দৰং জিলাত ক’ভিড-১৯ ৰ সংক্ৰমণে ভয়াৱহ ৰূপ ধাৰণ কৰাৰ সময়তে মঙলদৈৰ এগৰাকী চিকিৎসকে ব্যতিক্ৰমী ভাৱে নিজৰ জন্মদিন পালন কৰি সকলোৰে দৃষ্টি আকৰ্ষণ কৰিবলৈ সক্ষম হৈছে । মঙলদৈ নগৰৰ
মাজমজিয়াৰ ৰাধিকা এক্সৰে এণ্ড ইমেজিং চেন্টাৰ নামৰ চিকিৎসা প্ৰতিষ্ঠানখনৰ স্বত্বাধিকাৰী ডাঃ অৰবিন্দ ডেকাৰ জন্মদিন আছিল যোৱা ১১ জুলাইত । কিন্তু কেক কাটি বা বন্ধু-বান্ধৱীক আমন্ত্ৰণ কৰি, বেলুন ফুলাই, ৰঙা-নীলা লাইট জ্বলাই, মাছ-মাংসৰ পাৰ্টি দি পালন কৰা নাই তেওঁৰ জন্মদিন । জন্মদিন পালন কৰিছে অসাধাৰণভাৱে ।
নিজৰ জন্মদিনৰ দিনা তেওঁ মঙলদৈৰ এল এন বি পথৰ সমীপত টেঙাবাৰীত থকা বাসগৃহ ৰাধিকা ভৱনৰ সন্মুখত টেবুল চকী পাৰি লৈ বহিছিল জন্মদিন পালন কৰিবলৈ । মাস্ক পৰিধান নকৰাকৈ ৰাজবাটেৰে অহা যোৱা কৰা পথচাৰীক হাতযোৰ কৰি অতি বিনয়েৰে তেওঁ কৈছিল কৰ’নাৰ ভয়াৱহতা আৰু মাস্ক পৰিধানৰ প্ৰয়োজনীয়তাৰ কথা। মাস্ক নথকা লোকসকলৰ হাতত তুলি দিছিল একোখনকৈ মাস্ক। মাস্ক এখন বিনামূল্যে পাই পৰম আনন্দ লাভ কৰা বাটৰুৱাই ডাঃ অৰবিন্দ ডেকাক দি যায় জন্মদিনৰ শুভেচ্ছা নাইবা আশীৰ্বাদ।
কেৱল মাত্ৰ এদিন মাস্ক বিতৰণ কৰিয়েই দায়িত্ব সামৰা ড° ডেকাই । নিজৰ জন্মমাহ বুলি অহা ৩১ জুলাইলৈ এনেদৰে দৰিদ্ৰ বাটৰুৱাৰ মাজত বিনামূলীয়াকৈ দহ হাজাৰ মাস্ক বিতৰণৰ পৰিকল্পনা গ্ৰহণ কৰিছে এইগৰাকী মানৱ দৰদী চিকিৎসকে । ইতিমধ্যে এক হাজাৰতকৈও অধিক মাস্ক তেওঁ বিতৰণ কৰিছে।
ক’ভিডৰ এনে দুৰ্যোগময় পৰিস্থিতিৰ সময়ত মুখ, নাক ঢাক খোৱাকৈ মাস্ক পৰিধান কৰা, সঘনাই চাবোনেৰে হাত ধোৱা, ঘৰৰ বাহিৰলৈ ওলাই গৈ ঘূৰি আহি ভালদৰে গা ধুই হে ঘৰত প্ৰৱেশ কৰা, লগতে পিন্ধি যোৱা কাপোৰখিনি ধুই দিয়া, চশমা পিন্ধা, মুৰত টুপি পিন্ধা, হাতত চেনিটাইজাৰ লগোৱা, মানুহৰ ভিৰৰ মাজলৈ নগৈ শাৰীৰিক দূৰত্ব বজাই ৰখা আদি সাৱধানতা অৱলম্বন কৰাই হৈছে ক’ভিডৰ পৰা বাচি থকাৰ মূল উপায় বুলি ডাঃ অৰবিন্দ ডেকাই সৰ্বসাধাৰণ ৰাইজৰ মাজত কৰ’নাৰ বিষয়ে ব্যাপক সজাগতাৰ সৃষ্টি কৰে ।