Blood Moon:✒️এই বিশাল বিশ্বত সূর্য-চন্দ্র-পৃথিৱীৰ অবিৰাম ঘূর্ণন, পাৰস্পৰিক টান, বিভিন্ন পর্যায়ত নতুন নতুন ঘটনাৰ জন্ম হোৱা- এইবোৰ আচলতে জ্যোতির্বিজ্ঞানৰ খেলা। এই খেলাত কেতিয়া কি যাদুৰ সৃষ্টি হ’ব, সেয়া কোনেও নাজানে। ঠিক যেনেকৈ আগন্তুক সপ্তাহতে এক বিৰল মহাজাগতিক ঘটনাৰ সাক্ষী হ’ব বিশ্ববাসী।
নিশাৰ আকাশত পোহৰ বিলাব ৰক্তবর্ণ চন্দ্ৰই। আকাশ পৰিষ্কাৰ থাকিলে ভাৰতসহ একাধিক দেশৰ পৰা খোলা চকুৰে দেখা যাব ‘ব্লাড মুন’। সম্প্রতি একাংশ বিজ্ঞানীয়ে এই কথা সদৰী কৰিছে। অহা সাত ছেপ্টেম্বৰৰ নিশা ন বজাৰ পৰা আঠ ছেপ্টেম্বৰৰ ২-৩০ বজা পর্যন্ত নিশাৰ আকাশত উদয় হ’ব ৰক্তবর্ণ চন্দ্র।
আচলতে কি ঘটিব সাত ছেপ্টেম্বৰৰ নিশা? একাংশ জ্যোতির্বিজ্ঞানীয়ে জনাইছে যে পৃথিৱীৰ ছাঁত চন্দ্ৰটো সম্পূর্ণরূপে ঢাক খাই পৰিব। তাৰ ফলতে শ্বেতশুভ্র জোনবাইৰ ৰং-ৰূপ সলনি হৈ পৰিব। ৰক্তিম আভাৰে জলমল হৈ উঠিব পৃথিৱীৰ একমাত্র উপগ্রহটো। সেয়াই ‘ব্লাড মুন’।
পূর্ণগ্রাস চন্দ্রগ্রহণ একেবাৰে বিৰল কোনো ঘটনা নহয়। পৃথিৱীৰ আহ্নিক গতি-বার্ষিক গতিৰ বাবে নির্দিষ্ট সময়ৰ অন্তৰালত এই ঘটনা ঘটে; কিন্তু তাৰ বাবে চন্দ্ৰৰ ৰূপ পৰিৱৰ্তন আৰু ৰক্তবর্ণ হৈ উঠা বিষয়টো অতি বিৰল।
ভাৰতৰ অহা সাত ছেপ্টেম্বৰৰ নিশা ৮-৫৮ বজাৰ পৰা পাছদিনা অর্থাৎ আঠ ছেপ্টেম্বৰৰ পুৱতি নিশা ২-২৫ বজা পর্যন্ত পৃথিৱীৰ ছাঁত চন্দ্রটো ঢাক খাই থাকিব। ইয়াৰ ভিতৰত নিশা ১১ বজাৰ পৰা ১২-২২ বজা পর্যন্ত পূর্ণগ্রাস চন্দ্ৰগ্ৰহণৰ সময়সীমা।
সেই সময়ৰ ভিতৰতে চন্দ্ৰটো লাহে লাহে ৰক্তাভ হৈ উঠিব। আনহাতে, মাহেন্দ্রক্ষণ হৈছে নিশা ১১-৪১ বজা। অর্থাৎ এই সময়তে ‘ব্লাড মুন’ৰ সবাতোকৈ ধুনীয়া ৰূপটো দেখা যাব বুলি বিজ্ঞানীসকলে জনাইছে। অৱশ্যে এটা চর্তও আছে। আকাশ পৰিষ্কাৰ, প্ৰদূষণৰ মাত্ৰা ন্যূনতম থাকিলেহে ‘ব্লাড মুন’ৰ আচল ৰূপটো দেখা যাব। কলকাতা, মুম্বাই আৰু বাংগালুৰুৰ পৰা স্পষ্টৰূপত দেখা যাব ৰক্তবৰ্ণ চন্দ্ৰ।
