সৌ সিদিনালৈ গুলীৰ শব্দত বিনিদ্ৰ ৰজনী পাৰ হোৱা বিটিআৰৰ ওদালগুৰি জিলাত এতিয়া কৰ্ম সংস্কৃতিত পাৰ হয় বিনিদ্ৰ ৰজনী ৷ পাৰৰ গুণগুণতিত পুৱা হোৱা ওদালগুৰিত এতিয়া বিৰাজমান ভাতৃত্ববোধৰ মধুৰ এনাজৰী ! তাকো বিভিন্ন জাতি-জনগোষ্ঠীৰ মাজত ৷ য’ত এতিয়া হাঁহিমুখে আদৰণি জনায় সকলোকে ৷ কেৱল সিমানেই নহয়, তেওঁলোক ৰাজহুৱা সিদ্ধান্তৰ ক্ষেত্ৰতো অবিচল, অটল, বদ্ধপৰিকৰ ৷ কাম শেষ নোহোৱালৈকে নৰয় থমকি ৷ এইবেলি তেওঁলোকৰ মাজত দেখা গৈছে এনে এক ধাৰণা যে আসন্ন ভয়াবহ বানপানীৰ পৰা পৰিত্ৰাণ পাবই লাগিব ৷ নহ’লে সৰ্বনাশ আহিব ঘৰ-বাৰীলৈ ৷ সেয়ে শিলৰ বান্ধ সম্পূৰ্ণ নোহোৱালৈকে চলি থাকিব ৰাজহুৱা শ্ৰমদান কাৰ্যসূচী ৷
উল্লেখ্য যে বৰ্তমানৰ ব্যক্তিকেন্দ্ৰিক, যন্ত্ৰবৎ যুগটো বৃহত্তৰ ৰাজহুৱা স্বাৰ্থত মিশ্ৰিত জাতি-জনগোষ্ঠীৰ লোকে সমিলমিলেৰে এনে দৃঢ় মনোবল অটুত ৰখাৰ বিৰল ঘটনা বিগত দুসপ্তাহে ঘটি আছে ওদালগুৰি জিলাৰ ননৈ নদী আৰু কুলশী নদীৰ দুৱাৰমুখ জালীমুখত ৷ প্ৰতিবেশী ৰাষ্ট্ৰ ভূটানৰ পাহাৰৰ ঠিক নামনিত থকা জালীমুখৰ শৈল জ্বালীবান্ধটো বিগত বৰ্ষবোৰত খহি খহি গৈ আছে ৷ ১১০০ মিটাৰ পুৰণা বান্ধটোৰ ইতিমধ্যে প্ৰায় ছয়শ মিটাৰ ছিগি গৈছে ৷ ফলত ভূটানৰ পানীৰ ধলে ইয়াৰ গতিপথ সলনি কৰি কুলশীলৈ বাগৰি আহে ৷ ফলত কুলশী নৈ (নামনিত শাকতোলা নাম লয়)খনে দৰং আৰু ওদালগুৰি জিলাৰ পাঁচটা বিধানসভা সমষ্টি ক্ৰমে পানেৰী, ওদালগুৰি, কলাইগাঁও, মঙলদৈ আৰু ছিপাঝাৰৰ এক বিশাল অঞ্চলত তাণ্ডৱলীলা চলাই আহিছে ৷
বান্ধটো অধিক ছিগি যোৱাৰ বাবে নৈখনৰ তাণ্ডৱলীলাও বাঢ়ি গৈ আছে ৷ সেয়ে এইবেলি ননৈ চেৰফাং আৰু খালিংদুৱাৰ পৰিষদীয় সমষ্টিৰ ছাগলীঝাৰ, খৈৰাজংগল আদি অঞ্চলৰ ৰাইজে যোৱা ১৬ জুনৰ পৰা ৰাজহুৱা শ্ৰমদান কাৰ্যসূচীৰেে বান্ধ মেৰামতিৰ কাম আৰম্ভ কৰে ৷ সহযোগ কৰিছে কৃষকমুক্তি সংগ্ৰাম সমিতি, হাতীগড় ট্ৰেক্টৰ সন্থা, মঙলদৈ মিডিয়া চাৰ্কোল আদিয়ে ৷ তদুপৰি ৩০খন ৰাজহুৱা দোং-বান্ধ সমিতিৰ এহেজাৰ কৃষকৰ প্ৰত্যেকেই শ্ৰমদানৰ উপৰি পাঁচশ টকাকৈ আগবঢ়াইছে ৷
এইদৰে তেওঁলোকে দেখুৱাইছে যে “ৰাইজে ননৈকো ভেটিব পাৰে”ৰ বিৰল দৃষ্টান্ত ৷ তাঁতী বড়ো, নাৰ্জাৰী, পৰ্জা, কুজুৰ, ছেত্ৰী, খান, ডেকা, শৰ্মা, বৰা, বসুমতাৰী, লাক্ৰা, নেৱাৰ, আদি মিশ্ৰিত উপাধিৰ লোকসকলৰ মতে “, পৰত আশ, বনত বাস ৷ চৰকাৰো আমাৰ বাবে পৰৰ দৰেই হৈ পৰিছে ৷”
উল্লেখ্য যে এতিয়ালৈকে তেওঁলোকে প্ৰয়োজনীয় সমস্ত ব’ল্ডাৰ বান্ধটোত ওখ আৰু দীঘলীয়াকৈ জমা কৰিছে ৷ তদুপৰি জালী (নেট) কিছু ক্ৰয় কৰি জালীৰে শিল বন্ধা কাম একাদিক্ৰমে কৰি সম্পূৰ্ণ কৰিছে ৷ পেটত ভোক, প্ৰখৰ ৰ’দৰ উত্তাপ, ঘৰুৱা জঞ্জাল এই সকলো একাষৰীয়া কৰি ইয়াত একচেটিয়াকৈ শ্ৰমদান কৰি থকাৰ বিষয়ে জিলা দুখনৰ নিৰ্বাচিত জনপ্ৰতিনিধিসকলে জনাৰ পাছতো কাণসাৰ নিদিয়া ঘটনাই ৰাজনীতিকৰ স্বৰূপ উদঙাই দিছে ৷
অভিযোগ মতে পাঁচগৰাকী বিধায়ক ক্ৰমে পানেৰীৰ বিশ্বজিৎ দৈমাৰী (বিজেপি, বিধানসভাৰ অধ্যক্ষ), ওদালগুৰিৰ গোবিন্দ বসুমতাৰী (ইউপিপিএল, বিটিআৰৰ উপ-মুখ্য), কলাইগাঁৱৰ দুৰ্গাদাস বড়ো (বিপিএফ), মঙলদৈৰ বসন্ত দাস (কংগ্ৰেছ) আৰু ছিপাঝাৰৰ পৰমানন্দ ৰাজবংশী (বিজেপি)ৰ লগতে ওদালগুৰিৰ ১০টা পৰিষদীয় সমষ্টিৰ এমচিএলএ আদিয়ে অন্ততঃ ফোনযোগে উৎসাহজনক মন্তব্য এটাও দিয়া নাই ৷ আনকি শক্তিশালী সাংসদৰূপে পৰিচিত দিলীপ শইকীয়াই এই বিষয়ে জ্ঞাত হোৱাৰ পাছতো নিজা সমষ্টিৰ এই ভৌগোলিক সীমান্তৱৰ্তী এলেকাটো পৰিদৰ্শন কৰিবলৈও আহৰি নোপোৱাৰ অভিযোগ উঠিছে ৷
একেদৰে নিৰুত্বাপ হৈ আছে জলসম্পদ, জলসিঞ্চন আদি বিভাগৰ হৰ্তা-কৰ্তাসকল ৷ অৱশ্যে ননৈ-চেৰফাং সমষ্টিৰ প্ৰতিনিধি তথা বিটিআৰৰ কাৰ্যবাহী সদস্য সঞ্জীৱ তাঁতীয়ে (এক লাখ টকা দান) আৰু প্ৰাক্তন মন্ত্ৰী ৰিহন দৈমাৰীয়ে ২৫ হেজাৰ টকাৰে উৎসাহ দিয়া বুলি কয় অন্যতম আগৰণুৱা কৰ্মী হীৰালাল পৰ্জাই ৷ তেওঁ অৱশ্যে নেট কিনিবলৈ এতিয়াও কিছু ধনৰ নাটনি হৈ থকা বুলি উল্লেখ কৰি কয় যে, মা গংগাদেৱী (জলকুৱঁৰী)য়ে নিশ্চয় তাৰো ব্যৱস্থা কৰি দিব ৷
ইয়াৰ মাজতে ৰাইজৰ আহ্বানক সঁহাৰি জনাই কালি জালীমুখত উপস্থিত হয় বিটিআৰৰ জলসিঞ্চন বিভাগৰ কাৰ্যবাহী সদস্য (মুদৈবৰী) দিগন্ত বৰুৱা ৷ বিটিআৰৰ মনোনিত সদস্য অৰ্পণা মেধীৰ স’তে উপস্থিত হোৱা ই এমগৰাকীয়ে ৰাইজৰ হাতত ৫০ হেজাৰ টকা আগবঢ়াই কয় যে, বিষয়টো ইতিমধ্যে ওদালগুৰিৰ বিধায়ক, বিটিআৰৰ প্ৰধান আদিৰ স’তে পূৰ্ণ গতিত আলোচনা চলি আছে ৷ এইবেলি ৰাইজৰ স’তে হাতে-হাত মিলাই যাব আৰু অহা বছৰলৈ স্থায়ী সমাধানসূত্ৰ উলিওৱা হ’ব বুলি ই এম বৰুৱাই দৃঢ়তাৰে ৰাইজক জনায় ৷