়ী কোন সেয়া নিশ্চিত কৰাটোও সহজ নহয়। বহুতে সম্ভৱতঃ পৰিৱৰ্তিত সময়ক দোষাৰোপ কৰিব। লক্ষ্যণীয়ভাৱে বিগত শতিকাৰ ৯০ দশকৰ আৰ্থিক উদাৰীকৰণৰ পাছৰ পৰাই ভাৰতৰ বজাৰতো বিদেশী বহুজাতিক কোম্পানীৰ বিলাসী পণ্য উপচি পৰিবলৈ ধৰে। ইয়াৰে শেহতীয়া সংযোজন হ’ল আইফোনৰ লেখীয়া বিলাসী ফোন।
