Eviction:✒️বহু লোকৰ কান্দোনৰ মাজতে শনিবাৰে নগাঁৱৰ লুটুমাৰী সংৰক্ষিত বনাঞ্চলত জিলা প্রশাসনে উচ্ছেদ অভিযান চলায়। জিলা আয়ুক্ত দেৱাশীষ শৰ্মাৰ তত্ত্বাৱধানত ৫০খন এক্সকেভেটৰৰে কটকটীয়া নিৰাপত্তা ব্যৱস্থাৰ মাজত কালি পুৱা সাত বজাৰ পৰা প্ৰশাসনে সংৰক্ষিত বনাঞ্চলখনত উচ্ছেদ অভিযান চলায়। এই অভিযানৰ সময়ত ৪২৬টা পকী ঘৰ আৰু ৯৮৫টা কেঁচা ঘৰ ভাঙি পেলোৱা হয়। তদুপৰি ১২টা জামে মছজিদো উচ্ছেদ কৰে প্ৰশাসনৰ বাহিনীয়ে।
উল্লেখ্য যে চৰকাৰী হিচাপ অনুসৰি, এই সংৰক্ষিত বনাঞ্চলৰ কমেও ৫,৯৬২ হেক্টৰ ভূমি ১,৫৪৮টা পৰিয়ালে বেদখল কৰি তাত ঘৰ-দুৱাৰ সাজি বাস কৰিবলৈ লয়। আশ্চর্যজনকভাৱে বেদখলকাৰীসকলে জল জীৱনকে ধৰি বিভিন্ন চৰকাৰী আঁচনিৰো সুবিধা পায়। এনেদৰে চৰকাৰী আঁচনিৰ সুবিধা দি কোনে দৰদ প্ৰদৰ্শন কৰিছিল বুলি সম্প্রতি প্রশ্ন উত্থাপন হৈছে। বিশেষকৈ জল জীবন আঁচনি ২০১৯ৰ পৰাহে কেন্দ্ৰীয় চৰকাৰে মুকলি কৰে। উল্লেখ্য যে এই বেদখলকাৰীসকললৈ প্রশাসনে তিনি মাহ পূর্বে উচ্ছেদৰ জাননী জাৰি কৰে।
এই জাননী লাভ কৰাৰ পাছতে বেদখলকাৰীসকলৰ ৭০ শতাংশই ইতিমধ্যে নিজৰ ঘৰ-দুৱাৰ ভাঙি-ছিঙি আঁতৰি গৈছে। বাকী ৩০ শতাংশত আজি প্রশাসনে উচ্ছেদ অভিযান আৰম্ভ কৰে। আজি ৯০ শতাংশ বেদখলীকৃত অঞ্চলত উচ্ছেদ অভিযান চলে। বাকী ১০ শতাংশত কাইলৈ উচ্ছেদ চলোৱা হ’ব বুলি প্রশাসনে প্রকাশ কৰিছে। এই উচ্ছেদ অভিযান উপলক্ষে বিগত কিছুদিনৰ পৰা প্রশাসনে প্রস্তুতি আৰম্ভ কৰে।
ইয়াৰ অংশৰূপে পাঁচটাকৈ অর্ধসামৰিক বাহিনীৰ গোটক শিবিৰত সাজু কৰে প্ৰশাসনে। এনে কঠোৰ নিৰাপত্তাৰ মাজত আজি প্রশাসনে জিলা আয়ুক্তৰ উপৰি বন বিভাগৰ বিশেষ মুখ্য সচিব এম কে যাদৱ, মধ্য অসমৰ আৰক্ষী মহাপৰিদৰ্শক ড° ভি প্রসাদ গঞ্জলা আদিৰ উপস্থিতিত সংৰক্ষিত বনাঞ্চলখনৰ অন্তৰ্গত ডুন জুৰিৰপাৰ, হাতীজুৰ ব্লক, ভেদুৰিপাৰ, মাটিখলা, চামগাঁও, আমডুবি, মাজগাঁও, নিমবাগান আৰু খেৰণিৰ নতুন বজাৰ গাঁৱত উচ্ছেদ চলায়।
চৰকাৰী তথ্য অনুসৰি, শনিবাৰে উচ্ছেদৰ প্ৰথম দিনটোতে ৯০ শতাংশ গৃহ, গছ-গছনি, কৃষিজাত সামগ্রী ভাঙি পেলোৱা হয়। উচ্ছেদ অভিযান শান্তিপূর্ণভারে চলে। কোনো বেদখলকাৰীয়ে অভিযানত বাধা দিয়া নাছিল।
শশ আলিম-উলেমাৰ কান্দোন
শনিবাৰে উচ্ছেদ অভিযানৰ সময়ত কান্দোনত ভাগি পৰে শ শ আলিম-উলেমা। এফালৰ পৰা উচ্ছেদকাৰীয়ে এটাৰ পাছত আনটোকৈ ১২টা মছজিদ ভাঙি পেলোৱাৰ সময়ত আলেম-উলেমাসকলে কান্দি কান্দি হাতযোৰ কৰি কয়, ‘আমাৰ ঘৰ ভাঙক; কিন্তু আল্লাহৰ ঘৰ নাভাঙিব।’ এইসকলৰ কান্দোন তথা কাকুতি-মিনতিয়ে উচ্ছেদস্থলীৰ পৰিৱেশ সেমেকাই তোলে।
দুর্গতিৰ সীমা নোহোৱা হৈছে কণ কণ শিশু-মহিলা-বৃদ্ধ-বৃদ্ধাৰ
লুটুমাৰী সংৰক্ষিত বনাঞ্চলৰ শনিবাৰে উচ্ছেদৰ পাছত উচ্ছেদিত পৰিয়ালসমূহৰ কণ কণ শিশু আৰু মহিলাসকলৰ লগতে বৃদ্ধ-বৃদ্ধাসকলৰ দুখ-দুর্গতিৰ সীমা নোহোৱা হৈছে। ঘৰখন হেৰুৱাৰ দুখত বহুতে কান্দোনত ভাগি পৰে। উল্লেখ্য যে ২০০৩ত স্থাপিত লুটুমাৰী এনচি প্রাথমিক বিদ্যালয়, খেৰণি মাজগাঁও (বি) নিউ প্রাথমিক বিদ্যালয় আৰু ২৯৩ নম্বৰ খেৰণি মাজগাঁও অংগনবাড়ী কেন্দ্ৰৰ গৃহসমূহ উচ্ছেদ কৰা নাই যদিও এইসমূহত অধ্যয়নৰত শিশুসকলৰ ভৱিষ্যৎ অন্ধকাৰ হোৱা বুলি চর্চা চলিছে।
কান্দি কান্দি ভাগৰি পৰা একাংশ উচ্ছেদিত লোকে কয়, ‘আমাৰ থাকিবলৈ ঠাই নাই। আমি ইয়াত দশক দশক ধৰি বাস কৰি আছো। আমাক থাকিবলৈ অকণমান মাটিৰ প্রয়োজন।’ এই অঞ্চলত জল জীবন মিছনৰো তিনিখন আঁচনি আছে। আনহাতে, ধর্মীয় সংখ্যালঘু (মুছলমান) লোকক লক্ষ্য কৰি চৰকাৰে উচ্ছেদ অভিযান চলাইছে বুলি সৰৱ হৈ উঠিছে আমছুৰ নগাঁও জিলা সমিতি। আমছুৰ জিলা সমিতিয়ে উচ্ছেদিত ভূমিহীন লোকসকলক পুনৰ সংস্থাপন দিবলৈ চৰকাৰক দাবী জনাইছে।
উচ্ছেদ বন্ধ হোৱাৰ ভুৱা প্ৰচাৰ চলাই গ্ৰেপ্তাৰ দুই
উচ্চ ন্যায়ালয়ে উচ্ছেদ বন্ধ কৰিবলৈ নির্দেশ দিয়া বুলি ভুৱা প্ৰচাৰ চলাই লুটুমাৰী সংৰক্ষিত বনাঞ্চলৰ বেদখলকাৰীসকলৰ পৰা ধন সংগ্ৰহ কৰা দুজন লোকক আৰক্ষীয়ে গ্ৰেপ্তাৰ কৰিছে। এই কথা সদৰী কৰি আৰক্ষী অধীক্ষক স্বপ্ননীল ডেকাই জনায় যে ধৃত লোক দুজন হ’ল আব্দুল আৱাল আৰু ইউছুফ আলী। দুয়োৰে বিৰুদ্ধে আইনগত ব্যৱস্থা আৰম্ভ হৈছে বুলি আৰক্ষী অধীক্ষকে সদৰী কৰিছে।
বেদখলকাৰীসকলে কেনেকৈ বিভিন্ন চৰকাৰী আঁচনি ভোগ কৰিলে শ্রমিক সন্থাৰ প্ৰশ্ন
লুটুমাৰী সংৰক্ষিত বনাঞ্চলৰ বেদখলকাৰীসকলে কেনেদৰে বিভিন্ন চৰকাৰী আঁচনিৰ সুবিধা ভোগ কৰিবলৈ পালে বুলি প্রশ্ন উত্থাপন কৰিছে সদৌ অসম গ্রামীণ শ্রমিক সন্থাকে ধৰি একাংশ সংগঠনে। এক বিবৃতিত গ্রামীণ শ্রমিক সন্থাৰ সাধাৰণ সম্পাদক অৰূপ কুমাৰ মহন্ত, নিখিল ভাৰত কৃষক সভাৰ ৰাজ্যিক সভাপতি আৰু অসম ৰাজ্যিক কৃষক সভাৰ নগাঁও জিলা সমিতিৰ সভাপতি গোবিন চন্দ্র নাথে কয়, ‘বনাঞ্চল নিশ্চিতভাৱে সুৰক্ষিত আৰু সংৰক্ষণৰ ব্যৱস্থা কৰিব লাগিব। কিন্তু ইয়াৰ অর্থ এইটো নহয় যে সকলো মানবীয় দৃষ্টিকোণ আৰু অধিকাৰ ভংগ কৰা হ’ব। ১৯১৯তে লুটুমাৰী বনাঞ্চলক সংৰক্ষিত বনাঞ্চল বুলি ঘোষণা কৰা হৈছিল। বিগত ৪০ বছৰত উক্ত অঞ্চল কেনেকৈ জনবসতিপূর্ণ অঞ্চললৈ পর্যবসিত হ’ল?’
তদুপৰি উক্ত অঞ্চললৈ চৰকাৰী বিদ্যালয়, অংগনৱাড়ী কেন্দ্ৰ, জল জীৱন মিছনৰ খোৱাপানী যোগান, ঘৰে ঘৰে বিদ্যুৎ যোগান, এমজি এনৰেগাৰ জবকার্ড, পিএম কিষাণ যোজনা, খাদ্য সুৰক্ষা আইনৰ বেছন কার্ড, অৰুণোদয়, প্রধানমন্ত্রী আবাস যোজনাৰ লগতে মহিলা উদ্যমিতা আঁচনিৰ ১০ হেজাৰ টকাৰ কোনে যোগান ধৰিলে বুলিও এই সংগঠনসমূহৰ নেতৃবৃন্দই প্রশ্ন উত্থাপন কৰিছে।
লগতে উক্ত অঞ্চলত পঞ্চায়ত, বিধানসভা আৰু লোকসভা নিৰ্বাচনৰ ভোটাৰ তালিকাত কেনেকৈ নাম অন্তর্ভুক্ত হ’ল আৰু কিয় ১৯৮৫ৰ পৰা ২০২৫লৈকে প্রকাশিত ভোটাৰ তালিকাবোৰত লুটুমাৰী মুক্ত বনাঞ্চল বুলি প্রকাশিত হৈ আছে বুলিও বিবৃতিটোত প্রশ্ন কৰা হৈছে। বিবৃতিটোত উক্ত তিনি সংগঠনৰ নেতৃবৃন্দই লগতে কয় যে এই অঞ্চলৰ বাসিন্দাসকলৰ এনআৰচিত জৰীপ নোহোৱা গাঁও বুলি স্বীকৃতি দিয়া হ’ল।
এই প্রশ্নৰ উত্তৰ জিলা প্রশাসনে ৰাজহুৱা কৰাৰ লগতে বন বিভাগৰ স’তে সংশ্লিষ্ট বিভাগসমূহকো দোষী সাব্যস্ত কৰি আইনী বিচাৰৰ আওতালৈ আনিবলৈ সংগঠনকেইটাই দাবী উত্থাপন কৰিছে। বিবৃতিটোত এই বুলিও দাবী জনোৱা হয় যে যদি লুটুমাৰী সংৰক্ষিত বনাঞ্চলৰ ভিতৰত ৰাণীপুখুৰী, বৰপুখুৰী, পদুমপুখুৰী, উলুমগুৰী, লংজাপ আৰু লুটুমাৰী জৰীপ নোহোৱা গাঁৱৰ ১২,৬০৮ বিঘা একঠা মাটি আছে, তেন্তে সেই জৰীপ নোহোৱা গাঁওসমূহত থকা চুবুৰিসমূহৰ নাম চৰকাৰে শীঘ্ৰে প্ৰকাশ কৰা উচিত।
লগতে তিনি এই সংগঠনে একেবাৰে আশ্রয়হীন উচ্ছেদিত পৰিয়ালসমূহৰ বাবে শীঘ্রে আশ্রয় শিবিৰ স্থাপন কৰিবলৈও দাবী জনাইছে। অন্যথা আন্দোলনৰ কাৰ্যসূচী গ্ৰহণ কৰাৰ হুংকাৰ দিছে সংগঠন তিনিটাই। সংগঠন তিনিটাই লগতে অভিযোগ উত্থাপন কৰে যে উচ্ছেদিত লোকসকলৰ বাবে আগতীয়াকৈ কোনো আশ্ৰয়ৰ ব্যৱস্থা নকৰাটোৱে ভাৰত চৰকাৰে ৰূপায়ণ কৰি থকা মহিলা সম্পর্কীয় বিভিন্ন আইন আৰু আঁচনিক উলংঘা কৰিছে।
তদুপৰি এই তিনি সংগঠনে ক্ষোভ কৰে যে অহা ফেব্ৰুৱাৰীৰ পৰা অনুষ্ঠিত হ’বলগীয়া হাইস্কুল শিক্ষান্ত আৰু উচ্চতৰ মাধ্যমিক চূড়ান্ত বৰ্ষৰ পৰীক্ষাৰ লগতে বছৰেকীয়া পৰীক্ষাৰ এই উচ্ছেদিত অঞ্চলসমূহৰ পৰীক্ষাৰ্থীসকলৰ কোনো ক্ষয়ক্ষতি নোহোৱাৰ নিশ্চিতকৰণ নকৰাটোৱে শিক্ষাৰ অধিকাৰ আইন উলংঘন কৰিছে।