Nalbari:
” ২০২৫ ত সকলোৰে বাবে পকী ঘৰ ” – দেশৰ প্ৰধান মন্ত্ৰীয়ে বিশেষকৈ দুখীয়া শ্ৰেণীৰ লোকসকলক লক্ষ্য কৰি এনে ধৰণে যি ঘোষণা কৰিছিল সেয়াই ৰাজ্যৰ অন্যান্য প্ৰান্তৰ লগতে নলবাৰী জিলাৰো প্ৰায়বোৰ অঞ্চলতে পকী ঘৰ নিৰ্মানে একপ্ৰকাৰ মিছন ৰূপ লাভ কৰিছে ।
২০১১ আৰু ২০১৮ ৰ অনুমোদিত তালিকা অনুসৰি চৰকাৰে ২০২২ ৰ ফালে প্ৰধান মন্ত্ৰী আৱাস যোজনাৰ ঘৰ অনুমোদন দিয়াৰ লগে লগে প্ৰায়বোৰ গাওঁতেই ব্যাপক হাৰত পকী ঘৰ নিৰ্মাণৰ কাম অহৰহ চলি আছে। বহুসংখ্যক পৰিয়ালে দুটা পৰ্যন্ত ঘৰ লাভ কৰিছে।
আনকি কিছু কিছু অঞ্চলত মিস্ত্ৰী – সামগ্ৰীৰ অভাৱ পৰিলক্ষিত হৈছে। পৰিস্থিতিয়ে এনে ৰূপ লৈছে যে নলবাৰীত বৰ্তমান প্ৰতিটো ইটাৰ দাম ১৫-১৭ টকা হৈ পৰিছে। মাত্ৰ এটা বছৰ পূৰ্বে জিলাখনত ইটাৰ দাম সৰ্বাধিক ১২ টকা আছিল যদিও ২০২২.ৰ শেষৰ ফালে এই দাম আকস্মিকভাৱে বৃদ্ধি হয়।
ইটা ব্যৱসায়ী সকলে প্ৰকাশ কৰা অনুসৰি যথেষ্ঠ হাৰত চৰকাৰী ঘৰ অনুমোদন হোৱা বাবে নলবাৰী জিলাৰ ভাতা সমূহৰ উৎপাদিত ইটাই চাহিদা পূৰণ কৰিব নোৱাৰাত সোণাপুৰ আৰু অন্যান্য ঠাইৰ পৰা ইটা আমদানি কৰিব লগা হোৱাত ১১-১২ টকীয়া ইটাৰ দাম ১৫-১৭ টকা পর্যন্ত বৃদ্ধি হল।
কিন্তু এনে পৰিবেশৰ মাজতো দিন হাজিৰা কৰি বৃদ্ধ মাতৃৰ লগতে নিজৰ ৬ জনীয়া পৰিয়াল এটাক পোহপাল দি অহা অসুস্থ মানুহ এজনৰ পৰিয়াল এটালৈ চকু নপৰিল কোনো দলীয় বিষয়- ববীয়া, পঞ্চায়ত প্ৰতিনিধি অথবা চৰকাৰী বিভাগৰ। এই ঘটনা নলবাৰী জিলাৰ পাইকান দিৰুৱা গাঁওৰ। মানুহজনৰ নাম ভবেন দাস।
বৃদ্ধ মাতৃকে ধৰি লৰা- ছোৱালী ৪ জন সহ তেওঁৰ ৭ জনীয়া এটা পৰিয়াল। ঘৰ বুলি কলে ১০/১২ ফুট দীঘ- পুতালৰ এখন টিনপাতৰ চালি। এখন বেৰ নাই। বিচনাৰ নামত এখন বাঁহৰ চাং আৰু আন এখন বিছনা মাটিতে। গোটেই পৰিয়ালটোৰ থকা – খোৱা আৰু লৰা- ছোৱালীকেইটাৰ পঢ়া- শুনাৰ ঠাই এইখিনিয়েই।
ৰন্ধা- বঢ়া, শৌচ- পেচাব মুকলিতেই। আজিৰ সময়ত চকুৰে নেদেখিলে ভবেন দাসৰ পৰিয়ালৰ ঘৰৰ পৰিৱেশ বিশ্বাস কৰিব পৰাটো হয়তো অসম্ভব। কিন্তু এই পৰিয়ালটোৱে এইবাৰো নাপালে ঘৰ। দুৰ্ভগীয়া ভৱেন দাসে দৈনিক অগ্ৰদূতক ক্ষোভ প্ৰকাশ কৰিলে এইবুলি – দৰ্খাস্ত কিমান দিম, বছৰৰ পাছত বছৰ ধৰি দৰ্খাস্ত দিয়েই থাকিলোঁ, কিন্তু মই ঘৰ নাপাওঁ ।
দলৰ মানুহবোৰেও সভাই সমিতিয়ে যলৈকে মাতে তালৈকে যাওঁ। প্ৰতিবাৰেই ঘৰটো হব বুলি আশ্বাস দিয়ে, কিন্তু দেখিছেই নহয় মোৰ ঘৰৰ অৱস্থা। যোৱা বানপানীৰ সময়ত এখন বেৰ নষ্ট হৈ পৰাৰ পাছত বেৰখনৰ ব্যৱস্থা এতিয়াও কৰিব পৰা নাই।
কি কৰিম, এজন মানুহে দিন হাজিৰা কৰি ভাতেই খাম নে বেৰখনৰ ব্যৱস্থাই কৰিম। চাউলকেইটা পালেও ভাল আছিল, ৰেচন কাৰ্ডখনেই নিদিলে চাউল কত পাম। ” লক্ষণীয় যে ভৱেন দাসৰ পৰিয়ালটোয়ে যিধৰণে দিন কটাইছে যেন দেশীয় নাগৰিক নহৈ কোনোবা শৰণাৰ্থীহে। আনকি খাদ্যৰ অধিকাৰৰ পৰা আৰম্ভ কৰি কৃষকৰ সাহায্য পৰ্যন্ত প্ৰায় সকলোবোৰ চৰকাৰী সা- সুবিধাৰ পৰা বঞ্চিত হৈ আছে ভৱেন দাসৰ পৰিয়াল।
ৰাষ্ট্ৰীয় খাদ্য সুৰক্ষা আইনৰ অধীনত দেশৰ প্ৰতিটো দৰিদ্ৰ পৰিয়ালক চৰকাৰে খাদ্যৰ অধিকাৰ প্ৰদান কৰিছে যদিও ভৱেন দাসে পোৱা নাই ৰেচন কাৰ্ডখন পৰ্যন্ত। ফলত তেওঁ চৰকাৰীভাৱে পেটৰ ভাতমুঠিৰ পৰাও বঞ্চিত হৈ আহিছে। তেওঁ কয় – এজন মানুহে হাজিৰা কৰোঁ।
তাকো সদায় কৰিব নোৱাৰোঁ, অসুস্থ মানুহ। ইয়াৰে চাউলৰ পৰা আৰম্ভ কৰি সকলো কিনিব লগা। আগতে অলপ কৃষকৰ ধন লাভ কৰিছিলো যদিও যোৱা ছয়মাহমানৰ পৰা সেয়াও বন্ধ কৰি দিছে। চৰকাৰে কেৱল দিছেহে দিছে, এই ভৱেন দাসলৈ কিন্তু কাৰো চকুত নপৰে।
” ইপিনে ভৱেন দাসৰ বৃদ্ধ মাতৃয়ে কান্দি কান্দি কয় – বাপাহত চৰকাৰক কবিচোন, আমাকো কিবা অলপ দিবলৈ। ” পিছে ভৱেন দাস আৰু তেওঁৰ বৃদ্ধ মাতৃৰ দুখ, কাতৰ শুনিবলৈ সময় হবনে চৰকাৰযন্ত্ৰৰ ? পূৰণ হবনে ২০২৫ ত সকলোৰে বাবে পকী ঘৰ নিৰ্মান কৰাৰ প্ৰধান মন্ত্ৰীৰ সপোন ? আগন্তুক সময়ে এনে প্ৰশ্নসমূহৰ উত্তৰ কি দিব সেয়া লক্ষণীয় হব।