50 crore dowry demanded from bride:
দেশত যৌতুক প্রথা নিষিদ্ধ হোৱাৰ কে’বা দশক পাৰ হোৱাৰ পাছতো যৌতুকজনিত সমস্যা এতিয়া জটিল হৈ থকাৰ উদাহৰণ সততে পোৱা যায় । এই ক্ষেত্রত একাংশ উচ্চ শিক্ষিত ব্যক্তিৰো ভূমিকা আছে নেকি? বাংগালুৰুৰ এগৰাকী মহিলাই সামাজিক মাধ্যমৰ জৰিয়তে এইম্ছৰ শিক্ষাৰে শিক্ষিত এজন ব্যক্তিৰ বিৰুদ্ধে উত্থাপন কৰা এক অভিযোগে ইয়াৰ আভাস দিছে।
ডাঃ ফিনিক্স নামৰ এই মহিলাগৰাকীয়ে সামাজিক মাধ্যমত অভিযোগ কৰা অনুসৰি, তেওঁৰ বান্ধৱীয়ে ভাবী স্বামীৰ পৰা ৫০ কোটি টকাৰ যৌতুকৰ দাবী পাইছে। ডাঃ ফিনিক্সৰ বান্ধৱীগৰাকীৰ ভাবী স্বামী সৰ্বভাৰতীয় আয়ুবিজ্ঞান (এইম্)ৰ সর্বোচ্চ স্থানপ্রাপ্ত। ভাবী স্বামীৰ পৰা এই বৃহৎ অংকৰ ধনৰ যৌতুক দাবী পোৱাৰ পাছতে মহিলা গৰাকীয়ে শুব পৰা নাই।
তেওঁক অলপতে ভাবী স্বামীয়ে ৫০ কোটি টকাৰ যৌতুক দাবী কৰে। তাৰ পাছৰে পৰা তেওঁৰ কান্দোনৰ আশ্রয় লোৱাৰ বাহিৰে আন উপায় পোৱা নাই। ডাঃ ফিনিক্সৰ এই বান্ধৱী গৰাকীও চিকিৎসক।
বান্ধৱীগৰাকীৰ ভাবী স্বামীৰ বিষয়ে সদৰী কৰি ডাঃ ফিনিক্সে সামাজিক মাধ্যম ‘এক্স’ত কয়, ‘মোৰ বান্ধৱী গৰাকীৰ ভাবী স্বামী এইমছৰ ইউৰ’ল’জীৰ এমচিএইছ পাঠ্যক্ৰমৰ প্ৰৱেশ পৰীক্ষাত প্রথমস্থান প্রাপ্ত। মোৰ বান্ধৱী গৰাকীয়ে সংজ্ঞাহাৰক
পাঠ্যক্ৰমৰ এমডি কৰি আছে। তদুপৰি তেওঁ হায়দৰাবাদত যকৃত সংৰোপণৰ সংজ্ঞাহাৰক ফেল’ৰূপেও কাম কৰি আছে।’
দেশৰে আগশাৰীৰ এখন প্ৰতিষ্ঠানত শিক্ষা গ্রহণ কৰি থকা সত্ত্বেও এনেদৰে যৌতুক দাবী কৰিবলৈ লাজ পোৱা উচিত বুলি তেওঁ বান্ধৱীৰ ভাবী স্বামীক উদ্দেশি সামাজিক মাধ্যমত মন্তব্য কৰিছে।
তেওঁ লগতে প্রশ্ন কৰিছে যে এনে শিক্ষাৰ কি প্রয়োজন, যিয়ে এজন চিকিৎসককো নিজৰ ভৰিত থিয় হ’বলৈ সাহস দিব নোৱাৰে। এনে ধৰণৰ বেআইনী তথা অশুভ প্রথাক উচ্চ শিক্ষিত চিকিৎসকজনেই প্রশ্রয় দিয়াক লৈ ক্ষোভ প্রকাশ কৰি ডাঃ ফিনিক্সে লগতে কয়, ‘যদি মোৰ বান্ধৱী গৰাকীয়ে ভাবী স্বামীৰ ৫০ কোটি টকীয়া যৌতুকৰ দাবী মানি লয়, তেন্তে তেওঁৰ পিতৃ-মাতৃৰ জীৱনৰ সমস্ত অর্জন উদং হ’ব।’ তেওঁ প্ৰকাশ কৰা অনুসৰি, এই প্রথম স্থান প্রাপ্তজনৰ স’তে কিছুদিন পূর্বে তেওঁৰ বান্ধৱীৰ বিয়াৰ কথা-বতৰা আৰম্ভ হয়।
লক্ষ্যণীয়ভাৱে ডাঃ ফিনিক্সৰ বান্ধৱীগৰাকীৰ পিতৃ-মাতৃয়ে স্বীকাৰ কৰি লৈছে যে তেলুগু সম্প্রদায়ত বিয়া-বাৰুৰ ক্ষেত্ৰত যৌতুক প্রথা আজিও প্রচলিত হৈ আছে। সম্প্রদায়টোৰ প্ৰায় সকলোৱে কইনা ঘৰক বৃহৎ অংকৰ যৌতুক দাবী কৰে। পিতৃ-মাতৃৰ পৰাও একপ্ৰকাৰ সকাহ নাপাই যুৱতী চিকিৎসকগৰাকীয়ে কান্দোনকে সাৰথি কৰি লৈছে বুলি সদৰী ডাঃ ফিনিক্সে লগতে কয়, ‘তেওঁ কান্দোনত ভাঙি পৰাৰ কাৰণ হ’ল তেওঁ পিতৃ-মাতৃৰ পৰাও বিশেষ সকাহ পোৱা নাই। ৷
কাৰণ তেওঁৰ পিতৃ-মাতৃয়ে মানি লৈছে যে তেলুগু সম্প্রদায়ত যৌতুক প্ৰথাৰ প্ৰচলন আছে।’ অৱশ্যে ডাঃ ফিনিক্সে তেওঁৰ বান্ধৱী গৰাকী আৰু বান্ধৱীৰ ভাবী স্বামীৰ পৰিচয় সদৰী কৰা নাই। আনহাতে, ডাঃ ফিনিক্সে এই তথ্য সামাজিক মাধ্যমত শ্বেয়াৰ কৰাৰ পাছতে বহুজনে যৌতুক সম্পৰ্কীয় নিজৰ অভিজ্ঞতা শ্বেয়াৰ কৰিছে। বহুজনে উচ্চ শিক্ষিত চিকিৎসকজনক কঠোৰ ভাষাৰে সমালোচনাও কৰিছে।
এজন ‘এক্স’ ব্যৱহাৰকাৰীয়ে কয়, ‘এই কথা জানিব পাৰি ওকালি অহা যেন লাগিল। সেই মানুহজন (চিকিৎসকজন) অতি নীচ ব্যক্তি।’ আন এজনে কয়, ‘যদি সঁচাকৈয়ে চিকিৎসকজনে ৫০ কোটি টকাৰ যৌতুক দাবী কৰিছে তেন্তে সিয়ে আমাৰ সমাজৰ ব্যৰ্থতাৰ প্ৰতিফলন ঘটাইছে। তেওঁ এজন মূর্খ মানুহ। ধনেৰে মৰ্যাদা কিনিব নোৱাৰি।’