গুৱাহাটী উচ্চ ন্যায়ালয়কে ধৰি ৰাজ্যৰ সকলোবোৰ আদালতত পূৰ্বৰ পৰম্পৰাৰে নিয়মীয়া কাম কাজ প্ৰৱৰ্তন কৰা আৰু উকীল সন্থাৰ কাৰ্যালয় তথা পুথিভঁৰালসমূহ খোলাৰ দাবীত ৰাজ্যৰ প্ৰতিখন আদালতৰ সন্মুখত ধৰ্ণা কাৰ্যসূচী ৰূপায়ণ কৰিব অধিবক্তা সমাজে ৷ এক সংবাদমেল এই কথা সদৰী কৰি উত্তৰ পূৰ্বাঞ্চল বাৰ কাউন্সিলৰ অধ্যক্ষ তথা জ্যেষ্ঠ অধিবক্তা হাফিজ ৰছিদ আহমেদ চৌধুৰীয়ে কয় যে অতিমাৰী কৰ’নাৰ সংক্ৰমণ প্ৰতিৰোধৰ উদ্দেশ্য অব্যাহত থকা তলাবন্ধৰ ক্ষেত্ৰত থকা নীতি-নিৰ্দেশনাসমূহ ইতিমধ্যে শিথিল কৰিছে ৰাজ্য প্ৰশাসনে ।
ইয়াৰ আধাৰতে ৰাজ্য চৰকাৰৰ মূৰব্বী বিভাগসমূহকে ধৰি সঞ্চালকালয় তথা চৰকাৰী কাৰ্যালয়সমূহত এশ শতাংশই বিষয়া কৰ্মচাৰী উপস্থিতিৰে কাম কাজ আৰম্ভ কৰাৰ বাবে নিৰ্দেশনা জাৰি কৰিছে ৰাজ্য চৰকাৰে । কিন্তু আশ্চৰ্যকৰভাৱে গুৱাহাটী উচ্চ ন্যায়ালয়কে ধৰি ৰাজ্যৰ অন্যান্য প্ৰান্তত থকা আদালতসমূহৰ সকলো ধৰণৰ কাম কাজ বন্ধ ৰাখিছে উচ্চ ন্যায়ালয়ৰ মুখ্য ন্যায়াধীশ অজয় লাম্বাই । ফলত সুদীৰ্ঘ পাঁচমাহ ধৰি প্ৰাপ্য ন্যায়ৰ পৰা বঞ্চিত হৈছে ভুক্তভোগী জনতা ৷
লগতে উকীল সন্থাৰ কাৰ্যালয় তথা পুঁথিভৰালসমূহ বন্ধ ৰখাৰ বাবে অধিবক্তাসকলৰ বিদ্যায়তনিক পৰিবেশো বিনষ্ট হৈছে । তদুপৰি আৰ্থিক সংকটৰ সন্মুখীন হৈছে বহু অধিবক্তা । তেওঁলোকে স্মাৰক পত্ৰ প্ৰদান কৰিছে যদিও সুফল পোৱা নাই । ইয়াৰ লগতে সংগতি ৰাখি ৰাজ্যৰ প্ৰতিখন আদালতৰ সন্মুখত আজি পুৱা ১১.৩০ৰ পৰা ধৰ্না কাৰ্যসূচী কৰা হ’ব। ইফালে সূদীৰ্ঘ পাঁচমাহ ধৰি আদালতৰ কাম কাজ বন্ধ থকাৰ কাৰণে নিষ্পত্তি কৰা গোচৰৰ ক্ষতিপূৰণো আজি পৰ্যন্ত ভূক্তভোগীয়ে লাভ কৰা নাই বুলি মন্তব্য কৰে অসম উকীল সন্থাৰ সম্পাদক দীপক কুমাৰ দাসে ।
লগতে আদালতৰ কাম কাজ যদি নিয়মীয়া নহয় তেন্তে অনাগত দিনত আদালতৰ বোজাও বৃদ্ধি পাব বুলি তেওঁ উল্লেখ কৰে। তদুপৰি আদালতৰ কাম কাজ বন্ধ ৰাখি উচ্চ ন্যায়ালয়ৰ মুখ্য ন্যায়াধীশে অধিবক্তা সমাজৰ বৃত্তিগত অধিকাৰ খৰ্ব কৰা বুলি উল্লেখ কৰি দাসে কয় যে আদালতৰ ৮০ শতাংশ কাম কাজ নিম্ন আদালতৰ ওপৰত ন্যস্ত থাকে।
কেৱল জামিন সম্পৰ্কীয় তথা আদি জৰুৰী গোচৰসমূহে ভাৰ্চুৱেল কোৰ্টৰ জৰিয়তে নিষ্পত্তি নিৰ্দেশ দিয়া হৈছে ৷ অথচ এই ব্যৱস্থাটো আসোঁৱাহপূৰ্ণ৷গতিকে এনেবোৰ বহু কাৰণতে আজি সন্থাই প্ৰতিবাদী কাৰ্যসূচী ৰূপায়ণ কৰিব বুলিও তেওঁ কয় । এই সংবাদমেলত বহু বিষয়বীয়া উপস্থিত থাকে ৷