Ghaziabad:✒️এটা বিলাসী কাৰুকার্যখচিত দুমহলীয়া অট্টালিকা। অট্টালিকাটোৰ বাহিৰত কূটনৈতিক নম্বৰ প্লেটযুক্ত চাৰিখন বিলাসী গাড়ী পার্কিং কৰি থোৱা থাকে। অট্টালিকাটোত এখন অস্বীকৃত ৰাষ্ট্ৰৰ দূতাবাসৰ ‘নেম প্লেট’ আঁৰি থোৱা হৈছে। এই অস্বীকৃত ৰাষ্ট্ৰখন হ’ল এন্টার্কটিকাত অৱস্থিত বেষ্টার্কটিকা।
ইয়ালৈ চৌখিন সাজ-পাৰ পৰিধান কৰা একাংশৰ সঘন আহ-যাহ ঘটে। বহুতে এই বিলাসী অট্টালিকাত সঁচাকৈয়ে দূতাবাসৰ কাম-কাজ চলে বুলি ধাৰণা কৰে। কিন্তু এই দূতাবাস প্রকৃততে এটা ভুৱা দূতাবাসহে। এই কথা শেহতীয়াভাৱে পোহৰলৈ আহে। দৰাচলতে এই দূতাবাস প্ৰৱঞ্চকে প্রতিষ্ঠা কৰা ভুৱা দূতাবাসে আছিল।
অলপতে উত্তৰ প্ৰদেশ আৰক্ষীৰ স্পেচিয়েল টাস্ক ফ’র্চে এই দূতাবাসত অভিযান চলায়। আৰক্ষী সূত্রই প্ৰকাশ কৰা অনুসৰি এই ভুৱা দূতাবাস প্ৰতিষ্ঠা কৰি অৰ্শবর্ধন জৈন নামৰ এজন প্ৰৱঞ্চকে বিদেশত চাকৰি দিয়াৰ প্রলোভনৰে অনেকৰ পৰা ধন সংগ্ৰহ কৰি আত্মসাৎ কৰে।
কেৱল সেয়াই নহয়, এই ভুৱা দূতাবাসৰ পৰা তেওঁ অনেক আপত্তিজনক কার্য চলোৱাৰো অভিযোগ উত্থাপন হৈছে। আৰক্ষী সূত্ৰই প্ৰকাশ কৰা অনুসৰি এই ভুৱা দূতাবাসটোত চলোৱা অভিযানৰ সময়ত ভুৱা কূটনৈতিক নম্বৰ প্লেটযুক্ত বহুসংখ্যক গাড়ী, ১২ খন অস্বীকৃত ৰাষ্ট্ৰৰ ভুৱা
কূটনৈতিক পাৰপত্ৰ, দেশৰ বৈদেশিক মন্ত্রণালয়ৰ ভুৱা মোহৰযুক্ত নথিপত্ৰ, ৩৪ খন দেশৰ মোহৰৰ লগতে নগদ ৪৪ লাখ টকা, বিদেশী মুদ্রা, এখন বিলাসী গাড়ী আদি জব্দ কৰা হয়। এই প্ৰৱঞ্চকজনে অট্টালিকাটো ভাড়াত লৈ এই ভুৱা দূতাবাস প্রতিষ্ঠা কৰি লুণ্ঠন চলোৱাৰ তথ্য আৰক্ষীৰ তদন্তত উদ্ধাৰ হৈছে।
এই ভুৱা দূতাবাসৰ চৌহদত ভাৰত আৰু বেষ্টার্কটিকাৰ পতাকা উদ্ধাৰ হয়। উল্লেখ্য যে পৃথিবীত বহু মাইক্র’নেচন আছে। এই সমূহক বিশ্বৰ সাৰ্বভৌম ৰাষ্ট্ৰসমূহে স্বীকৃতি প্রদান কৰা নাই।
বেষ্টার্কটিকাও এখন মাইক্র’নেচন। গাজিয়াবাদৰ দামী স্থানত দেশখনৰ নাম লৈ প্ৰৱঞ্চকজনে স্থাপন কৰা এই ভুৱা দূতাবাসৰ পৰা এখন অ’ডি আৰু এখন মার্চিডিজ গাড়ীও আৰক্ষীয়ে জব্দ কৰে। আৰক্ষী সূত্ৰই প্ৰকাশ কৰা অনুসৰি এই ভুৱা দূতাবাসৰ ভিতৰত প্ৰৱঞ্চক জৈনে বিভিন্ন দেশৰ ৰাষ্ট্ৰপতি আৰু প্ৰধানমন্ত্ৰীসকলৰ বহু গ্রুপ ফটো বিকৃত কৰি তেনে ফটোত তেওঁৰ ফটো সংলগ্ন কৰে।
বিভিন্নজনক আভুৱা ভাঁৰি লুণ্ঠন চলোৱাৰ উদ্দেশ্যে তেওঁ এই অপৰাধ সংঘটিত কৰে। তদন্তকাৰীৰ মতে, এনে ভুৱা ফটো তেওঁ বিভিন্নজনক দেখুৱায় আৰু বিদেশত চাকৰি যোগাৰ কৰি দিয়াৰ প্রলোভন দিয়ে। ইয়াৰ বিনিময়ত তেওঁ ধন বিচাৰে। বিদেশত চাকৰি কৰাৰ সপোন দেখি তেওঁৰ হাতত ধন তুলি দিয়া বহুলোক প্ৰৱঞ্চিত হয়। আৰক্ষী সূত্ৰই প্ৰকাশ কৰা অনুসৰি এই ভুৱা দূতাবাস ২০১৭ৰ পৰা চলি আছিল।
লোকচক্ষুক আভুৱা ভাঁৰিবলৈ প্ৰৱঞ্চকজনে বিভিন্ন দাতব্যমূলক অনুষ্ঠানৰো আয়োজন কৰিছিল। তেওঁ এনে এক অনুষ্ঠান আছিল জৈন ধর্মাবলম্বীসকলৰ ভাণ্ডাৰা ভোজ-ভাতৰ অনুষ্ঠান। তেওঁ এই অনুষ্ঠানসমূহ দূতাবাসৰ চৌহদত আয়োজন কৰে।
ৰাজীৱ গান্ধী হত্যাৰ অভিযুক্ত স্বয়ম্ভ ঈশ্বৰ পুৰুষ চন্দ্ৰস্বামীৰ স’তে ঘনিষ্ঠতা ভুৱা দূতাবাস পাতি বহুতক প্ৰৱঞ্চনা কৰা অৰ্শবর্ধন জৈন পূৰ্বৰে পৰা বিভিন্ন তদন্তকাৰী সংস্থাৰ দৃষ্টিত আছে। এটা ছেটেলাইট ফোন ৰখাৰ অভিযোগত ২০১১ত তেওঁৰ বিৰুদ্ধে আৰক্ষীয়ে গোচৰ ৰুজু কৰিছিল।
তদন্তত উদ্ধাৰ হয় যে প্রাক্তন প্ৰধানমন্ত্ৰী ৰাজীৱ গান্ধী হত্যাৰ অন্যতম অভিযুক্ত স্বয়ম্ভূ ঈশ্বৰ পুৰুষ চন্দ্ৰস্বামীৰ স’তে ঘনিষ্ঠ আছিল জৈন। উল্লেখ্য যে প্রাক্তন প্রধানমন্ত্রী গান্ধী হত্যাৰ ষড়যন্ত্ৰৰ বাবে স্বয়ম্ভূ ঈশ্বৰ পুৰুষ চন্দ্ৰস্বামীয়ে পুঁজি যোগান ধৰাৰ অভিযোগ উত্থাপন হৈছিল।
তিনি প্রাক্তন প্রধানমন্ত্রী পি ভি নৰসিংহ ৰাও আৰু ভি পি সিঙৰ আধ্যাত্মিক গুৰুৰূপে পৰিচিত চন্দ্ৰস্বামী ৮০ আৰু ৯০ দশকত প্ৰচুৰ প্ৰভাৱশালী হৈ উঠিছিল। তেওঁৰ স’তে ছৌডি আৰবৰ কুখ্যাত অস্ত্র ব্যৱসায়ী আদনান খাশ’গ্লিৰো লেনদেন আছিল।
স্বয়ম্ভূ ঈশ্বৰ পুৰুষজনৰ আশ্রমত তালাচী অভিযানত এই তথ্য উদ্ধাৰ হয়। বৃহৎ বিত্তীয় অনিয়মৰ স’তেও চন্দ্রস্বামী জড়িত আছিল। ১৯৯৬ত তেওঁ গ্ৰেপ্তাৰ হ’বলগীয়া হয়। এই কুখ্যাত স্বয়ম্ভূ ঈশ্বৰ পুৰুষৰ স’তে প্রবঞ্চক জৈনৰ ঘনিষ্ঠতা থকাৰ তথ্য তদন্তত উদ্ধাৰ হৈছে।
তদুপৰি তেওঁৰ খাশ’গ্লিৰ স’তেও সম্পৰ্ক থকাৰ তথ্য তদন্তকাৰীয়ে পোহৰলৈ আনিছে। নিজকে বেষ্টার্কটিকাৰ কনছুল জেনেৰেল সজালে প্রৱঞ্চকে গাজিয়াবাদৰ উক্ত ভুৱা দূতাবাসত নিজকে বেষ্টার্কটিকাৰ কূটনৈতিক প্রতিনিধি অর্থাৎ কনছুল জেনেৰেল সজাই প্ৰৱঞ্চকজনে নেমপ্লেট আঁৰি থৈছিল।
উল্লেখ্য যে এজন মার্কিন নৌসেনা বিষয়াই প্রতিষ্ঠা কৰা বেষ্টার্কটিকাক পৃথিৱীৰ কোনো সার্বভৌম দেশে স্বীকৃতি প্রদান কৰা নাই। লক্ষ্যণীয় যে উত্তৰ প্ৰদেশ আৰক্ষীৰ স্পেচিয়েল টাস্ক ফ’র্চে ভুৱা দূতাবাসটো উৎখাত কৰাৰ মাথোঁ কিছুদিন পূর্বে বেষ্টার্কটিকাৰ ইনস্টাগ্রাম একাউণ্টত নতুন দিল্লীৰ কনছুলেট জেনেৰেলৰ ফটো শ্বেয়াৰ কৰা হয়।
এই কনছুলেট জেনেৰেল বেৰ’ন এইছ ভি জৈনে পৰিচালনা কৰে বুলিও উল্লেখ থাকে। সামাজিক মাধ্যমত প্ৰৱঞ্চকজনে দাবী কৰা অনুসৰি বছৰত তেওঁ স্থানীয় লোকৰ মাজত পাঁচবাৰ খাদ্য বিতৰণ কৰে। এনেদৰে তেওঁ সহস্রাধিক দৰিদ্ৰ লোকক আহাৰ খুৱায় বুলিও দাবী কৰে।
অৱশ্যে তেওঁৰ এই জনসেৱামূলক কাম-কাজ লোকচক্ষুক ফাকি দিয়াৰ উদ্দেশ্যে কৰা বুলি চৰ্চিত হৈছে।
