LPG:✒️দেশজুৰি ইন্ধন সংকটৰ ভুৱা খবৰৰ আৰু আতংকজনক পৰিস্থিতিৰ মাজতে পেট্ৰোলিয়াম আৰু প্ৰাকৃতিক গেছ মন্ত্ৰালয়ে গুৰুত্বপূর্ণ স্পষ্টীকৰণ আগবঢ়াইছে। চৰকাৰৰ মতে, দেশত পেট্ৰ’ল, ডিজেল আৰু এলপিজিৰ যোগান “সম্পূৰ্ণ সুৰক্ষিত আৰু নিয়ন্ত্ৰণত” আছে, আৰু কোনো ধৰণৰ অভাৱ নাই।
চৰকাৰীয়ে স্পষ্টকৈ জনাইছে যে, দেশজুৰি এক লাখতকৈ অধিক পেট্ৰ’ল পাম্প সাধাৰণভাৱে চলি আছে আৰু কোনো স্থানতে ৰেচনিং বা যোগান বন্ধ কৰাৰ দৰে পৰিস্থিতি সৃষ্টি হোৱা নাই।
শেহতীয়াকৈ বিভিন্ন অঞ্চলত দেখা পোৱা দীঘলীয়া লাইন আৰু অধিক পৰিমাণে ইন্ধন কিনা ঘটনাসমূহ বাস্তৱ অভাৱৰ বাবে নহয়, বৰঞ্চ সামাজিক মাধ্যমত প্ৰচাৰিত “ইচ্ছাকৃত ভুৱা তথ্য”ৰ ফলত সৃষ্টি হোৱা আতংকৰ বাবেই হৈছে বুলি চৰকাৰে মন্তব্য কৰিছে।
চৰকাৰৰ তথ্য অনুসৰি, ভাৰতত প্ৰায় ৬০ দিনৰ ক্ৰুড অইলৰ মজুত ইতিমধ্যে সুৰক্ষিত কৰি ৰখা হৈছে আৰু LPGৰ ক্ষেত্ৰতো অন্ততঃ একমাহৰ যোগান নিশ্চিত কৰা হৈছে।
ইয়াৰ উপৰিও, দেশৰ সকলো ৰিফাইনেৰী পূৰ্ণ ক্ষমতাত চলি আছে আৰু আন্তঃৰাষ্ট্ৰীয় বজাৰৰ পৰা একাধিক উৎসৰ জৰিয়তে নিয়মীয়াকৈ খনিজ তেল আমদানি কৰা হৈছে, যাৰ ফলত যোগান ব্যৱস্থাত কোনো ধৰণৰ অভাৱ নাই।
এই পৰিস্থিতিত চৰকাৰে সাধাৰণ জনতাক স্পষ্ট আহ্বান জনাইছে—ভুৱা খবৰ বিশ্বাস নকৰিব, অযথা অধিক পৰিমাণে ইন্ধন বা গেছ কিনি মজুত নকৰিব, আৰু কেৱল চৰকাৰী সূত্ৰৰ ওপৰত নিৰ্ভৰ কৰক।
লগতে, ভুৱা তথ্য প্ৰচাৰ কৰা সকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলিও সকীয়নি দিয়া হৈছে।
সামগ্ৰিকভাৱে, বিশ্বজুৰি ইন্ধন অস্থিৰতাৰ মাজতো ভাৰতত ইন্ধনৰ যোগান স্থিতিশীল আৰু সুৰক্ষিত আছে বুলি কেন্দ্ৰই পুনৰ নিশ্চিত কৰিছে।