Bangladesh court rejects bail of Hindu leader Chinmoy Krishna :
দেশদ্ৰোহৰ গোচৰত গ্ৰেপ্তাৰ হোৱা বাংলাদেশ সন্মিলিত সনাতনী জাগৰণ জোটৰ মুখপাত্ৰ তথা পুণ্ডাৰিক ধামৰ অধ্যক্ষ চিন্ময় কৃষ্ণ দাস ব্ৰহ্মচাৰীক বাংলাদেশৰ আদালতে জামিন নাকচ কৰি কাৰাগাৰলৈ প্ৰেৰণৰ নিৰ্দেশ দিয়ে।
মঙলবাৰে বিয়লি শুনানিৰ অন্তত এই নিৰ্দেশ দিয়ে চট্টগ্ৰাম মহানগৰ দণ্ডাধীশ কাজী শ্বৰীফুল ইছলামে। এই গোচৰটো চিন্ময় কৃষ্ণৰ বিৰুদ্ধে চট্টগ্ৰাম চহৰৰ নিউমাৰ্কেট ছেক্সনত অৱস্থিত স্বাধীনতা স্তম্ভত ৰাষ্ট্ৰীয় পতাকাক অপমান কৰাৰ বাবে দাখিল কৰা হৈছিল। চট্টগ্ৰাম চহৰ আৰক্ষীৰ অতিৰিক্ত উপ আয়ুক্ত (আইন শৃংখলা) মফিজুৰ ৰহমানে কয় যে জামিন আবেদন আদালতে নাকচ কৰে।
মফিজুৰ ৰহমানে লগতে কয় যে চিন্ময় কৃষ্ণ দাসৰ অধিবক্তাৰ আবেদনৰ প্ৰতি লক্ষ্য ৰাখি আদালতে বিভাজনৰ নিৰ্দেশ দিছে। একে সময়তে চিকিৎসা আৰু ধৰ্মীয় ৰীতি-নীতি পালনত যাতে কোনো অসুবিধা নহয় তাৰ বাবে কাৰাগাৰ অধীক্ষকক জেলৰ নিয়ম অনুসৰি ব্যৱস্থা গ্ৰহণ কৰিবলৈ নিৰ্দেশ দিয়ে।
ইফালে চিন্ময় কৃষ্ণক আদালতত হাজিৰ কৰিবলৈ কঠোৰ নিৰাপত্তা ব্যৱস্থা গ্ৰহণ কৰা হয়। অনুৰাগীসকলেও আদালত চৌহদত তেওঁক মুক্তিৰ দাবীত শ্ল’গান দিয়ে। আদালতৰ নিৰ্দেশৰ পিছত যেতিয়া চিন্ময়ক জেললৈ নিবলৈ চেষ্টা কৰিছিল তেতিয়া তেওঁলোকে পথ অৱৰোধ কৰিছিল। ফলত তেওঁক জেললৈ নিব পৰা নাছিল।
উল্লেখ্য যে ,সোমবাৰে বিয়লি ঢাকাৰ শ্বাহজালাল আন্তঃৰাষ্ট্ৰীয় বিমানবন্দৰৰ পৰা আৰক্ষীয়ে গ্ৰেপ্তাৰ কৰে চিন্ময় কৃষ্ণক। পিছত তেওঁক চট্টগ্ৰামলৈ অনা হয়। তেওঁক গ্ৰেপ্তাৰ কৰাৰ পিছত সংখ্যালঘু সংগঠন আৰু বিভিন্ন বৃত্তিৰ লোকে ঢাকা, চট্টগ্ৰাম সহ সমগ্ৰ বাংলাদেশত তেওঁক মুক্তিৰ দাবীত প্ৰতিবাদ সাব্যস্ত কৰিবলৈ আৰম্ভ কৰে। সমগ্ৰ দেশতে প্ৰতিবাদৰ ধুমুহা বলিছে৷
মনকৰিবলগীয়া যে যোৱা ৩১ অক্টোবৰত চান্দগাঁও মহৰা ৱাৰ্ডৰ বিএনপিৰ সাধাৰণ সম্পাদক ফিৰোজ খানে চিন্ময় কৃষ্ণকে ধৰি ১৯জন লোকৰ বিৰুদ্ধে কোটোৱালি থানাত বাদী হিচাপে গোচৰ ৰুজু কৰিছিল। পিছত ফিৰোজ খানক বিএনপিৰ পৰা বৰ্খাস্ত কৰা হয়। গোচৰৰ বিবৃতিত বাদীয়ে অভিযোগ কৰে যে ৫ আগষ্টত বাংলাদেশত সংঘটিত গণ বিদ্ৰোহৰ পিছত বৈষম্য বিৰোধী ছাত্ৰ-ছাত্ৰীয়ে চট্টগ্ৰাম চহৰৰ নিউ মাৰ্কেট ছেক্সনত জিৰ’ পইণ্টত স্তম্ভত ৰাষ্ট্ৰীয় পতাকা উত্তোলন কৰে, যিটো এতিয়াও আছে।
২৫ অক্টোবৰত বাংলাদেশ সনাতন জাগৰণ মঞ্চৰ উদ্যোগত লালদিঘী খেলপথাৰত এখন গণ সভা অনুষ্ঠিত হয়। চট্টগ্ৰাম সংমণ্ডলৰ বিভিন্ন অঞ্চলৰ পৰা হাজাৰ হাজাৰ লোকে এই সমাৱেশত যোগদান কৰে। সেইদিনা চন্দন কুমাৰ ধৰ (চিন্ময় কৃষ্ণ দাস)ৰ লগতে ৯ জন অভিযুক্ত, বাকী অভিযুক্তই নিউমাৰ্কেটৰ ছেক্সনৰ জিৰ’ পইণ্ট পিলাৰত আৰু বাংলাদেশৰ জাতীয় পতাকাৰ চাৰিওফালে ধৰ্মীয় গোট ইস্কনৰ গেৰুৱা ধৰ্মীয় পতাকা উত্তোলন কৰে। ইয়াৰ ফলত সাধাৰণ নাগৰিকৰ মাজত ব্যাপক ক্ষোভৰ সৃষ্টি হৈছিল এই গোচৰৰ পিছত ভিডিঅ’ মেছেজত চিন্ময় কৃষ্ণই নিজৰ নিৰ্দোষী বুলি দাবী কৰি কয় যে এই ঘটনাৰ লগত তেওঁৰ কোনো সম্পৰ্ক নাই।
মঙলবাৰে শুনানিৰ অন্তত আদালত চৌহদত সংবাদ মাধ্যমৰ আগত তেওঁৰ অধিবক্তা স্বৰূপ কান্তি নাথে কয় যে জামিন আৱেদন নিৰ্দোষী বুলি দাবী কৰি কৰা হৈছে। কিন্তু আদালতে জামিন নাকচ কৰে। কিছুদিনৰ পাছত এই নিৰ্দেশৰ বিৰুদ্ধে আপীল কৰা হ’ব।
ইফালে ইস্কনে বাংলাদেশ সন্মিলিত সনাতনী জাগৰণ জোটৰ মুখপাত্ৰ চিন্ময় কৃষ্ণ দাসক গ্ৰেপ্তাৰ কৰাৰ ঘটনাক তীব্ৰ গৰিহণা আৰু প্ৰতিবাদ কৰে। ইস্কনে ছ’চিয়েল মিডিয়া এক্সত এক বিবৃতিত এই প্ৰতিবাদ সাব্যস্ত কৰে। তাৰ লগতে দেশৰ বিভিন্ন প্ৰান্তত পৰম্পৰাগত জনগোষ্ঠীৰ ওপৰত হোৱা আক্ৰমণ আৰু হিংসাৰ প্ৰতিবাদ সংগঠনটোৱে চিন্ময় কৃষ্ণৰ মুক্তিৰ ক্ষেত্ৰত ভাৰতৰ হস্তক্ষেপ বিচাৰিছে।
ইফালে ভাৰত চৰকাৰে চিন্ময় কৃষ্ণ দাসক গ্ৰেপ্তাৰ আৰু জামিন বাতিল কৰাত গভীৰ উদ্বেগ প্ৰকাশ কৰি তীব্ৰ বাৰ্তা প্ৰদান কৰিছে। মঙলবাৰে দেশৰ বৈদেশিক পৰিক্ৰমা মন্ত্ৰালয়ে প্ৰকাশ কৰা এক বিবৃতিত এই উদ্বেগ প্ৰকাশ কৰে। ইয়াত কোৱা হৈছে যে তেওঁক গ্ৰেপ্তাৰ কৰাৰ পিছত বাংলাদেশৰ উগ্ৰপন্থী সংগঠনেও হিন্দু সম্প্ৰদায়ৰ লগতে অন্যান্য সংখ্যালঘু লোকক আক্ৰমণ কৰিছে। বাংলাদেশতো অগ্নিসংযোগ, লুণ্ঠন, ভাঙি-ছিঙি, হিন্দু আৰু ধৰ্মীয় সংখ্যালঘু লোকৰ মন্দিৰত আক্ৰমণৰ দৰে ঘটনা সংঘটিত হৈছে।
ভাৰতৰ বৈদেশিক পৰিক্ৰমা মন্ত্ৰালয়ে এক বিবৃতিত কয় যে যিখন দেশত সংখ্যালঘু লোকৰ ওপৰত আক্ৰমণৰ দোষী পলাতক হৈ আছে, সেইখন দেশত এই অন্যায়ৰ বিৰুদ্ধে মাত মাতি এজন ধৰ্মীয় নেতাক গ্ৰেপ্তাৰ কৰা হৈছে। বিবৃতিটোত বাংলাদেশত হিন্দুকে ধৰি সকলো সংখ্যালঘুৰ সুৰক্ষা নিশ্চিত কৰাৰ লগতে মত প্ৰকাশৰ স্বাধীনতা নিশ্চিত কৰিবলৈ আহ্বান জনায়।
