মৰ্মান্তিক দুৰ্ঘটনা ৷ ডিব্ৰুগড়ৰ লাহোৱালত পুৱতি নিশা সংঘটিত হোৱা এক শোকাৱহ পথ দুৰ্ঘটনাত প্ৰাণ গ’ল এজন যুৱকৰ ৷ দুৰ্ঘটনাটোত গুৰুতৰভাৱে আহত চাৰিজন ৷
প্ৰাপ্ত খবৰ অনুসৰি পুৱতি নিশা লাহোৱালৰ বকুল মাজগাঁৱত দৰাঘৰত কইনা থৈ টেঙাখাতৰ তামুলীখাটলৈ এখন ব্ৰেজা বাহনত গৃহাভিমুখী হৈছিল পাঁচ যুৱক। কিন্ত নিয়ন্ত্ৰণ হেৰুৱাই চেঁচা দলঙৰ পৰা নৈত পৰিল বিলাসী বাহন। চাৰিঘণ্টা ধৰি পানীত পৰি আছিল ঈশান গগৈ নামৰ এজন যুৱক ৷ ফলত থিতাতে কৰুণ মৃত্যুক সাৱটি লয় যুৱকজন। অৱশ্যে কোনোমতে বাহন খনৰ আন চাৰে আৰোহী ওলাই আহি পাৰত উপস্থিত হয় ৷ পিছত স্থানীয় গঞাৰ সহযোগত ডিব্ৰুগড়স্থ অসম চিকিৎসা মহাবিদ্যালয় হাস্পতাললৈ প্ৰেৰণ কৰা হয় চাৰি আহত যুৱক ক্ৰমে লাটুৰাজ গগৈ, ত্ৰিদীপ গগৈ,বিপ্লৱ গগৈ আৰু অখিৰাজ গগৈ ৷
আনহাতে ঘটনা সংঘটিত হোৱাৰ পিছতে আৰক্ষী আৰু এছডিআৰএফ ঘটনাস্থলীত উপস্থিত হৈ বাহন খনৰ ভিতৰৰ পৰা ঈশান গগৈৰ মৃতদেহ উদ্ধাৰ কৰি মৰনোত্তৰ পৰীক্ষাৰ বাবে এএমচিএইছলৈ প্ৰেৰণ কৰে ৷
ইপিনে,এই ঘটনাৰ খৱৰ বিয়পি পৰাৰ লগে লগে এক শোকাকুল পৰিবেশৰ সৃষ্টি হয় দুৰ্ঘটনাস্থলী ৷ ঘৰৰ জীয়ৰীক বিয়া দি উলিয়াই দিয়াৰ দুখ মাৰ নৌযাওঁতেই পুত্ৰৰ দুৰ্ঘটনাত মৃত্যুৰ খবৰ লাভ কৰি শোকত মিয়ম্ৰান হৈ পৰিছে টেঙাখাতৰ তামুলীখাটৰ দুৰ্ভগীয়া পৰিয়ালটি ৷ দুৰ্ঘটনাস্থলীত মাতৃ আৰু আত্মীয়ৰ হিয়াভগা কান্দোনে পৰিবেশ শোকাকুল কৰি তোলে ৷
উল্লেখ্য যে দুৰ্ঘটনা সংঘটিত হোৱা চেঁচা নৈ দুয়োপাৰ পথচোৱা বহল কৰাৰ নামত বিগত এবছৰ ধৰি ঠিকাদাৰে নিৰ্মাণত হৈ আছে ব্যস্ত ৷ কিন্ত পথছোৱাৰ নিৰ্মাণত নাই কোনো সাংকেতিক চিহ্ন। যাৰবাবে ঠিকাদাৰৰ চৰম গাফিলতিৰ বাবে অকালতে কৰুণ মৃত্যুক সাবটি ল’বলগীয়া হ’ল এজন তৰুণ ৷ স্থানীয় লোকে অভিযোগ কৰা মতে পথছোৱাৰ নিৰ্মাণত সাংকেতিক চিহ্ন নথকাৰ বাবে ইয়াৰ পূৰ্বে আন ছটা পথ দুৰ্ঘটনা সংঘটিত হয় চেঁচা দলঙত সমীপত ৷