B’Desh High Court refuses to ban ISKCON, orders govt to remain cautious about protecting law:
বাংলাদেশত ইস্কন (ISKON) নিষিদ্ধ নহয়। এই ৰিট আবেদন নাকচ কৰে দেশ খনৰ উচ্চ ন্যায়ালয়ে। বৃহস্পতিবাৰে আদালতৰ ৰায়দানত উল্লেখ কৰে যে ইস্কনক নিষিদ্ধ কৰা হ’ব নে নহয় সেয়া চৰকাৰে সিদ্ধান্ত ল’ব। ৰিট আবেদন খাৰিজ কৰি কোৱা হৈছে যে শান্তি বজাই ৰখাৰ বাবে চৰকাৰে সকলো পদক্ষেপ গ্ৰহণ কৰিব। কিন্তু কোনো কাৰণতে ইস্কনক নিষিদ্ধ কৰা হোৱা নাই। শেহতীয়াকৈ হিংসাত্মক ঘটনা ৰোধৰ বাবে চৰকাৰে কি পদক্ষেপ লৈছে সেয়া জানিবলৈ দিয়া হৈছে চৰকাৰক।
উল্লেখ্য যে বাংলাদেশৰ পুণ্ডাৰিক ধামৰ অধ্যক্ষ তথা ইস্কনৰ প্ৰাক্তন নেতা চিন্ময় কৃষ্ণ দাস ব্ৰহ্মচাৰীক গ্ৰেপ্তাৰ কৰাৰ পিছতে বাংলাদেশত ইস্কনক নিষিদ্ধ কৰাৰ দাবী কৰিছিল কট্টৰ ইছলামিক সংগঠন কেইটামানে । পৰৱৰ্তী সময়ত এই বিষয়টো উচ্চ ন্যায়ালয়ত পাইগৈ ৷ ইস্কনক নিষিদ্ধকৰণৰ এক ৰীট আবেদন উত্থাপন কৰা হয়।
অৱশেষত আজি উচ্চ ন্যায়ালয়ে বিষয়টোৰ শুনানি গ্ৰহণ কৰি ন্যায়াধীশ ফাৰাহ মাহবুব আৰু ন্যায়াধীশ দেবাশীষ ৰায় চৌধুৰীৰ বিচাৰপীঠে উচ্চ কয় যে ইস্কনক নিষিদ্ধ কৰা হ’ব নে নহয় সেই সিদ্ধান্ত চৰকাৰে কৰিব। এই ক্ষেত্ৰত আদালতৰ হস্তক্ষেপ কৰাটো সঠিক নহ’ব।
আনহাতে ৰীট আবেদন খনৰ হৈ যুক্তি প্ৰদৰ্শন কৰা অধিবক্তাগৰাকীয়ে কয় যে ইস্কনক লৈ চৰকাৰে কঠোৰ স্থিতি গ্ৰহণ কৰিছে। বাংলাদেশৰ সকলো ধৰ্মৰ লোকৰ মাজত আন্তৰিক সম্পৰ্ক আছে বুলিও উচ্চ ন্যায়ালয়ে অৱগত কৰে। সকলোৱে সাম্প্ৰদায়িক সম্প্ৰীতিৰে জীয়াই আছে, আৰু থাকিব।
আনহাতে আদালতে চৰকাৰী পক্ষকো সোধা-পোছা কৰা হৈছিল চট্টগ্ৰামত অধিবক্তা হত্যাৰ সন্দৰ্ভত। চৰকাৰে কয় যে সংশ্লিষ্ট স্থানত থকা চিচিটিভিৰ বিভিন্ন ফুটেজৰ পৰা অভিযুক্তক চিনাক্ত কৰা হৈছে। অচিৰেই আৰক্ষীৰ জালত পৰিব অভিযুক্ত ৷ চৰকাৰৰ এই কাৰ্যত সন্তুষ্টি প্ৰকাশ কৰিছে উচ্চ ন্যায়ালয়ে।