ৰাজ্যত ১.২৮ লাখৰ স্বাস্থ্য পৰীক্ষা, হ্ৰাস পাইছে চেনিটাইজাৰৰ যোগান

প্ৰতিনিয়ত বিশ্বৰ নতুন নতুন দেশলৈ সংক্ৰমিত হৈছে মৃত্যুদূতৰূপী কৰ’না ভাইৰাছ। কালি পৰ্যন্ত বিশ্বৰ ১৭৬ খন ৰাষ্ট্ৰত অৱস্থিতি ধৰা পৰা কৰ’না ভাইৰাছে আজি বিশ্বৰ ১৮২ খন দেশত ত্ৰাসৰ সৃষ্টি কৰিছে। আজি পৰ্যন্ত ভাৰতবৰ্ষত প্ৰায় 283জন আক্রান্ত হোৱাৰ বিপৰীতে কৰ’না ভাইৰাছত আক্রান্ত হৈ মৃত্যুমুখত পৰা লোকৰ সংখ্যা পাঁচজনলৈ বৃদ্ধি পায়। ইয়াৰ পৰিপ্ৰেক্ষিততে অসমতো যুদ্ধকালীন প্ৰস্তুতিৰে কৰ’না ভাইৰাছৰ সংক্ৰমণ প্ৰতিৰোধৰ বাবে প্ৰচেষ্টা অব্যাহত ৰাখিছে ৰাজ্য চৰকাৰে।সেইমৰ্মে আজিপৰ্যন্ত সমগ্র ৰাজ্যত ১,২৭,৮৯৫ জন লোকৰ স্বাস্থ্য পৰীক্ষা সম্পন্ন কৰে স্বাস্থ্য বিভাগে। অৱশ্যে আজি পৰ্যন্ত কৰ’না ভাইৰাছত আক্রান্ত হোৱা নাই ৰাজ্যৰ কোনো লোক। স্বাস্থ্য বিভাগৰ এক শীৰ্ষ সূত্ৰই জনোৱা মতে, বিশ্ব স্বাস্থ্য সংস্থাই আগবঢ়োৱা পৰামৰ্শ অনুসৰি ৰাজ্যৰ প্রান্তে প্রান্তে ইখন ঠাইৰ পৰা সিখন ঠাইলৈ যাত্রা কৰা যাত্ৰীৰ স্বাস্থ্য পৰীক্ষা সম্পন্ন কৰা হৈছে।লগতে সংশ্লিষ্ট যাত্ৰীসকলৰ শেহতীয়া যাত্ৰাৰ সবিশেষ তথ্য আহৰণৰ জৰিয়তে প্ৰয়োজনীয় তথ্য আহৰণ কৰা হৈছে।ইয়াৰ ভিত্তিত আজি পৰ্যন্ত সমগ্র ৰাজ্যত ১,২৭,৮৯৫ জন লোকৰ স্বাস্থ্য পৰীক্ষা সম্পন্ন কৰা হয়। ইয়াৰে ২১,৬৩৮ জন স্বাস্থ্য পৰীক্ষা ৰাজ্যৰ বিভিন্ন প্ৰান্তৰ বিমানকোঠাত সম্পন্ন কৰা হৈছে। সংশ্লিষ্ট সকলৰ ভিতৰত ১৭,৪৬১ জনৰ মহানগৰীৰ ঝৰঝাৰস্থিত লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানকোঠাত, ১৩৬১ জন ডিব্ৰুগড়ৰ মোহনবাৰী বিমানকোঠাত, ১৯৭৬ জন যোৰহাটৰ ৰৰৈয়া বিমানকোঠাত, পাঁচশজন শিলচৰৰ কুম্ভীৰগ্রাম বিমানকোঠাত, ৬১০ জন লখিমপুৰৰ লীলাবাৰী বিমানকোঠাত আৰু তেজপুৰৰ শালনীবাৰী বিমানকোঠাত আজি পৰ্যন্ত ৯৩ জন লোকৰ স্বাস্থ্য পৰীক্ষা সম্পন্ন কৰা বুলি সূত্ৰটোৱে জনায়।একেদৰে ৰাজ্যৰ বিভিন্ন প্ৰান্তৰ জাহাজঘাটত ৫,৭১৪ জন আৰু বিভিন্ন ৰেল ষ্টেচন-জংচন তথা বাছ আস্থানত ১,০০,৫৪৩ জন লোকৰ স্বাস্থ্য পৰীক্ষা সম্পন্ন কৰা বুলি সূত্ৰটোৱে উল্লেখ কৰে।।
অন্যহাতে, সংশ্লিষ্ট লোকসকলৰ ভিতৰত ১,৫৬৩ জনে কৰ’না ভাইৰাছ সংক্ৰমিত হোৱা দেশৰ পৰা আহি অসমত উপস্থিত হৈছে । ইয়াৰে ১৯৩ জন লোকে ইতিমধ্যে চিকিৎসাৰ পৰ্যবেক্ষণত ২৮ দিন অতিক্ৰম কৰাৰ বিপৰীতে আন ১৩৭০ জনক নিজ গৃহত আছুতীয়াকৈ ৰখাৰ ব্যৱস্থা কৰা হৈছে। একেদৰে ৰাজ্যৰ চাৰিটা পৰীক্ষা কেন্দ্ৰত মুঠ ৪৬ টা নমুনা পৰীক্ষাৰ ব্যৱস্থা কৰা হয়। ইয়াৰে দুটা নমুনা পুনেস্থিত এন আই ভিত, ডিব্ৰুগড়ৰ লাহোৱালস্থিত আৰ এন আৰ চিত ১১টা, জি এম চি হাস্পতালত ২৮ টা, যোৰহাট চিকিৎসা মহাবিদ্যালয় হাস্পতালত তিনিটা আৰু শিলচৰ চিকিৎসা মহাবিদ্যালয় হাস্পতালত দুটা নমুনাৰ পৰীক্ষা সম্পন্ন কৰা হয়। অৱশ্যে কেউটা নমুনাৰ পৰীক্ষাৰ প্ৰতিবেদন নিগেটিভ বুলি জনায় স্বাস্থ্য বিভাগে।