অযোধ্যাৰ পৰিৱেশ এতিয়া উৎসৱমুখৰ । তাৰ মাজতে ৰাম মন্দিৰৰ ভূমিপূজন অনুষ্ঠানৰ প্ৰথম নিমন্ত্ৰণী পত্ৰ লাভ কৰে অযোধ্যা ভূমি বিবাদ ঘটনাৰ মোকৰ্দমাৰ লগত জড়িত ইকবাল আনচাৰীয়ে । অনুষ্ঠানৰ প্ৰথমখন নিমন্ত্ৰণী পত্ৰ পোৱাৰ পিছত আনচাৰীয়ে কয় যে, ‘এইয়া ভগৱান ৰামৰে ইচ্ছা, যাতে মই প্ৰথম নিমন্ত্ৰণ পাওঁ । মই এইটো স্বীকাৰ কৰিছো । মন্দিৰৰ ভূমি পূজনৰ অনুষ্ঠানৰ বাবে সকলো যা-যোগাৰ কৰা হৈছে আৰু এই অনুষ্ঠানত প্ৰধানমন্ত্ৰী নৰেন্দ্ৰ মোদী উপস্থিত থাকিব।’
তেওঁ লগতে কয় যে, যেতিয়া মন্দিৰৰ নিৰ্মাণ কাৰ্য সম্পূৰ্ণ হ’ব তেতিয়া অযোধ্যাৰ ভাগ্যই সলনি হ’ব । অযোধ্যাৰ পৰিৱেশ আৰু অধিক সুন্দৰ হৈ পৰিব। এইয়া ভগৱানৰ ভূমি হয় আৰু ইয়াত ৰাম মন্দিৰ স্থাপন হোৱাৰ বাবে মই সুখী। আনচাৰীয়ে প্ৰকাশ কৰা মতে, তেওঁ আগতেই কৈছিল যে যদি অযোধ্যাত কোনো ধৰ্মীয় অনুষ্ঠান অনুষ্ঠিত কৰা হয় আৰু তেওঁক যদি নিমন্ত্ৰণ কৰে তেওঁ নিশ্চিতভাৱে তাত উপস্থিত থাকিব ।
উল্লেখ্য যে, অহা ৫ আগষ্টত বহু প্রত্যাশিত ৰামমন্দিৰৰ ভূমি পূজনৰ লগতে শিলান্যাস স্থাপন কৰিব প্ৰধানমন্ত্ৰী নৰেন্দ্ৰ মোদীয়ে । কৰ’না পৰিস্থিতিৰ বাবে বহু কম সংখ্যক লোকক ভূমি পূজন অনুষ্ঠানলৈ নিমন্ত্ৰণ কৰা হৈছে যদিও কে’বাখনো ৰাজ্যৰ মুখ্যমন্ত্ৰী, কেন্দ্ৰীয় মন্ত্ৰীপৰিষদৰ মন্ত্ৰী আৰু আৰ এছ এছৰ প্ৰধান মোহন ভাগৱতে অনুষ্ঠানত অংশগ্ৰহণ কৰিব।