Demanded the dismissal of Devolal:
উত্তৰ কাছাৰ স্বায়ত্তশাসিত পৰিষদৰ মুখ্য কাৰ্যবাহী সদস্য দেৱোলাল গর্লোছা আৰু তেওঁৰ পত্নী কণিকা হোজাইৰ নাম সাঙোৰ খোৱা উমৰাংছ’ৰ অবৈধ কয়লা খনিটোত কৰ্মৰত অৱস্থাত একাংশ শ্রমিক আবদ্ধ হোৱা তথা ইয়াৰে চাৰিজন শ্রমিকৰ শোকাৱহ মৃত্যুৰ ঘটনাই সম্প্রতি নতুন ৰূপ লৈছে।
ৰাজ্য চৰকাৰে এই সমগ্ৰ ঘটনাৰ ন্যায়িক তদন্তৰ পোষকতা কৰাৰ সময়তে ষষ্ঠ অনুসূচীভুক্ত উত্তৰ কাছাৰ স্বায়ত্তশাসিত পৰিষদৰ মুখ্য কাৰ্যবাহী সদস্য গর্লোছাক বৰ্খাস্তৰ দাবী উত্থাপন কৰি সৰৱ হৈ উঠিছে স্বয়ং শাসকীয় বিজেপিৰে একাংশ।
ইপিনে, এই অবৈধ খনি চলোৱাৰ অভিযোগত অভিযুক্ত হৈ আৰক্ষীৰ দ্বাৰা গ্ৰেপ্তাৰ হোৱা লোকৰ সংখ্যা সম্প্রতি পাঁচজনলৈ বৃদ্ধি পাইছে। প্রাপ্ত তথ্য অনুসৰি, অবৈধ কয়লা খনিটোত কৰ্মৰত শ্রমিক দুৰ্যোগৰ ফলত আবদ্ধ হৈ পৰাৰ পাছতে অসম খনি উন্নয়ন নিগম লিমিটেড (এএমডিচিএল) ৰ জ্যেষ্ঠ প্ৰবন্ধক (কাৰিকৰী) প্রসেনজিৎ কেম্পায়ে যোৱা ছয় জানুৱাৰীত অবৈধ খনিটো চলোৱা লোকৰ বিৰুদ্ধে উমৰাংছ’ আৰক্ষী থানাত এজাহাৰ দাখিল কৰে।
কেম্পাৰ এই এজাহাৰৰ ভিত্তিত উমৰাংছ’ আৰক্ষীয়ে ০২/২০২৫ নম্বৰত ভাৰতীয় ন্যায় সংহিতাৰ ৩ (৫) আৰু ১০৫ ধাৰাৰ লগতে খনি আৰু খনিজাত সামগ্রী (উন্নয়ন আৰু নিয়ন্ত্রণ) আইন ১৯৫৭ৰ ২১ (এক) ধাৰাত এটা গোচৰ ৰুজু কৰে। এই গোচৰত প্ৰথমে আৰক্ষীয়ে গর্লোছা দম্পতীৰ ঘনিষ্ঠ পুনিশ নুনিচাক গ্ৰেপ্তাৰ কৰে।
পাছত কালিলৈকে গোচৰটোত আন চাৰিজন লোকক গ্ৰেপ্তাৰ কৰে। এই চাৰি অভিযুক্তৰ নাম হৈছে মহম্মদ আব্দুল হান্নান লস্কৰ, ৰ’ন’ ভদ্র হাসু, দিলদাৰ হুছেইন আৰু বিপুল পুৰুছা। আনহাতে, এএমডিচিএলৰ জ্যেষ্ঠ প্রবন্ধকজনে আৰক্ষীক দিয়া এজাহাৰত উল্লেখ আছে যে কিছুসংখ্যক শ্রমিক তথা দুর্বৃত্তই কুঁৱা সদৃশ গাঁতত অবৈধভাৱে কয়লা নিষ্কাসন কৰি থকা অৱস্থাত ছয় জানুৱাৰী ২০২৫ত গাঁতটোত পানী জমা হৈ আবদ্ধ হৈ পৰে।
এই খাদ অৱস্থিত কালামাটি অঞ্চল এএমডিচিএলৰ গৰম পানীস্থিত কয়লা খণ্ডৰ পৰা প্রায় এক কিলোমিটাৰ দূৰত অৱস্থিত। এই এজাহাৰত তেওঁ অবৈধ আবদ্ধ শ্রমিক কেইজনক উদ্ধাৰ কৰিবলৈ অনুৰোধ জনায়। লগতে এজাহাৰকাৰীয়ে এই বুলিও অভিযোগ উত্থাপন কৰে যে অসম চৰকাৰৰ ভূতত্ত্ব খনন সঞ্চালকালয়েই হওক বা অসম চৰকাৰৰ আন কোনো কর্তৃত্বশীল কর্তৃপক্ষই হওক কোনো চৰকাৰী কৰ্তৃপক্ষৰ অনুমতি অবিহনে ঘটনা সংঘটিত খনিটো চলি আছে।
এজাহাৰকাৰীয়ে এজাহাৰত আৰু উল্লেখ কৰে যে এনে ধৰণৰ খনিৰ খনন অতি বিপজ্জনক আৰু ইয়ে প্রাণহানি কৰিব পাৰে। খনিটোত আবদ্ধ হৈ পৰা শ্রমিক কেইজন জীৱিত থকাৰ সম্ভাৱনা ক্ষীণ বুলিও তেওঁ এজাহাৰত উল্লেখ কৰে। আনহাতে, খনিটোত আবদ্ধ হৈ পৰা ন দৰিদ্ৰ শ্ৰমিকৰ চাৰিজনৰ মৃতদেহ বিগত সময়ত উদ্ধাৰ হয় যদিও আন পাঁচজন বাতৰি লিখা পৰলৈকে সন্ধানহীন হৈ আছে।
ইপিনে, ৰাজ্য চৰকাৰে ঘটনাৰ ন্যায়িক তদন্তৰ দিহা কৰাৰ সময়তে উত্তৰ কাছাৰ স্বায়ত্তশাসিত পৰিষদৰ মুৰব্বী গলোছাক বৰ্খাস্ত কৰাৰ দাবীত সৰৱ হৈ উঠিছে প্রাক্তন বিধায়ক তথা বিজেপি নেতা সমৰজিৎ হাফলংবাৰ। ষষ্ঠ অনুসূচীভুক্ত স্বায়ত্তশাসিত পৰিষদে সংবিধান নামানিলে বা দুর্নীতিত লিপ্ত হ’লে বৰ্খাস্ত কৰাৰ সাংবিধানিক ব্যৱস্থা আছে বুলি বিজেপি নেতাজনে মন্তব্য কৰিছে।
মুখ্য কাৰ্যবাহী গর্লোছাৰ অনুমতি অবিহনে ডিমা হাছাওত কোনেও কয়লা ব্যৱসায় কৰিব নোৱাৰে বুলি মন্তব্য কৰি হাফলংবাৰে লগতে কয়, ‘কণিকা হোজাইৰ চালান নোলোৱাকৈ কোনেও ডিমা হাছাওৰ পৰা কয়লা পৰিবহণ কৰিব নোৱাৰে। সকলোৱে এই কথা জানে। ষষ্ঠ অনুসূচীভুক্ত স্বায়ত্তশাসিত পৰিষদ সংবিধান মতে নচলিলে বা দুর্নীতিত নিমজ্জিত হ’লে বৰ্খাস্ত কৰিব পৰাৰ ব্যৱস্থা দেশৰ সংবিধানত আছে।’
গলোছাক বৰ্খাস্ত কৰিহে ঘটনাটোৰ ন্যায়িক তদন্তৰ ব্যৱস্থা কৰাৰো পোষকতা কৰে তেওঁ। ৰাজ্য চৰকাৰে ঘটনাৰ ন্যায়িক তদন্তৰ দিহা কৰা কাৰ্যক বিজেপি নেতাজনে আদৰণিও জনায়।
