Train Blast in Pakistan :
তীব্ৰ অৰ্থ সংকটৰ সন্মুখীন হোৱা চুবুৰীয়া দেশ পাকিস্তানত বৃহস্পতিবাৰে সংঘটিত হয় এক ভয়ংকৰ বিস্ফোৰণ ৷ কুৱেটা চহৰ অভিমুখী জাফৰ এক্সপ্ৰেছ ৰে’ল খনত হোৱা বিস্ফোৰণত প্ৰায় দুজন লোক থিতাতে নিহত হোৱাৰ বিপৰীতে চাৰিজন গুৰুত্বৰভাৱে আহত হয় ৷
পেছোৱাৰৰ পৰা কুৱেটালৈ গৈ থকা পথত জাফৰ এক্সপ্ৰেছ খন চিচাভাটনি ৰে’লৱে ষ্টেচনৰ মাজেৰে যোৱাৰ সময়তে সংঘটিত হয় ভয়াৱহ বিস্ফোৰণটো ৷
যাত্ৰীবাহী ট্ৰেইন খনৰ ইকনমি ক্লাছৰ ছয় নম্বৰ ডবাত সংঘটিত এই বিস্ফোৰণত দুজন লোকৰ ঘটনাস্থলীতে মৃত্যু হয় আৰু আন চাৰি যাত্ৰী গুৰুত্বৰভাৱে আহত হয় ৷আহত সকলক ততাতৈয়াকৈ চিচাভাটনি চিকিৎসালয়ত ভৰ্তি কৰে ৰে’ল আৰক্ষীয়ে।
বিস্ফোৰণটি কেনেকৈ হ’ল আৰু কোনে কৰিলে সেয়া এতিয়াও জানিব পৰা হোৱা নাই যদিও পাক আৰক্ষীয়ে ইতিমধ্যে আৰম্ভ কৰিছে তদন্ত ৷
মনকৰিবলগীয়া যে,কুৱেটা অভিমুখী জাফৰ এক্সপ্ৰেছক লক্ষ্য কৰি বিস্ফোৰণ ঘটা এমাহৰ ভিতৰত এইটো দ্বিতীয়টো ঘটনা।ইয়াৰ পূৰ্বে ৩০ জানুৱাৰীত বেলুচিস্তানৰ কাছি জিলাৰ মাচ অঞ্চলৰ সমীপত জাফৰ এক্সপ্ৰেছত সংঘটিত হৈছিল আন এক বিস্ফোৰণ ৷
বিস্ফোৰণত আহত হৈছিল প্ৰায় আঠজনকৈ যাত্ৰী। ইয়াৰে দুজন গুৰুতৰভাৱে আহত হয় ৷ উল্লেখ্য যে, বিস্ফোৰণটি ইমানেই ভয়ংকৰ আছিল যে বিস্ফোৰণৰ পাছতে ট্ৰেইন খনৰ দুটা ডবা লাইনচ্যুত হৈছিল ৷
শেহতীয়াকৈ তীব্ৰ বিত্তীয় সংকটৰ সন্মুখীন হোৱা পাকিস্তানত সংঘটিত হোৱা ধাৰাবাহিক বিস্ফোৰণৰ ঘটনাই পাক চৰকাৰৰ বাবে আন প্ৰত্যাহ্বান হৈ পৰিছে ৷
