Non-Existent Anganwadi Centers Running in the name of Fake Children:
নগাঁও জিলাত ৰাজ্যৰ মহিলা আৰু শিশু উন্নয়ন বিভাগৰ অধীনস্থ অংগনৱাড়ী কেন্দ্রসমূহ প্রহসনত পৰিণত হৈছে। জিলাখনত অসংখ্য নিষ্ক্রিয় কিম্বা প্রায় অস্তিত্বহীন অংগনৱাড়ী কেন্দ্রত ভুৱা হিতাধিকাৰীৰেই অবাধ লুণ্ঠন চলাই থকা পৰিলক্ষিত হৈছে। এই লুণ্ঠনৰ বাবেই অংগনৱাড়ী কেন্দ্রসমূহত শিশু আৰু গর্ভৱর্তী মহিলাসকলক পুষ্টিকৰ খাদ্য খুওৱাটোও চৰম প্রহসনত পৰিণত হৈছে।
জিলাখনত সংহত শিশু উন্নয়ন আঁচনি ৰূপায়ণৰ নামত জিলা সমাজ কল্যাণ বিষয়াৰ কাৰ্যালয়ৰ পৰা অংগনৱাড়ী কেন্দ্রটোলৈকে অবাধ দুর্নীতিয়ে ছানি ধৰিছে। চৰকাৰী আঁচনিৰ সঠিক ৰূপায়ণৰে শিশু-প্রসূতিৰ সেৱা কৰাতকৈ সকলোৰে চকু কেৱল শিশু খাদ্যৰ বাবদ আৱন্টিত বিশাল চৰকাৰী ধনৰ ওপৰতহে। সংহত শিশু উন্নয়ন প্রকল্পৰ অধীনত শিশু, প্রসূতিৰ লগতে কিশোৰীক পুষ্টিকৰ আহাৰ খুওৱাৰ নামত আবণ্টিত ধনৰ ওপৰত লুণ্ঠনচলাই নোদোকা হোৱাটোৱেই যেন মুখ্য কাম হৈ পৰিছে নগাঁও জিলা মহিলা আৰু শিশু উন্নয়ন বিভাগৰ দুর্নীতিগ্রস্ত বিষয়া-কর্মচাৰীসকলৰ বাবে। অংগনৱাড়ী কর্মীৰ পৰা আৰম্ভ কৰি জিলা সমাজ কল্যাণ বিষয়ালৈকে সকলোৰে সামূহিক লুণ্ঠনৰ বাবেই জিলাখনত সংহত শিশু উন্নয়ন আঁচনিখন প্রহসনত পৰিণত হোবা বুলি ৰাইজে সঘনাই অভিযোগ উত্থাপিত কৰি অহা পৰিলক্ষিত হৈছে।
উল্লেখ্য যে নগাঁও জিলা মহিলা আৰু শিশু উন্নয়ন বিষয়াৰ কাৰ্যালয়ৰ অধীনত নগাঁও জিলাৰ ১৪ টা আৰু নৱগঠিত হোজাই জিলাৰ ছটা সংহত শিশু উন্নয়ন প্রকল্প আছে। এই শিশু উন্নয়ন প্রকল্পসমূহ হ’ল- বটদ্ৰৱা, দলংঘাট, খাগৰিজান, নগাঁও আৰবান, পাখিমৰীয়া, বহা, জুৰীয়া, ৰূপহী, বাজিয়াগাঁও, লাওখোৱা, কঠিয়াতলি, বঢ়মপুৰ, কলিয়াবৰ, পশ্চিম কলিয়াবৰ, উদালি, লংকা, লামডিং, বিন্নাকান্দি, যোগীজান আৰু ঢলপুখুৰী।
ইপিনে, জিলাখনত চৰকাৰীভারে অনুমোদিত মুঠ অংগনৱাড়ী কেন্দ্ৰৰ সংখ্যা পাঁচ হেজাৰৰো অধিক; কিন্তু ইয়াৰে বহু অংগনৱাড়ী কেন্দ্রই নিষ্ক্রিয় অৱস্থাত আছে। আনহাতে, বিভাগীয় নথিত সক্রিয় আৰু কার্যক্ষম বুলি উল্লেখ থকা অংগনৱাড়ী কেন্দ্রসমূহতো শিশুৰ বিকাশৰ নামত যিবোৰ ভেকোভাওনা চলিছে সেইবোৰ দেখি ৰাইজৰ চকু কপালত উঠিছে। বাস্তৱ ক্ষেত্ৰত জিলাখনৰ বহু অংগনবাড়ী কেন্দ্র, মিনি কেন্দ্রৰ অস্তিত্বই বিচাৰি পাবলৈ নাই। অথচ সেই অংগনৱাড়ী কেন্দ্রসমূহৰ নামতো শিশু, গর্ভৱতী মহিলা, প্রসূতিক পুষ্টিকৰ খাদ্য খুওৱাৰ নামত হেজাৰ হেজাৰ টকা আবন্টন দি থকা হৈছে।
স্মর্তব্য যে নগাঁও জিলাৰ বিভিন্ন সংহত শিশু উন্নয়ন প্রকল্পৰ অধীনস্থ অংগনৱাড়ী কেন্দ্রত তিনি বছৰ বয়সৰ ২০-৮০ টি পর্যন্ত শিশু, তিনি বছৰৰ পৰা ছয় বছৰ বয়সৰ ২০-৫০ টি পর্যন্ত শিশু, ১২-৩০ গৰাকী পর্যন্ত গর্ভৱতী মহিলা, সাত-৩০ গৰাকী পর্যন্ত প্রসুতিক প্রতিদিনে পুৱা পুষ্টিকৰ আহাৰৰ নামত ফলমূল, খিচিৰি, কণী, চুজি আদি খুৱাই থকা দেখুৱাই ভুৱা তথ্যৰেই লাখ লাখ টকা লুণ্ঠন চলাই থকা হৈছে। কিয়নো জিলাখনৰ কোনো এটা অংগনৱাড়ী কেন্দ্রতেই আঠ- ১০টা শিশুতকৈ বেছি শিশুৰ আগমন নঘটে। যিকেইটা শিশুৰ আগমন ঘটে তেওঁলোকৰ বয়স এক-তিনি বছৰ বয়সৰ ভিতৰৰ। চাৰি-ছয় বছৰ বয়সৰ কোনো এটা শিশুরেই কাহানিও নাযায় জিলাখনৰ কোনো এটা অংগনৱাড়ী কেন্দ্রলৈ।
কিয়নো সেই বয়সৰ শিশুসকল চৰকাৰী অথবা বেচৰকাৰী খণ্ডৰ বিদ্যালয়লৈহে যায় তাত আনুষ্ঠানিক শিক্ষা গ্রহণ কৰিবলৈ। তদুপৰি জিলাখনৰ অংগনৱাড়ী কেন্দ্রসমূহত কোনো এগৰাকী কিশোৰী, গর্ভৱতী মহিলা, প্রসূতিয়ে খাদ্য গ্রহণ কৰিবলৈ নাযায়। অথচ ভুরা শিশু, ভুৱা কিশোৰী, ভুৱা গর্ভৱতী মহিলা আৰু ভুৱা প্রসূতিৰ নামতেই পুষ্টিকৰ আহাৰৰ নামত প্রতিমাহে কোটি কোটি টকাৰ আবন্টিত লাভ কৰি আহিছে নগাঁও সমাজ কল্যাণ বিভাগে।
এই ভুৱা হিতাধিকাৰীৰ নামতেই পুষ্টিকৰ আহাৰৰ নামত প্রতিটো অংগনবাড়ী কেন্দ্ৰৰ একাউন্টত প্রতিমাহে হেজাৰ হেজাৰ টকা জমা হয়। নাম প্রকাশত অনিচ্ছুক একাংশ অংগনবাড়ী কর্মীয়ে অভিযোগ কৰা মতে, তেওঁলোকৰ অংগনৱাড়ী কেন্দ্ৰৰ বিপৰীতে যি ধন আবন্টিত হয় তাৰে এটা অংশৰ ধন ছুপাৰভাইজৰ, চিডিপিঅ’ আনকি জিলা বিষয়াকো দিব লাগে।
ফলত বিভাগীয় খাদ্য তালিকা অনুসৰি শিশুক খাদ্য যোগান ধৰিব নোৱাৰে। নগাঁও জিলা মহিলা আৰু শিশু উন্নয়ন বিভাগৰ অধীনস্থ বিভিন্ন সংহত শিশু উন্নয়ন প্রকল্পৰ অংগনৱাড়ী কেন্দ্রসমূহব হিতাধিকাৰীৰ বিপৰীতে ইউনিফর্ম, বেগ, জোতা, বেল্ট, টাই, কাঁহী-বাতি, গিলাছ, বিভিন্ন খেলৰ সামগ্রী, শিক্ষণ শিকন সামগ্রী আদি যোগান ধৰাৰ নামতো কোটি কোটি টকাৰ দুর্নীতি সংঘটিত হৈ থকাৰ গুৰুতৰ অভিযোগ উত্থাপিত হৈছে।
ইপিনে, মহিলা আৰু শিশু উন্নয়ন বিভাগে অংগনৱাড়ী কেন্দ্রসমূহৰ প্ৰতিগৰাকী হিতাধিকাৰীৰ বিপৰীতে খাদ্যৰ বাবদ আঠ টকাকৈ জমা দিব লাগে যদিও
জিলাখনৰ অংগনৱাড়ী কেন্দ্রসমূহৰ বেংক একাউন্টত দুমাহ সেই টকা জমা হোৱা নাই। আনহাতে, চাউল যোগানো যোৱা তিনি মাহ ধৰি বন্ধ হৈ আছে।
এতিয়া চুজিৰ হালোৱা, ভাল খিচিৰি খুৱাই থকা বুলি বিভাগীয়ভাবে প্রকাশ কৰিছে যদিও সেই খাদ্য মুঠেই শিশুৰ বাবে উপযোগী নহয় বুলি অভিযোগ উত্থাপিত হৈছে। যিহেতু জিলাখনৰ কোনো এটা অংগনৱাড়ী কেন্দ্রতেই বিভাগীয় নথিত উল্লেখ কৰা ধৰণে হিতাধিকাৰী নাই, মাত্র পাঁচ-ছয়গৰাকী শিশুৰহে আগমন হয়, তাকো অনিয়মীয়াকৈ সেয়েহে এই শিশু খাদ্যৰ নামতো বিয়াগোম কেলেংকাৰি সংঘটিত হৈ আছে।
ইপিনে, জিলাখনৰ অংগনৱাড়ী কেন্দ্রসমূহৰ অধিকাংশই অতি কদর্য আৰু অস্বাস্থ্যকৰ পৰিবেশৰ হোৱা হেতুকে অভিভাৱকসকলেও নিজৰ সন্তানক তালৈ পঠিয়াবলৈ ইচ্ছুক নহয়।