“দেউতা, ময়ো আমাৰ মুখ্যমন্ত্ৰীক আনৰ দৰে পইচা দিম । এইবাৰ মোৰ জন্মদিন নাপাতো । ইমান বছৰেতো জন্মদিন পাতিয়েই আহিছো । এইবাৰ দেখোন মানুহবোৰে বাতৰি কাকতত মুখ্যমন্ত্ৰীক পইচা দি আছে । সেই কাৰণে এইবাৰ মোৰ জন্মদিনৰ সকলো পইচা মুখ্যমন্ত্ৰীক দিম ।” বজালী জিলাৰ বৰভালুকী গাঁও নিবাসী নৱকান্ত কলিতা আৰু সীমা কলিতাৰ কন্যা তথা পাঠশালা আনন্দৰাম বৰুৱা একাডেমিৰ দ্বিতীয় শ্ৰেণীৰ ছাত্ৰী জাহ্নৱীৰ এনে প্ৰস্তাৱত মাক-দেউতাক একপ্ৰকাৰ হতভম্ব হ’ল যদিও আঠ বছৰীয়া কন্যাৰ এনে দূৰদৰ্শী চিন্তাৰে আগবঢ়োৱা প্ৰস্তাৱক আনন্দ মনে গ্ৰহণ কৰিলে আৰু প্ৰতি বছৰে ওচৰ চুবুৰীয়াৰ সমনীয়াৰ লগত কন্যাৰ জন্ম দিনত চাহ মিঠাইৰ বাবদ খৰচ কৰিবলগীয়া পইচা মুখ্যমন্ত্ৰীৰ সাহায্য পুঁজিলৈ আগবঢ়োৱাৰ সিদ্ধান্ত ল’লে ।
একেখন বিদ্যালয়ৰ পৰা এইবেলি মেট্ৰিক দিবলৈ ওলোৱা জাহ্নবীৰ বায়েকেও ভনীয়েকৰ চিন্তাত সমৰ্থন জনাই তাইৰো এইবেলি হ’বলগা জন্মদিনৰ খৰচ ভনীয়েকৰ লগত এক কৰি মুখ্যমন্ত্ৰীৰ সাহায্য পুঁজিলৈ আগবঢ়াবলৈ দেউতাকক প্ৰস্তাৱ দিয়ে আৰু দেউতাকে দুয়োৰে জন্মদিনৰ সমুদায় ধন অৱশেষত মুখ্যমন্ত্ৰীৰ সাহায্য পুঁজিলৈ মুক্তহস্তে আগবঢ়ায় ।
ইতিমধ্যে কণমানি জাহ্নৱী আৰু দৃশাই ক’ভিডসৃষ্ট পৰিৱেশত কৰা এনে ব্যতিক্ৰমী চিন্তাক স্থানীয় লোকে আদৰণি জনাইছে । উল্লেখ্য যে বৰ্তমান ক’ভিডসৃষ্ট পৰিৱেশত কিছু সন্ত্ৰস্ত হৈ থকা আৰু সদায় বাতৰি কাকত, টিভি আদিৰ জৰিয়তে ক’ভিডৰ সকলো খবৰ ৰখা দুই কন্যাই এই সিন্ধান্ত গ্ৰহণ কৰি মাক-দেউতাকক কয় যে, অকণমান বৰঙনি হ’লেও চৰকাৰে এই টকাৰে কিনা ভেকচিনেৰে কাৰোবাৰ প্ৰাণ ৰক্ষাত নিশ্চয়ে অৰিহণা যোগাব নোৱাৰিবনে ?
মন কৰিবলগীয়া যে এইবেলি জাহ্নবীৰ জন্মদিন কেৱল গছপুলি ৰোপনৰে পালন কৰা হয় । লগতে দুই কন্যাই আশা কৰে যে এনেদৰে সকলোৱে আগবাঢ়ি আহিলে ক’ভিডক নিশ্চয়ে জয় কৰিব পৰা যাব । জন্মদিনত পাঠশালা অসামৰিক চিকিৎসালয় চৌহদত নিম গছৰ পুলি এটি ৰোপন কৰা হয় ৷ এই ৰোপন কাৰ্যসূচীত পৰিৱেশ আৰু বন বিভাগৰ ব্ৰেন্দ এম্বেচেদৰ আনন্দ খাটনিয়াৰে অংশগ্ৰহণ কৰাৰ উপৰিও চিকিৎসালয়খনৰ ভাৰপ্ৰাপ্ত বিষয়া ডা: ৰানাপ্ৰতাপ ডেকা, চিকিৎসক গৌৰৱ শৰ্মাইও উপস্থিত থাকে ।
