Rangapara Bihu Workshop:
অসমীয়াৰ হেঁপাহৰ ৰঙালী বিহুলৈ মাজত মাথো কেইটামান দিন বাকী। ৰাজ্যৰ বিভিন্ন প্ৰান্তত এতিয়া ঢোল, পেঁপা, তাল, গগণাৰ শব্দ আৰু বিহুগীতৰে আকাশ-বতাহ মুখৰিত হৈ পৰিছে। বহাগ বিহুৰ আগমনৰ লগে লগে ৰাজ্যৰ বিভিন্ন প্ৰান্তত অনুষ্ঠিত হয় বিহুৰ কৰ্মশালা। এই কৰ্মশালাৰ প্ৰধান লক্ষ্য হৈছে উঠি অহা নৱপ্ৰজন্মক কৰ্মশালাৰ জৰিয়তে সঠিক ভাৱে ঢোল বাদন আৰু বিহুৰ নাচৰ প্ৰশিক্ষণ প্ৰদান কৰা।
ৰঙাপৰাৰ অন্যতম সামাজিক অনুষ্ঠান বেজবৰুৱা সংঘই এইবেলি দ্বিতীয় বাৰ্ষিক ৰঙালী বিহুৰ কৰ্মশালাখনি অনুষ্ঠিত কৰিছিল। বেজবৰুৱা সংঘৰ উদ্যোগত আৰু ঢেকিয়াজুলি সপ্তৰ্ষি লোককলা কৃষ্টি একাডেমীৰ সহযোগত অনুষ্ঠিত হোৱা ১২ দিনীয়া বিহু কৰ্মশালাখনি আজি সফল সামৰণি পৰে।
সামৰণিৰ দিনটোত ঢোল, পেঁপা, তাল, গগণাৰ শব্দ আৰু বিহুগীতৰে ৰজনজনাই উঠে বেজবৰুৱা সংঘৰ বাকৰি। ১২ দিনীয়া কৰ্মশালাত সপ্তৰ্ষি লোককলা কৃষ্টিৰ একাডেমীৰ গনেশ ডেকা, গীতাঞ্জলি ডেকা, পিংকি বড়ো, ৰাজদ্বীপ হাজৰিকা আৰু প্ৰাঞ্জল হাজৰিকাই প্ৰশিক্ষণ প্ৰদান কৰিছিল।
বিহু কৰ্মশালাত বৃহত্তৰ অঞ্চলটোৰ প্ৰায় ১৫০ গৰাকী কিশোৰী, যুৱতী আৰু কণ কণ শিশুয়ে বিহু নৃত্যৰ প্ৰশিক্ষণ গ্ৰহণ কৰে। সংঘৰ সভাপতি বলেন চক্ৰৱৰ্তী আৰু সম্পাদক ৰজমনি কলিতাৰ নেতৃত্বত অনুষ্ঠিত হোৱা বিহু কৰ্মশালাত প্ৰশিক্ষণ লোৱা প্ৰশিক্ষাৰ্থীসকলক প্ৰশিক্ষণ প্ৰাপ্ত প্ৰমান পত্ৰ প্ৰদান কৰে।
অনুষ্ঠানত তেজপুৰৰ সমাজ কৰ্মী দীপক শইকীয়া, অসম চাহ জনজাতি ছাত্ৰ সন্থাৰ কেন্দ্ৰীয় কাৰ্য্যনিৰ্বাহক মোহন তাঁতী, ৰঙাপৰা পৌৰসভাৰ উপপৌৰপতি তৃপ্তি গুহ,ৱাৰ্ড কমিছনাৰ ক্ৰমে স্বপন ধৰ ৰাজা বাবু স্বাহ, গনেশ কৰ্মকাৰ সাংস্কৃতিক কৰ্মী গকুল সাহা ,বিপুল মেছ আদি বিশিষ্ট ব্যক্তি সকল উপস্থিত আছিল।
