HIV:✒️সবাতোকৈ সৰু এইছআইভি আক্ৰান্তৰ বয়স মাত্র ১০ বছৰ। এই শিশুটিৰ সন্ধান পায় প্রাক্তন যৌনকর্মী তথা সমাজসেবী ছেছেনিয়েলি নাইটালাই। ২০১৩ত নাইটালাই যেতিয়া ফিজিৰ ছাৰভাইকেল এডভোকেচি নেটৱৰ্ক প্ৰতিষ্ঠা কৰে, তেতিয়াও সেই শিশুটিৰ জন্ম হোৱা নাছিল।
অথচ আজি সেই শিশুটি ফিজিৰ হেজাৰ হেজাৰ নাগৰিকৰ ভিতৰত অন্যতম, যি এইছআইভি ভাইৰাছত আক্রান্ত। বহু ক্ষেত্ৰত কিশোৰ-কিশোৰীৰ দেহতো এই ভাইৰাছৰ সংক্রমণে দেখা গৈছে। ইয়াৰে অধিকাংশই মাদকৰ অপব্যৱহাৰৰ বাবে হৈছে। নাইটালাৰ সংস্থাই ফিজিৰ ৰাজধানী ছুভাত যৌনকর্মী আৰু মাদক সেৱনকাৰীক সাহায্য কৰে। তেওঁ বিচিচিক কয়, ‘তৰুণ প্ৰজন্মৰ মাজত মাদকৰ ব্যৱহাৰ বৃদ্ধি পাইছে।
বিগত পাঁচ বছৰত প্ৰশান্ত মহাসাগৰীয় দ্বীপৰাষ্ট্ৰ ফিজিত এইছআইভিয়ে মহামাৰীৰ ৰূপ ধাৰণ কৰিছে। দেশখনৰ জনসংখ্যা ১০ লাখৰো কম। ২০১৪ত দেশখনত এইছআইভি আক্ৰান্তৰ সংখ্যা আছিল পাঁচশৰো কম। ২০২৪ৰ ভিতৰত আক্ৰান্তৰ সংখ্যা প্রায় ৫,৯০০ত উপনীত হৈছে। অর্থাৎ ১১ গুণ বৃদ্ধি পাইছে।
কেৱল ২০২৪তে ফিজিত ১,৫৮৩টা নতুন সংক্রমণ নথিভুক্ত কৰা হৈছে, যিটো পাঁচ বছৰৰ গড়ৰ তুলনাত ১৩ গুণৰ অধিক। এই সংক্রমিতসকলৰ ভিতৰত ১৫ বছৰ বা তাকৈ কম বয়সী কিশোৰ-কিশোৰী তথা শিশুৰ সংখ্যা ৪১টি। ২০২৩ত সেই সংখ্যা আছিল ১১টি।
ফিজিৰ স্বাস্থ্যমন্ত্ৰীয়ে জানুৱাৰীত এইছআইভিৰ প্ৰাদুৰ্ভাৱৰ কথা ঘোষণা কৰিছিল। সম্প্রতি দেশখনৰ সহকাৰী স্বাস্থ্যমন্ত্রী পেনিওনি ৰাভনাওৱাই সতৰ্ক কৰি দিছিল যে ২০২৫ৰ শেষৰ ফালে দেশত তিনি হেজাৰৰ অধিক নতুন ঘটনা দেখা যাব পাৰে।
তেওঁ জনাইছিল যে এয়া এক জাতীয় জৰুৰী অৱস্থা তথা ইয়াৰ হ্রাস পোৱাৰ কোনো লক্ষণ নাই।একাংশ বিশেষজ্ঞই এইছআইভি সংক্রমণ বৃদ্ধিৰ অন্তৰালত সচেতনতা বৃদ্ধিৰ অভাব আৰু এইছআইভি সম্পর্কে কুসংস্কাৰকে দায়ী কৰিছে।
পূৰ্বৰ তুলনাত অধিক লোকে পৰীক্ষা কৰোৱাত উৎসাহ দেখুৱাইছে। তৎসত্ত্বেও বহুত সংক্ৰমণৰ খবৰ গোপন কৰাৰে সম্ভাৱনা অধিক। যি ইংগিত দিয়ে যে সংক্ৰমণৰ হাৰ চৰকাৰী পৰিসংখ্যাতকৈ অনেক বেছি। বিশেষজ্ঞসকলে মত প্রকাশ কৰিছে যে এই মহামাৰীৰ এটা গুৰুত্বপূৰ্ণ কাৰণ হৈছে অসুৰক্ষিত মাদক আৰু যৌন অভ্যাসৰ বৃদ্ধি।
বিশেষকৈ এক উদ্বেগজনক প্ৰৱণতা হৈছে ‘ব্লুটুথিং’, য’ত এজন মাদক সেৱনকাৰীয়ে নিজৰ সিৰাৰে এটা ড’জ ইনজেকচন লোৱাৰ পাছত তেজ টানি আনি সেই চিৰিঞ্জটো আন এজনক প্ৰদান কৰে, সেইজন লোকে চিৰিঞ্জটো ব্যৱহাৰ কৰি আন এজনৰ প্ৰদান কৰে। এইদৰে সমগ্ৰ প্ৰক্ৰিয়াটো চলি থাকে।
ড্রাগ ফ্রী ফিজি নামৰ সংস্থাটোৰ কাৰ্যবাহী পৰিচালক কালেচি ভোলাটাবুরে যোৱা মে’ত এই ঘটনাটো প্রত্যক্ষ কৰে। ছুভাত পুৱা খোজকঢ়াৰ সময়ত তেওঁ এদল তৰুণক সমবেত হৈ এটা চিৰিঞ্জৰে নিজৰ শৰীৰত ৰক্ত প্রবাহিত কৰা দেখিছিল। ভোলাটাবুৱে কয় যে তৰুণসকলে মাত্র এটা বেজি ব্যৱহাৰ কৰিছিল আৰু তেওঁলোকে তেজো আদানপ্রদান কৰিছিল।
উল্লেখ্য যে মাদক গ্ৰহণৰ এই পদ্ধতি পূৰ্বে দক্ষিণ আফ্রিকা আৰু লেছ’থ’ত জনপ্রিয় আছিল। সম্প্রতি ফিজিত এই পদ্ধতি জনপ্রিয় হৈ পৰিছে। ই তুলনাত সস্তা। একাধিক ব্যৱহাৰকাৰীয়ে এটা বেজিকে ভাগ কৰি ল’ব পাৰে। ফিজিৰ স্বাস্থ্য মন্ত্রণালয়ে ব্লুটুথিং আৰু কেমছেক্স (যৌন কাৰ্যকলাপৰ পূৰ্বে বা সময়ত মেথামফেটামিনৰ দৰে ঔষধ ব্যৱহাৰ) ক এইছআইভিৰ হাৰ বৃদ্ধিৰ মূল কাৰণৰূপে চিহ্নিত কৰিছে।
ফিজিৰ ৰাষ্ট্ৰীয় এইছআইভি তথ্য অনুসৰি, ৪৮ শতাংশ সংক্রমণ বেজিৰ মাধ্যমেৰে মাদক ব্যৱহাৰৰ কাৰণে, ৪৭শতাংশ যৌন সংক্ৰমণৰ কাৰণে আৰু অধিকাংশ শিশুৰ ক্ষেত্ৰত মাতৃৰ দেহৰ পৰা সংক্রমণ ঘটিছে। ভোলাটাবু আৰু নাইটালাই কয় যে শিক্ষাৰ অভাৱেই এই মহামাৰীৰ এটা মূল কাৰণ আৰু তেওঁলোকৰ সংস্থাসমূহে সচেতনতা বৃদ্ধিৰ বাবে কাম কৰি আছে।
আনহাতে, নিউ জিলেণ্ডৰ কেণ্টাৰবেৰী বিশ্ববিদ্যালয়ৰ পেচিফিক ৰিজিঅ’নেল ছিকিউৰিটি হাবৰ প্ৰধান হোছে ছুছা-ছান্টোছে এক আসন্ন বিপৰ্যয়ৰ বিষয়ে সতৰ্ক কৰি কয়, ‘উদ্বেগ কেৱল বৰ্তমানৰ সংকটক লৈ নহয়, পৰৱৰ্তী তিনি বছৰক লৈও। এই মহামাৰীৰ মোকাবিলাৰ বাবে ফিজিত প্রয়োজনীয় চিকিৎসাকর্মী, চিকিৎসাৰ সুযোগ তথা অন্যান্য জৰুৰী ব্যৱস্থাৰ অভাৱ আছে।’
