ISRO Chair S.Somnath:
যোৱা ২৩ আগষ্টত চন্দ্ৰৰ ভূমি স্পৰ্শ কৰে ভাৰতে। বিশ্বৰ প্ৰথম দেশৰ মহাকাশ যান হিচাপে চন্দ্ৰপৃষ্ঠৰ ৰহস্যময় দক্ষিণ মেৰুত অৱতৰণ কৰে ইছৰ’ৰ চন্দ্রযান-এ। মহাকাশ গৱেষণাৰ এই যুগান্তকাৰী সাফল্যত সমগ্র দেশেই গর্বিত অনুভৱ কৰিছে।
এই ঐতিহাসিক সাফল্যৰ নেপথাত আছিল ইছৰ’ৰ বিজ্ঞানীসকল, যি মেধাৱী দলটোৰ নেতৃত্বত আছিল ভাৰতীয় মহাকাশ গৱেষণা সংস্থাটোৰ অধ্যক্ষ এই সোমনাথ। সম্প্রতি বিমান সংস্থা ইণ্ডিগোত ভ্ৰমণৰ সময়ত ঊষ্ণ অভ্যর্থনা লাভ কৰিলে সোমনাথে। এই হৃদয়স্পর্শী মুহূৰ্তটো ইনষ্টগ্ৰামত শ্বেয়াৰ কৰিছে এগৰাকী বিমানসেৱিকাই। ইতিমধ্যেই এই ভিডিঅ’ সামাজিক মাধ্যমত ভাইৰেল হৈছে।
সামাজিক মাধ্যমত উক্ত ভিডিঅ’ শ্বেয়াৰ কৰে পূজা শ্বাহ নামৰ এগৰাকী বিমানসেবিকাই। তাত দেখা গৈছে ইছৰ’ৰ অধ্যক্ষ সোমনাথক লৈ গর্বিত ঘোষণা কৰিছে এগৰাকী বিমানসেবিকাই ।
তেওঁ কয়, ‘মই ইছৰ’ৰ অধ্যক্ষ এছ সোমনাথৰ উপস্থিতিৰ কথা ঘোষণা কৰিব পাৰি আনন্দিত হৈছো। তেওঁ আজি আমাৰ বিমান সংস্থাৰ বিমানত যাত্ৰাৰ বাবে উঠিছে। সোমনাথ আৰু তেওঁৰ দলৰ বাবে বিপুল হাততালি । আপোনাক এই যাত্ৰাত পাই আমি গর্বিত।
ভাৰতক গর্বিত কৰাৰ বাবে আপোনাক আৰু আপোনাৰ দলক অভিনন্দন।’ ঘোষণা শেষ হোৱাৰ লগে লগে বিমানৰ আন যাত্ৰীসকলে ইছৰ’ৰ মুৰব্বীক হাততালি দি অভিনন্দন জনায়।
উক্ত ভাইৰেল ভিডিঅ’ৰ কেপচনত লিখিছে, ‘ইছৰ’ৰ অধ্যক্ষ এছ সোমনাথ। আমাৰ যাত্ৰাত এছ সোমনাথক অভ্যর্থনা জনাব পাৰি পৰম গৌৰৱ অনুভৱ কৰিছো। নিজৰ ফ্লাইটত এনে ‘নায়কসকলক’ পোৱাটো সদায় আনন্দৰ।’ সামাজিক মাধ্যম ব্যৱহাৰকাৰী সকলেও এই ভিডিঅ’টো পছন্দ কৰিছে ।