সমগ্ৰ বিশ্বৰে অন্যতম শ্ৰেষ্ঠ নাট্য উৎসৱ ‘ ভাৰত ৰংগ মহোৎসৱলৈ নিৰ্বাচিত হৈছে বাগছা- নলবাৰীস্থ সাংস্কৃতিক গোষ্ঠী ‘ চিফুং দ্য আৰ্টিষ্ট’ ৰ নিবেদিত নাট ‘ থে্ঙফাখ্ৰী ‘। ইয়াৰ পুৰ্বেও নাটখনে এন এছ ডি ৰ পূৰ্বত্তৰ নাট্য উৎসৱত ডিমাপুৰৰ লগতে গুৱাহাটী, নলবাৰী আৰু গোৰেশ্বৰত মঞ্চস্থ হৈছিল।
দেশৰ ৭৫ সংখ্যক স্বাধীনতা দিৱসৰ লগত সংগতি ৰাখি ৰাষ্ট্ৰীয় নাট্য বিদ্যালয়ে এইবাৰ আয়োজন কৰা দ্বাবিংশতম ভাৰত ৰংগ মহোৎসৱ ত ভাৰতৰ ৬৬১ খন আৰু বিদেশৰ ৪০ খনকে ধৰি মুঠ ৭০১ খন নাটকে যোগদান কৰিছিল যদিও মুঠ ৮৭ খন নাটকহে নিৰ্বাচিত হয়। ৮৭ খন নাটকৰ মাজত স্থানপ্ৰাপ্ত অসমীয়া আৰু বড়ো ভাষাৰ থে্ঙফাখ্ৰীৰ নাট্যৰূপ কবি প্ৰণৱ কুমাৰ বৰ্মনৰ।
বাগছা ৰ গোৰেশ্বৰত মুখ্য কাৰ্যালয়ত থকা চিফুং ৰ অন্য এটা প্ৰধান শাখা নলবাৰী ৰ পোৰাকুচিত গাঁৱত অৱস্থিত। ২০১০ চনৰ পৰাই সন্ত্ৰাস অধ্যুষিত বি টি এ ডি ত মূলতঃ জনজাতীয় লৰা ছোৱালী ৰ প্ৰতিভা বিকাশৰ বাবে এখন মঞ্চ দিয়াৰ উদ্দেশ্যেৰে নাট্যকৰ্মী পৰী শৰণীয়া ৰ নেতৃত্বত গঠন হৈছিল ‘ চিফুং দ্য আৰ্টিষ্ট ‘।
২০১০ চনৰে পৰা চিফুং দ্য আৰ্টিষ্টে বাগছা আৰু নলবাৰী ৰ গ্ৰামাঞ্চলত ধাৰাবাহিক নাট্য প্ৰশিক্ষণৰ ব্যৱস্থা কৰি আহিছে, য’ত দেশৰ আগশাৰীৰ নাট্যকর্মী যদুমনি সিং, পবিত্ৰ ৰাভা, পাপৰি মেধি, চিকিমৰ প্ৰাৰ্থনা ছেত্ৰী, বীৰবল চুব্বা, কাৰ্তিক, মেঘালয়ৰ বালু, মণিপুৰৰ চানা, চানুকে ধৰি অনেকজনে প্ৰশিক্ষণ প্ৰদান কৰি আহিছে।
প্ৰতি বছৰে এই নাট্যগোষ্ঠীটোৱে দুখনকৈ নাটক প্ৰযোজনা কৰি আহিছে। মণ্ডদৰী, মোৰ ঘৰ কত, ডেউকা, চুইচাইড নোট, মাই নেম ইজ খান্দু আদিকে ধৰি কুৰিখন নাটক অসম আৰু ভাৰত বৰ্ষ ৰ বিভিন্ন প্ৰান্তত পৰী শৰণীয়া ৰ পৰিচালনাত প্ৰদৰ্শিত হৈছে ।
উল্লেখ্য যে এনে এছ দিৰ চিকিম ৰ কেন্দ্ৰত প্ৰশিক্ষিত আৰু ডিব্রুগড় বিশ্ববিদ্যালয়ৰ পৰিৱেশ বিভাগৰ স্নাতকোত্তৰ পৰী শৰণীয়া ই চিফুং দ্য আৰ্টিষ্ট ৰ কলা- কুশলী সকলৰ সুবিধাৰ বাবে সীমিত সুবিধাৰ মাজেৰে গোৰেশ্বৰ আৰু নলবাৰী ৰ গাঁৱত দুখনকৈ মঞ্চসাজি নাট্য চৰ্চা অব্যাহত ৰাখিছে।
ইতিমধ্যে এই গোষ্ঠীটোৱে জং গলৰ মাজত নতুন ধাৰাৰে ‘ বননিৰ নাটমেলা’, শীৰ্ষক নাট উৎসৱ উদযাপন কৰি আহিছে। নিৰৱচ্ছিন্ন নাট্য চৰ্চাৰ লগতে গ্ৰন্থ আন্দোলনতো চিফুং দ্য আৰ্টিষ্ট এটা আগৰণুৱা অনুষ্ঠান।
বিভিন্ন ভিতৰুৱা অঞ্চলত তেওঁলোকে নতুন লৰা-ছোৱালীক গ্ৰন্থ অধ্যয়নৰ প্ৰতি আগ্ৰহী কৰি তুলিবলৈ অনুষ্ঠিত কৰি আহিছে ব্ৰহ্মপুত্ৰ অধ্যয়ন উৎসৱ।
লগতে চিফুং দ্য আৰ্টিষ্টে গৱেষণামূলক তথ্যচিত্ৰ ” দ্য অৰিজিনাল আইদেনটিটি, মোবাইল থিয়েটাৰ অৱ আসাম, বসন্ত বৈভৱ আদি নিৰ্মান কৰাৰ লগতে দ্য ফায়াৰিং ৰেঞ্জ নামৰ পূৰ্ণ দৈৰ্ঘ্যৰ চলচিত্ৰও নিৰ্মান কৰিছে।