Arabian Sea:✒️যান্ত্ৰিক ত্ৰুটিৰ ফলত আৰব সাগৰ (Arabian Sea)ত বিপদত পৰে এখন ভাৰতীয় বাণিজ্যিক জাহাজ। সংকটময় পৰিস্থিতিত বিপদ সংকেত লাভ কৰাৰ লগে লগে সহায়ৰ হাত আগবঢ়ালে পাকিস্তান নৌবাহিনীয়ে (Pakistan Navy)। জাহাজখনত থকা নাবিকসকলক খাদ্য, চিকিৎসা আৰু অন্যান্য জৰুৰী সহায় আগবঢ়োৱা হয়।
তথ্য অনুসৰি এমভি গৌতম পানামৰ জাহাজখন ওমানৰ পৰা ভাৰতলৈ আহি আছিল। আৰব সাগৰত পোৱাৰ পিছতেই জাহাজখনত গুৰুতৰ যান্ত্ৰিক ত্ৰুটি দেখা দিয়ে, যাৰ ফলত জাহাজখন সম্পূৰ্ণৰূপে থমকি যায়। আগবাঢ়িবলৈ অসম্ভৱ হৈ পৰাত জাহাজখনৰ পৰা বিপদ সংকেত প্ৰেৰণ কৰা হয়। তাৰ পিছতেই পাকিস্তানি নৌবাহিনীৰ এখন জাহাজ ঘটনাস্থলীত উপস্থিত হৈ সহায় আগবঢ়ায়।
ঘটনাটোৰ পিছত মুম্বাইস্থিত সামুদ্ৰিক উদ্ধাৰ আৰু সমন্বয় কেন্দ্ৰ(Maritime Rescue and Coordination Centre)এ ইছলামবাদ(Islamabad)ৰ কৰ্তৃপক্ষৰ স’তে যোগাযোগ কৰি সহায় বিচাৰে। তাৰ পিছতেই এমভি গৌতমত থকা ছয়জন ভাৰতীয় আৰু এজন ইণ্ডোনেশীয় নাবিকৰ বাবে উদ্ধাৰ আৰু সহায় অভিযান আৰম্ভ কৰা হয়। এই অভিযানত পিএমএসএছ নামৰ এখন জাহাজ ব্যৱহাৰ কৰা হৈছিল।
উদ্ধাৰ অভিযানত পাকিস্তান সামুদ্ৰিক সুৰক্ষা সংস্থা(Pakistan Maritime Security Agency)এও সক্ৰিয় সহযোগ আগবঢ়ায়। পাক নৌবাহিনীয়ে এক বিবৃতিত জনায় যে, নাবিকসকলৰ সুৰক্ষা নিশ্চিত কৰিবলৈ খাদ্য, চিকিৎসা সহায়ৰ লগতে কাৰিকৰী সহায়ো প্ৰদান কৰা হৈছে।
ভাৰতীয় নৌসেনাৰ গান্ধীনগৰ মুখ্য কাৰ্যালয়ৰ সূত্ৰে জনোৱা মতে, তিনি মে’ত এমভি গৌতমৰ বিদ্যুৎ ব্যৱস্থা সম্পূৰ্ণৰূপে বিকল হৈ পৰিছিল। এই বিষয়ে চাৰি মে’ নিশা ১১টা ২২ মিনিটত নৌসেনাই তথ্য লাভ কৰে। জাহাজখন পাক জলসীমাৰ কাষত বিপদত পৰাৰ বাবে ইছলামবাদ(Islamabad)ৰ ওচৰত সহায় বিচৰা হয়, আৰু সেই মতেই তৎক্ষণাত সহায় আগবঢ়োৱা হয়।
যদিও নাবিকসকলক সুৰক্ষিতভাৱে উদ্ধাৰ আৰু সহায় আগবঢ়োৱা হৈছে, জাহাজখনৰ জেনাৰেটৰৰ ত্ৰুটি এতিয়াও সম্পূৰ্ণৰূপে ঠিক কৰা সম্ভৱ হোৱা নাই। সেয়ে বিকল্প ব্যৱস্থা গ্ৰহণৰ বাবে জাহাজখনৰ মালিক পক্ষক নিৰ্দেশ দিয়া হৈছে।
উল্লেখযোগ্য যে, এই ঘটনাৰ ভিডিঅ’ আৰু ছবি সামাজিক মাধ্যমত ব্যাপকভাৱে প্ৰচাৰ হৈছে, য’ত পাকিস্তানি নৌবাহিনীৰ স্পিড বোট আৰু হেলিকপ্টাৰে এমভি গৌতমত উদ্ধাৰ অভিযান চলোৱা দৃশ্য দেখা গৈছে।
