‘চৰকাৰী চাকৰিতাে ভাগ্যত নায়েই এতিয়া চৰকাৰী বিজ্ঞাপনাে বিক্ৰী কৰিব নােপােৱা হ’লাে। চাকৰিৰ অনলাইন আবেদন প্রক্রিয়াই আমাৰ ভাত মাৰিলে।
এতিয়া আমি ষ্টেণ্ডার্ড ফর্ম, চাকৰিৰ বিজ্ঞাপন বিক্ৰীৰ পৰিৱর্তে বিক্ৰী কৰাে এনভেলপ, শাক, কণী।’ ১৭ বছৰে গুৱাহাটীৰ কাছাৰীস্থিত মেঘদূত ভৱনৰ সমীপত চৰকাৰী চাকৰিৰ বিজ্ঞাপন বিক্ৰীৰে জীৱন জীৱিকাৰ পথ মুকলি কৰা নলবাৰী বেলশৰৰ বলেন বর্মনৰ বক্তব্য এয়া।
বিগত প্রায় পাঁচ বছৰমান ধৰি চৰকাৰী চাকৰিসমূহ অনলাইন প্রক্রিয়াৰে আবেদন কৰাৰ ব্যৱস্থা কৰিছে চৰকাৰে। তাৰ মাজতে অৱশ্যে কেতবােৰ চাকৰি অনলাইন আৰু অফলাইন দুয়ােটা পদ্ধতিৰে আবেদন জনাব পাৰি; কিন্তু সেয়া অতি সীমিত।
অনলাইন ব্যৱস্থাটো আৰম্ভ হােৱাৰ পাছৰে পৰা আবেদনকাৰীয়ে অফলাইনতকৈ অনলাইন প্রক্রিয়াটোক অধিক গুৰুত্ব প্রদান কৰি আহিছে। অনলাইন ফর্ম কিনি তাক পূৰণ কৰি সেইখন ডাকঘৰত জমা দিবলৈ যােৱাতকৈ অধিকাংশই বর্তমান সময়ত অনলাইন পদ্ধতিটোক আঁকোৱালি লৈছে।
যাৰ বাবে বিপদত পৰিছে চৰকাৰী বিজ্ঞাপন বিক্রেতাসকল। তেওঁলােকৰ জীৱিকাৰ ওপৰত ইয়াৰ নেতিবাচক প্ৰভাৱ পৰিছে। অনলাইন ব্যৱস্থা হােৱাৰ পাছৰে পৰা কাছাৰৰ পদপথৰ বিজ্ঞাপন বিক্রেতাৰ সংখ্যা ৯০ শতাংশলৈ হ্রাস পালে।
যাৰ বাবে এতিয়া তেওঁলােকৰ পানীত হাঁহ নচৰা অৱস্থা। তেওঁলােকৰ দুদর্শাৰ বিষয়ে উল্লেখ কৰি বৰ্মনে ‘দৈনিক অগ্রদূত’ক পুনৰ কয়, আমি প্রায় ৭০ জনে বিজ্ঞাপন বিক্ৰীৰে জীৱন জীৱিকা চলাই আছিলাে; কিন্তু এতিয়া মাত্র ছজনহে আছে।
বিজ্ঞাপন বিক্ৰী কৰাৰ লগতে নিজেও কোনাে কোনাে চাকৰিৰ বাবে আবেদন পত্র পূৰণ কৰে। লিখিত প্ৰীক্ষাও দিওঁ; কিন্তু চাকৰি নাপাওঁ। অৱশ্যে আমাৰ লগৰে চাৰিজনে তেনেকৈ চাকৰি পাইছে। মই ২০০৪ৰ পৰা ইয়াত বিজ্ঞাপন বিক্ৰী কৰি আহিছাে।
মােৰ দৰে বহুতে ২০-২২ বছৰে ইয়াত বিজ্ঞাপন বিক্ৰী কৰি পৰিয়াল পােহপাল দি আহিছিল। যিহেতু চৰকাৰী চাকৰি আমাৰ বাবে পৰ্বৰ্তত কাছৰ কণী বিচৰাৰ দৰে কথা। আমিও বেছি আশা নকৰি এইদৰে বিজ্ঞাপন বিক্ৰীৰে চলি আছিলাে।
এই কামটোত উপার্জন যথেষ্ট সন্তোষজনক আছিল বুলি উল্লেখ কৰি তেওঁ পুনৰ কয়, “আমাৰ ভাল বিক্রী হৈছিল। অফলাইন আবেদনকাৰীক ১০ টকাত বিজ্ঞাপনৰ লগতে ষ্টেণ্ডার্ড ফর্ম, দুটাকৈ খাকী ৰঙৰ এনভেলপৰ উপৰি প্রয়ােজন অনুসৰি ডাক টিকট যােগান ধৰিছিলাে।
নিতৌ আমি এহেজাৰ-১৫০০ টকালৈ বিজ্ঞাপন বিক্ৰী কৰিছিলাে। সকলাে খৰচ কৰি নিতৌ ছশ-আঠশ টকা হাতত ৰৈছিল। পুৱা নমান বজাৰ পৰা নিশা আঠন বজালৈ কাছাৰীৰ এই অস্থায়ী দোকানমূহত চাকৰিৰ আবেদনকাৰীৰ ভিৰ আছিল।
অষ্টম শ্রেণী পাছ কৰাৰ পৰা স্নাতকোত্তৰ উত্তীর্ণ, পি এইছ ডি কৰা ছাত্রলৈকে সকলাে আহিছিল চাকৰিৰ বিজ্ঞাপন বিচাৰি৷ ৰাজ্য তথা কেন্দ্ৰ চৰকাৰৰ বিভিন্ন বিভাগৰ খালী পদত আবেদন কৰাৰ বাবে হেজাৰ হেজাৰ আবেদনকাৰীয়ে গিজগিজাই আছিল কাছাৰীৰ এই নির্দিষ্ট ঠাইখিনি; কিন্তু আজি এই স্থানত নাই পূর্বৰ সেই ব্যস্ততা।
পুৱাৰে পৰা ৫০জনতকৈ অধিক বিজ্ঞাপন বিক্রেতা ব্যস্ত হৈ থকা ঠাইখিনিত আজি নীৰৱতাই বাহ লৈছে। বহু বিজ্ঞাপন বিক্রেতা কর্মহীন হােৱাৰ লগতে বহুতে জীৱিকাৰ পথ সলনি কৰিলে বুলি উল্লেখ কৰি বৰ্মনে জাকালি।
উক্ত স্থানতে ঘৰৰ শাক, কণী আদি বিক্ৰী কৰে বুলিও জানিবলৈ দিয়ে। তেওঁ জনােৱা অনুসৰি পূৰ্বতে বিজ্ঞাপন বিক্ৰী কৰা বহুতে এতিয়া চাহ দোকান দিয়াৰ লগতে কোনােৱে গাড়ী চলাই, চৰবত বিক্ৰী কৰি পৰিয়াল পুহি আছে।
বর্তমান বাৰ কমল কুমাৰ, হাজোৰ সমীন কলিতা আৰু দীপক ডেকা, নলবাৰীৰ বিকাশ বর্মন আৰু টিহুৰ ঠাকুৰীয়াই এই স্থানত বিজ্ঞাপন বিক্ৰী কৰি আছে বুলি কয়। বর্তমান অসম চৰকাৰে নিয়ােগ সৃষ্টি কৰিব নােৱৰাৰ বাবেই বিজ্ঞাপনাে নােহােৱা হ’ল বুলি উল্লেখ কৰি সম্প্রতি তেওঁলােকে বিজ্ঞাপনৰ পৰিৱর্তে এনভেলপ, কলম, মাস্ক বিক্ৰী কৰি আছে বুলি হুমুনিয়াহ কাঢ়ে।
শেহতীয়াকৈ ফৰেনচিক ছায়েন্সৰ এল ডি পদৰ বিজ্ঞাপন প্রকাশ হৈছিল যদিও পদৰ সংখ্যা একেবাৰে কম হােৱা বাবে বিজ্ঞাপনটো বিক্ৰী কৰিবলৈ ইচ্ছা নকৰা বুলিও কয় বিক্রেতাসকলে। উল্লেখ্য যে বর্তমান নিতৌ কেৱল ২৫০-৩০০ টকাৰ এনভেলপ বিক্ৰী কৰি আহিছে বিক্রেতাসকলে।
সেয়ে বলেন বর্মনৰ লগতে বাকীকেইজন বিজ্ঞাপন বিক্রেতাই অসম চৰকাৰক পৰবৰ্তী সময়ত বিজ্ঞাপনবােৰ অফলাইন আৰু অনলাইন দুয়ােটা প্রক্রিয়াৰ জৰিয়তে আবেদন কৰাৰ ব্যৱস্থা ৰাখিবলৈ আহ্বান জনায়।