মহাত্মা গান্ধী ৰাষ্ট্ৰীয় গ্রাম্য নিয়ােগ নিশ্চিত আঁচনি (এম জি এনৰেগা)ৰ অধীনত ভাৰত চৰকাৰে আবণ্টন দিয়া ৬৫০ লাখ কর্মদিনৰ লক্ষ্য নির্ধাৰিত সময়ৰ আগতে সম্পূর্ণ কৰিলে অসম চৰকাৰৰ পঞ্চায়ত আৰু গ্রামােন্নয়ন বিভাগে। উল্লেখ্য যে বছৰজুৰি চলা ক’ভিড-১৯ মহামাৰীৰ আতংকময় পৰিৱেশৰ বাবে ভাঙি যাব খােজা গ্রাম্য অর্থনীতি টনকিয়াল কৰি ৰখাৰ ক্ষেত্ৰত গ্রাম্য দুখীয়া তথা শ্রমজীৱী লােকসকলক মজুৰিভিত্তিক কর্মসংস্থান প্রদানেৰে পঞ্চায়ত আৰু গ্রামােন্নয়ন বিভাগে তৎপৰতাৰে সক্রিয় ভূমিকা পালন কৰে।
মহাত্মা গান্ধী এনৰেগাৰ অধীনত কুশলতাৰে কাম প্রদান কৰি তলাবন্ধৰ সময়ত দুখীয়া গ্রাম্য জনসাধাৰণক সহায় আগবঢ়াবলৈ সক্ষম হােৱাৰ ফলত দুমাহ বাকী থকা অৱস্থাতেই নির্ধাৰিত কর্মদিন অতিক্ৰম কৰিবলৈ সক্ষম হয়।মুখ্যমন্ত্রী সর্বানন্দ সােণােৱালে এই সফলতাৰ বাবে বিভাগীয় মন্ত্রী নৱ কুমাৰ দলেৰ লগতে সকলাে বিষয়া-কৰ্মচাৰীকে অভিনন্দন জানায়। বিভাগে যে দুখীয়া গ্রাম্য জনসাধাৰণক সহায় কৰিবৰ বাবে সম্পূর্ণ দায়বদ্ধতাৰে কাম কৰিছে, এই সফলতাই তাকেই সূচাইছে বুলি উল্লেখ কৰি মুখ্যমন্ত্ৰীয়ে গ্রামােন্নয়নৰ প্ৰতিখন আঁচনিয়েই নির্ধাৰিত সময়ত সম্পূর্ণ কৰাৰ ক্ষেত্ৰতাে গুৰুত্ব আৰােপ কৰে।
সােণােৱালে আশা প্রকাশ কৰে যে টীম পি এণ্ড আৰ ডিয়ে একেই উৎসাহ আৰু দায়বদ্ধতাৰে প্ৰধানমন্ত্রী আৱাস যােজনা গ্রামীণৰ অধীনত গৃহ লাভ কৰিবলগীয়া সকলাে উপযুক্ত হিতাধিকাৰীৰ আৱাস গৃহও নির্ধাৰিত সময়ত সম্পূর্ণ হােৱাটো সুনিশ্চিত কৰি ২০২২ৰ ভিতৰত সকলােৰে বাবে গৃহ প্ৰদানৰ অৰ্থে থকা প্রধানমন্ত্রীৰ সপােন বাস্তৱায়িত কৰাৰ ক্ষেত্ৰত অসমে পূর্ণ সহযােগিতা আগবঢ়াবলৈ সক্ষম হব। বিভাগীয় মন্ত্রী দলেয়ে নির্ধাৰিত সময়ৰ আগতেই এই লক্ষ্যত উপনীত হােৱা বাবে সকলাে বিষয়া-কৰ্মচাৰীক অভিনন্দন জনায় আৰু গ্ৰাম্য দুখীয়া জনসাধাৰণক উপকৃত কৰাৰ বাবে গ্রামােন্নয়নৰ প্ৰতিখন আঁচনি ৰূপায়ণৰ ক্ষেত্ৰতে সম দায়বদ্ধতা প্রদর্শন কৰিবলৈ সকলােৰে প্রতি আহ্বান জনায়।
উল্লেখ্য যে মহাত্মা গান্ধী এনৰেগাৰ অধীনত ইচ্ছুক প্ৰতিটো পৰিয়ালকে একোখনকৈ জবকার্ড প্রদান কৰা হয় আৰু পৰিয়ালটোৰ প্ৰতিজন প্রাপ্তবয়স্ক কর্মঠ ব্যক্তিৰ নাম এই জবকাৰ্ডত সন্নিবিষ্ট কৰিব পাৰি। এই জবকাৰ্ডৰ জৰিয়তে প্রতিটো পৰিয়ালে সুবিধা অনুযায়ী মজুৰিভিত্তিক কর্মসংস্থান ল’ব পাৰে। তলাবন্ধৰ সময়ত নতুনকৈ কাম আৰম্ভ কৰাৰ পাছত এই আঁচনিৰ অধীনত চলিত বৰ্ষত এতিয়ালৈ ২০.৮১ লাখ পৰিয়ালক কর্মসংস্থান প্রদান কৰি ৬৫৩.১১ লাখ কর্মদিন সৃষ্টি কৰা হৈছে আৰু ১৩৮৬.২ কোটি টকাৰ মজুৰি প্ৰদান কৰা হৈছে।
আনহাতে, ৩৩,৮১৫টা পৰিয়ালে এশ দিনৰ কর্মসংস্থান লাভ কৰিবলৈ সক্ষম হৈছে। চলিত বৰ্ষত এতিয়ালৈ ১,০৪,৭২১টা সম্পদ সৃষ্টি কৰা হৈছে। বর্তমান মজুৰিৰ পৰিমাণ বঢ়াই ২১৩ টকা কৰাৰ ফলত জনসাধাৰণৰ কাম কৰাৰ উৎসাহাে বৃদ্ধি পাইছে। ফলত চলিত বৰ্ষত এতিয়ালৈ ৪,৩২,৮৭১খন নতুন জবকার্ডো প্ৰদান কৰা হৈছে। কাম বিচৰা সকলােকে যাতে নিয়ােজিত কৰিব পাৰি তাৰ বাবে বৃহৎ সংখ্যক আঁচনি অনুমােদন কৰি থােৱাৰ ব্যৱস্থা কৰাৰ লগতে সময়মতে মজুৰি প্ৰদান আৰু নিৰীক্ষণৰ ব্যৱস্থা আদিৰ বাবে এই সফলতা সম্ভৱ হৈছে। বিভাগৰ এক বিবৃতিত এই কথা প্রকাশ।