বিশেষজ্ঞসকলৰ অধিকাংশৰে মত ক’ভিড অতিমাৰী এইবাৰ অন্তৰ পথত । ইউৰোপে জনাইছে, ক’ভিড লাহে লাহে সাধাৰণ ফ্লু লৈ পৰিৱৰ্তিত হ’ব । যদিও বিশ্ব স্বাস্থ্য সংস্থা (হু)-ৰ প্রধান টেড্র’ছ এডানম গেব্রিয়েছাছে আজি কয়, ‘‘অতিমাৰী শেষ হোৱাৰ কোনো লক্ষ্মণ নাই ।’’ অ’মিক্রনক যিদৰে লঘু কৰি লোৱা হৈছে, এই প্রসংগতো তেওঁ কয়, ‘‘কোনো ভুল নকৰিব । অ’মিক্রনত হাস্পাতালত ভর্তি হ’বলগীয়া হৈছে, মৃত্যুও হৈছে ।’’ তেওঁ কয়, ‘‘গড়ে হয়তো সৰহ সংখ্যক লোকেই কম ভুগিছে । কিন্তু যিদৰে লঘুভাৱে লোৱা হৈছে, সেইটো ভুল । ইয়াৰ ফলত ভুল বার্তা প্ৰচাৰ হৈছে । মানুহে প্রাণৰ মূল্য দিবলগীয়া হৈছে ।’’
কৰ’না ভাইৰাছৰ ডেল্টা ষ্ট্ৰেনৰ তুলনাত সম্প্ৰতি ইয়াক নিৰীহ যেন লাগিলেও অ’মিক্রনৰ প্রভাৱ ক’ত স্তব্ধ হ’ব, তাক লৈ চিন্তিত আমেৰিকা । এটা নতুন সমীক্ষাত দাবী কৰা হৈছে, মার্চৰ মাজভাগতে প্ৰায় ৫০ হেজাৰৰ পৰা তিনি লাখ লোকৰ প্রাণহানি হ’ব পাৰে দেশত । ইতিমধ্যে দেশখনত চাৰে আঠ লাখ লোকৰ মৃত্যু হৈছে ক’ভিডত । সমগ্ৰ বিশ্বত ক্ষতিৰ তালিকাত শীর্ষত আছে আমেৰিকা ।
নৱেম্বৰৰ পৰা সংক্রমণ পুনৰ বৃদ্ধি হ’বলৈ লয় আমেৰিকাত । লগতে ডেল্টা আৰু অ’মিক্রনৰ ঢৌ । ক্রমে অ’মিক্রনেই মূল সংক্রামক ষ্ট্ৰেন হৈ উঠিছে । বিশেষজ্ঞসকলৰ দাবী, টিকাকৰণে বহু পৰিমাণে ক্ষয়ক্ষতি ৰোধ কৰিছে । সেয়ে বিগত বৰ্ষৰ দৰে মৃত্যুৰ ঢল নমা নাই । যদিও বহু হাস্পাতালত শয্যাৰ অভাৱ, স্বাস্থ্যকর্মচাৰীসকলৰ অনেকেই সংক্রমিত । ৰাষ্ট্ৰপতি জ’ বাইডেন ঘোষণা কৰিছে, বিপর্যস্ত প্রদেশসমূহত সেনাবাহিনীৰ স্বাস্থ্য কর্মচাৰীসকলৰ নিয়োগ কৰা হ’ব ।
আজি ৰাষ্ট্ৰপতি বাইডেনে জনাইছে, ভাল গুনমানৰ ৪০ কোটি মাস্ক বিনামূল্যে বিতৰণ কৰা হ’ব জনসাধাৰণৰ মাজত । মাস্ক পৰিধান কৰাৰ প্রয়োজনীয়তা সম্পর্কে জনসাধাৰণক সচেতন কৰিবলৈ এই চৰকাৰী উদ্যোগ । আগন্তুক সপ্তাহৰ পৰা এই কাৰ্য আৰম্ভ হ’ব । সেয়ে দেশৰ বিভিন্ন প্রান্তত হেজাৰ দশকত কেন্দ্র নির্ধাৰণ কৰা হৈছে ।
মাস্ক পৰিধান কৰাৰ উপৰিও কৰ’না পরীক্ষা কৰাতো জোৰ দিয়া হৈছে দেশখনত । কালি এটা ৱেবছাইট আৰম্ভ কৰা হৈছে । এই ৱেবছাইটত আমেৰিকাবাসীয়ে ঘৰতে বিনামূল্যে কৰ’না পৰীক্ষা কৰাব পাৰিব । দেশজুৰি কোটিৰো অধিক ৰেপিড টেষ্ট কিট বিতৰণৰ চিন্তা-চৰ্চাও কৰিছে চৰকাৰে ।