Venezuela:✒️বছৰৰ শেষত ইতিহাস গঢ়িলে দক্ষিণ আমেৰিকাৰ বাঁওপন্থী দেশ ভেনিজুৱেলাই। অৱশ্যে এই ইতিহাস কোনো গৰ্বৰ নহয়; বৰঞ্চ এফালে যিদৰে প্ৰকৃতিক লৈ আশংকা সেইদৰে আনফালে মানব সভ্যতাৰ বাবেও লজ্জাজনক।বিশ্বৰ প্ৰথমখন বৰফশূন্য দেশত পৰিগণিত হ’ল ভেনিজুৱেলা। ক্রমাৎ গলি গলি সেই দেশৰ সমস্ত বৰফ সম্প্ৰতি পানীত পৰিণত হৈছে। যিখিনি বাকী আছে, সেইখিনিক কোনো প্ৰকাৰে পানীৰ বৰফ ধৰ্ম ধৰি ৰখাৰ এক অসীম সংগ্রাম বুলি ক’লেও অত্যুক্তি নহ’ব।
পৰিসংখ্যা অনুসৰি, বিগত এটা শতিকাত আন্দিজ পর্বতমালাৰ পাদদেশত অৱস্থিত এই নাতিশীতোষ্ণ দেশখন কমেও ছটা হিমবাহ গলনৰ সাক্ষী হৈছে। এনে সর্বনাশী কাণ্ডৰ সূত্রপাত ঘটিছিল ২০০০ৰ আগৰ পৰাই। আন্দিজ পর্বতমালাৰ অন্যতম আলোচিত হিমবাহ আছিল হামবোল্ট বা লা কোৰোনা। সেই হিমবাহৰ গলনেই আছিল অশনি সংকেত।
যিমানেই দিন বাগৰিছে, হামবোল্টৰ গলন সিমানেই বৃদ্ধি পাইছে। পৰিসংখ্যা অনুসৰি এই মুহূৰ্তত হামবোল্টৰ মাত্র ০.২ শতাংশহে অবশিষ্ট আছে, বাকী সকলোখিনি বৰফ গলি ইতিমধ্যে পানীত পৰিণত হৈছে। একাংশ বিশেষজ্ঞৰ মতে, হামবোল্টে ‘হিমবাহ’ৰ সংজ্ঞা হেৰুৱাইছে।
ডাৰহাম বিশ্ববিদ্যালয়ৰ হিমবাহ বিশাৰদ ড° কেৰ’লিন ক্লাছনে কয়, ‘২০০০ৰ পৰাই ভেনিজুরেসাত হিমবাহসমূহৰ পৰিস্থিতি বেয়াৰ দিশলৈ গৈছিল। এতিয়া যি অৱস্থা, তাৰ ফলত হিমবাহ বুলি নকৈ এই অংশক বৰফৰ প্ৰান্তৰ বুলি কোৱাই শ্রেয়।’
কেৱল ভেনিজুৱেলাই নহয়, আন্দিজ পর্বতমালাৰ সংলগ্ন কলম্বিয়াতো প্রায় একেই পৰিস্থিতি। সেই দেশত ৪৫০ হেক্টৰ অঞ্চল জুৰি থকা হিমবাহৰ অংশ এতিয়া নামিছে মাত্র দুই হেক্টৰলৈ। এজন বিশেষজ্ঞৰ মতে, হিমালয়ৰ সৰ্বনিম্ন আকাৰ-আয়তনৰ মাপকাঠি এতিয়াও সেইদৰে একো নাই। সাধাৰণভাৱে ১০ হেক্টৰ অঞ্চলজুৰি বৰফপিণ্ডৰ অৱস্থান হ’লেই তাক হিমবাহ বুলি ধৰা হয়।
অৱশ্যে ওজনো এক বিশেষ ফেক্টৰ। এতিয়া গোলকীয় উষ্ণতাৰ ফলত হিমবাহ ঠিক কিমান সংকুচিত হ’লে তাক হিমবাহ বুলি কোৱা হ’ব, সেয়া অজ্ঞাত; কিন্তু হামবোল্টৰ পৰিণতিত তেওঁলোক আতংকিত হৈ পৰিছে। এইদৰেই যদি আগন্তুক কিছু বছৰৰ ভিতৰত পৃথিৱীখন হিমবাহ শূন্য হৈ পৰে, তেনেহ’লে চৰম বিপদ আৰু ৰোধ কৰিব পৰা নাযাব। শেষৰ দিনটো যেন আগুৱাই আহিব।