Rengma:✒️ৰাজ্যৰ বিজেপি মিত্ৰজোঁট চৰকাৰৰ পাঁচ বছৰীয়া কার্যকাল অন্ত পৰিবলৈ এবছৰতকৈ কম দিন বাকী থকা অৱস্থাত অসম-নগালেণ্ড সীমান্তবর্তী ৰেংমা সংৰক্ষিত বনাঞ্চলত যোৱা ২৯ জুলাইত আৰম্ভ হোৱা বেদখল উচ্ছেদ অভিযানে বৃহস্পতিবাৰে তৃতীয় দিনত ভৰি দিয়ে।
এই অভিযানৰ তৃতীয় দিনা বনাঞ্চলখনৰ পাঁচটা স্থানত বন বিভাগে বেদখল উচ্ছেদ কৰে। এই স্থানসমূহ হ’ল দুই নম্বৰ দয়ালপুৰ, তিনি নম্বৰ দয়ালপুৰ, তিনি নম্বৰ দলনী পথাৰ, আনন্দপুৰ আৰু খেৰবাৰী। বন বিভাগে বুলড’জাৰৰে বেদখলকাৰীসকলৰ পকীঘৰো ভাঙি পেলায়।
শান্তিপূর্ণভাৱে চলা এই উচ্ছেদ অভিযানৰ সময়ত আজি চোৰাং চিকাৰৰ গোচৰত অভিযুক্ত খেৰবাৰীৰ নিবাসী হবিবুৰ ৰহমান (৩৯), ছৰিফত আলী (৫২) আৰু নেৱাজ আলী (৩৯)ৰ গৃহসহ সাত শতাধিক বাসগৃহ উচ্ছেদ কৰা হয়। সূত্রই প্রকাশ কৰা অনুসৰি, এই তিনিজন কাজিৰঙা ৰাষ্ট্ৰীয় উদ্যানৰ বন্য জীৱ-জন্তুৰ চিকাৰ, গঁড়ৰ খৰ্গ আৰু অবৈধ মাৰণাস্ত্ৰ সৰবৰাহৰ গোচৰতো অভিযুক্ত হৈ আছে।
অভিযোগ অনুসৰি, এই তিনি অভিযুক্তই উৰিয়ামঘাটৰ বেদখলীকৃত ভূমিৰ পৰাই বৃহৎ চোৰাং বেপাৰ চলাই আছিল। কালি তিনিওকে আৰক্ষীয়ে গ্ৰেপ্তাৰ কৰে। পাছত আদালতে তিনিওকে ন্যায়িক জিম্মালৈ প্ৰেৰণ কৰে। উল্লেখ্য যে ৰেংমা বনাঞ্চলত আৰম্ভ হোৱা এই উচ্ছেদ অভিযানৰ প্ৰথম দুটা দিনত বনাঞ্চলখনৰ কমেও ২৫০ হেক্টৰ ভূমি পুনৰুদ্ধাৰ কৰা হয়।
আনহাতে, প্ৰশাসন আৰু আৰক্ষীৰ সহযোগত বন বিভাগ চলোৱা এই অভিযান অহা তিনি আগষ্টলৈ অব্যাহত থাকিব বুলি সূত্ৰই প্ৰকাশ কৰিছে। অৱশ্যে উচ্ছেদিতসকলে স্থানীয় বিভিন্ন গাঁৱত আশ্রয় লোৱা বুলি একাংশ লোকে সন্দেহ প্রকাশ কৰিছে। ইপিনে, উচ্ছেদিতসকল থকাৰ বাবে বৰপথাৰৰ ছেৱাগুৰিত অস্থায়ী শিবিৰ নিৰ্মাণ কৰি থকা হৈছে।
উল্লেখ্য যে এই উচ্ছেদ অভিযানৰ জৰিয়তে ৰাজ্য চৰকাৰে ৰেংমা সংৰক্ষিত বনাঞ্চলৰ ১১ হেজাৰ হেক্টৰ ভূমি বেদখলকাৰীৰ কবলৰ পৰা উদ্ধাৰৰ লক্ষ্য লৈছে। বনাঞ্চলখনত অব্যাহত থকা এই উচ্ছেদ অভিযানে হৈছে ৰাজ্যৰ সৰ্ববৃহৎ উচ্ছেদ অভিযান।
উচ্ছেদ চলোৱাৰ পূৰ্বে কর্তৃপক্ষই সকলো বসতিস্থল সম্পূৰ্ণৰূপে খালী থকাটো নিশ্চিত কৰে। উচ্ছেদথলীত বন বিভাগৰ বিশেষ মুখ্য সচিব এম কে যাদৱ, আৰক্ষী মহাপৰিদৰ্শক (আইন-শৃংখলা) অখিলেশ কুমাৰ সিং, গোলাঘাটৰ জিলা আয়ুক্ত পুলক মহন্ত উপস্থিত থাকি অভিযান তদাৰক কৰে।
অভিযান সঠিক সময়ত আৰু সুচাৰুৰূপে সম্পন্ন কৰিবলৈ বন বিভাগে বৃহৎ সংখ্যক যন্ত্রপাতি ব্যৱহাৰ কৰে।
